ಸತ್ಯ ಹರಿಶ್ಚಂದ್ರ. ಶರಣ್ ಅಭಿನಯದ ಈ ಸಿನಿಮಾ ದೀಪಾವಳಿಗೆ ನಗೆ ಪಟಾಕಿ ಹಚ್ಚೋಕೆ ಬರ್ತಾ ಇದೆ. ಶರಣ್ ಚಿತ್ರ ಎಂದ ಮೇಲೆ ಕಾಮಿಡಿ ಇರಲಬೇಕು. ಈ ಚಿತ್ರದಲ್ಲಿ ಶರಣ್ ಪಾತ್ರದ ಹೆಸರು ಸತ್ಯ ಹರಿಶ್ಚಂದ್ರ. ಆದರೆ, ಹೇಳೋದೆಲ್ಲ ಸುಳ್ಳು. ಶರಣ್‍ಗೆ ಈ ಚಿತ್ರದಲ್ಲಿ ಇಬ್ಬರು ನಾಯಕಿಯರು. ಅದರಲ್ಲಿ ಒಬ್ಬರು ಭಾವನಾ ರಾವ್.

ಚಿತ್ರದ ಶೂಟಿಂಗ್ ಅನುಭವ ಹೇಳಿಕೊಂಡಿರೋ ಭಾವನಾ ರಾವ್, ಶರಣ್ ಕಾಮಿಡಿ ಟೈಮಿಂಗ್ ಅದ್ಭುತ ಎಂದಿದ್ದಾರೆ. ಶರಣ್ ಅವರ ಟೈಮಿಂಗ್‍ಗೆ ಸರಿಯಾಗಿ ನಾವು ರಿಯಾಕ್ಷನ್ ಕೊಡಬೇಕು. ಅದು ಬಹಳ ಕಷ್ಟವಾಗಿತ್ತು. ಶೂಟಿಂಗ್‍ನಲ್ಲಿ ಅದನ್ನು ಕಲಿತುಕೊಂಡೆ ಎಂದು ಅನುಭವ ಹಂಚಿಕೊಂಡಿದ್ದಾರೆ ಭಾವನಾ ರಾವ್.

ಅಳಿಸೋದು ಸುಲಭ..ನಗಿಸೋದು ಕಷ್ಟ ಅನ್ನೋದು ಭಾವನಾ ರಾವ್ ಅನುಭವದ ಮಾತು. ಆ ಕಷ್ಟವನ್ನು ದಯಾಳ್ ಪದ್ಮನಾಭನ್ ತಾಳ್ಮೆಯಿಂದ ಹೇಳಿಕೊಟ್ಟು ಸುಲಭವಾಗಿಸಿದರು ಎಂದಿದ್ದಾರೆ ಭಾವನಾ ರಾವ್.

ಕುಲದಲ್ಲಿ ಕೀಳ್ಯಾವುದೋ.. ಹಾಡನ್ನು ರೀಮಿಕ್ಸ್ ಮಾಡಿಕೊಂಡು ಬರುತ್ತಿರುವ ಶರಣ್ ಅಭಿನಯದ ಸತ್ಯ ಹರಿಶ್ಚಂದ್ರ ಚಿತ್ರ ಈಗ ಇನ್ನೊಂದು ಇಂಟ್ರೆಸ್ಟಿಂಗ್ ಕಾರಣದಿಂದ ಸುದ್ದಿಯಾಗಿದೆ. ಚಿತ್ರದ ಫೈಟಿಂಗ್ ಸೀನ್‍ಗಳನ್ನು ಪೋರ್ಚುಗಲ್‍ನಲ್ಲಿ ಶೂಟಿಂಗ್ ಮಾಡಲಾಗಿದೆ. ಚಿತ್ರದ ಸ್ಟಂಟ್ ದೃಶ್ಯಗಳನ್ನು ಸಂಯೋಜಿಸಿರುವುದು ಪೋರ್ಚುಗಲ್‍ನ ಜನಪ್ರಿಯ ಸ್ಟಂಟ್ ಮಾಸ್ಟರ್ ಡೆವಿಡ್ ಚಾನ್.

ಕಲಾವಿದರನ್ನು ನೋಡಿ, ಅವರನ್ನು ಅಧ್ಯಯನ ಮಾಡಿ, ಅದಕ್ಕೆ ತಕ್ಕಂತೆ ಫೈಟ್ ದೃಶ್ಯಗಳನ್ನು ಸಂಯೋಜಿಸುವ ಅವರ ಸ್ಟೈಲ್ ಶರಣ್‍ಗೆ ಸಿಕ್ಕಾಪಟ್ಟೆ ಇಷ್ಟವಾಗಿಬಿಟ್ಟಿದೆ. ಪೋರ್ಚುಗಲ್‍ನ ಸ್ಟಂಟ್ ಮಾಸ್ಟರ್, ಸಿಕ್ಕಾಪಟ್ಟೆ ರಿಸ್ಕೀ ಸ್ಟಂಟ್ ಇಡ್ತಾರೋ ಏನೋ ಎಂದುಕೊಂಡಿದ್ದವರಿಗೆ ಅವರು ಕೊಟ್ಟಿದ್ದು, ಶರಣ್ ಬಾಡಿಲಾಂಗ್ವೇಜ್‍ಗೆ ಹೊಂದಿಕೆಯಾಗುವಂತಹ ಸ್ಟಂಟ್‍ಗಳು. ಹೀಗಾಗಿ ಆ ಸೀನ್‍ಗಳನ್ನೆಲ್ಲ ಸಲೀಸಾಗಿ ಶೂಟಿಂಗ್ ಮಾಡಿದೆವು ಎಂದಿದ್ದಾರೆ ಶರಣ್.

ಡೆವಿಡ್ ಚಾನ್, ಇತ್ತೀಚೆಗೆ ತೆಲುಗು ಸ್ಟಾರ್ ಬಾಲಕೃಷ್ಣ ಅಭಿನಯದ ಪೈಸಾ ವಸೂಲ್ ಚಿತ್ರಕ್ಕೆ ಸ್ಟಂಟ್ ಸಂಯೋಜಿಸಿದ್ದರು. ಈಗ ಕನ್ನಡದಲ್ಲಿ ಸ್ಟಂಟ್ ಮಾಡಿಸಿದ್ದಾರೆ.

ಶ್ರೀಕಂಠ ಚಿತ್ರದ ಮೂಲಕ ಶಿವರಾಜ್ ಕುಮಾರ್ ಅವರನ್ನು ವಿಭಿನ್ನ ಗೆಟಪ್‍ನಲ್ಲಿ ತೋರಿಸಿದ್ದ ಮಂಜು ಸ್ವರಾಜ್, ಈಗ ಶರಣ್ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಲು ರೆಡಿಯಾಗಿದ್ದಾರೆ. ಮಾಸ್ ಲೀಡರ್ ನಂತರ ತರುಣ್ ಶಿವಪ್ಪ ನಿರ್ಮಿಸುತ್ತಿರುವ ಚಿತ್ರಕ್ಕೆ ಶರಣ್ ಹೀರೋ. ಮಂಜು ಸ್ವರಾಜ್ ನಿರ್ದೇಶಕ.

ಚಿತ್ರಕ್ಕೆ ಕಥೆ ಸಿದ್ಧವಾಗುತ್ತಿದ್ದು, ತರುಣ್ ಸುಧೀರ್ ಆ ಕೆಲಸದಲ್ಲಿ ಬ್ಯುಸಿಯಾಗಿದ್ದಾರೆ. ಶರಣ್ ಅಭಿನಯದ ರ್ಯಾಂಬೋ, ವಿಕ್ಟರಿ, ಅಧ್ಯಕ್ಷ ಚಿತ್ರಗಳಲ್ಲಿ ತೊಡಗಿಸಿಕೊಂಡಿದ್ದ ತರುಣ್ ಸುಧೀರ್, ಮತ್ತೊಮ್ಮೆ ಶರಣ್ ಚಿತ್ರಕ್ಕೆ ಜೊತೆಯಾಗಿದ್ದಾರೆ. ರ್ಯಾಂಬೋ 2 ಚಿತ್ರದಲ್ಲಿ ಬ್ಯುಸಿಯಾಗಿರುವ ಶರಣ್, ನಂತರ ಮಲಯಾಳಂನ `ಟು ಕಂಟ್ರೀಸ್' ಚಿತ್ರದ ರೀಮೇಕ್‍ನಲ್ಲಿ ನಟಿಸಲಿದ್ದಾರೆ. ಅದಾದ ಮೇಲೆ ಮಂಜು ಸ್ವರಾಜ್ ನಿರ್ದೇಶನದ ಚಿತ್ರ ಶುರುವಾಗಲಿದೆ.

ಶರಣ್ ಜೊತೆ ಒಂದೇ ಹಾಡಿನಲ್ಲಿ ಶ್ರುತಿ ಹರಿಹರನ್, ಭಾವನಾ ರಾವ್, ಸಂಚಿತಾ ಪಡುಕೋಣೆ, ಶುಭಾ ಪೂಂಜಾ ಹಾಗೂ ಮಯೂರಿ ಒಟ್ಟಿಗೇ ಡ್ಯಾನ್ಸ್ ಮಾಡುತ್ತಿದ್ದಾರೆ. ಇದು ರ್ಯಾಂಬೋ-2 ಚಿತ್ರದ ಸ್ಪೆಷಲ್ ಸಾಂಗ್. ಇನ್ನೋವೇಟಿವ್ ಫಿಲ್ಮ್‍ಸಿಟಿಯಲ್ಲಿ ಈಗಾಗಲೇ ಹಾಡಿನ ಶೂಟಿಂಗ್ ಜೋರಾಗಿ ಸಾಗಿದೆ. ಇವರೆಲ್ಲರೂ ಈ ಮೊದಲು ಶರಣ್ ಚಿತ್ರಗಳಲ್ಲಿ ನಾಯಕಿಯರಾಗಿದ್ದವರು ಎಂಬುದು ವಿಶೇಷ.

ಶರಣ್ ಅವರ ಲಡ್ಡು ಸಿನಿಮಾ ಬ್ಯಾನರ್‍ನಲ್ಲಿ ತಯಾರಾಗುತ್ತಿರುವ ರ್ಯಾಂಬೋ-2ಗೆ, ಅಟ್ಲಾಂಟಾ ನಾಗೇಂದ್ರ ಹಾಗೂ ತಂತ್ರಜ್ಞರೆಲ್ಲರೂ ನಿರ್ಮಾಪಕರೇ. ಚಿತ್ರಕ್ಕೆ ಅಶಿಕಾ ರಂಗನಾಥ್ ನಾಯಕಿಯಾಗಿದ್ದರೆ, ಚಿಕ್ಕಣ್ಣ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.

ಐವರು ನಾಯಕಿಯರ ಜೊತೆಗಿನ ಈ ಹಾಡಿನ ಶೂಟಿಂಗ್ ಮುಗಿದರೆ, ಹೆಚ್ಚೂ ಕಡಿಮೆ ಚಿತ್ರದ ಶೂಟಿಂಗ್ ಮುಗಿದಂತೆ. ಇನ್ನೊಂದು ಕಡೆ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳನ್ನೂ ಬಿರುಸಿನಿಂದಲೇ ಮುಗಿಸಿರುವ ಚಿತ್ರತಂಡ, ಈ ತಿಂಗಳ ಕೊನೆಯ ಹೊತ್ತಿಗೆ ಸೆನ್ಸಾರ್ ಮುಂದೆ ಬರುವ ಪ್ಲಾನ್ ಹಾಕಿಕೊಂಡಿದೆ.

ಕಾಮಿಡಿ ಸ್ಟಾರ್ ಶರಣ್ ಪುತ್ರಿ ಸಿನಿಮಾ ಲೋಕಕ್ಕೆ ಎಂಟ್ರಿ ಕೊಟ್ಟಿದ್ದಾರೆ. ಶರಣ್ ಅಭಿನಯದ ಅವತಾರ್ ಪುರುಷ ಚಿತ್ರದಲ್ಲಿ ಶರಣ್ ಪುತ್ರಿ ಪುಣ್ಯ ಕೂಡಾ ನಟಿಸುತ್ತಿದ್ದಾರೆ. ಸ್ಕೂಲ್ ಯೂನಿಫಾರ್ಮ್ ಹಾಕಿಕೊಂಡು ಮುದ್ದು ಮುದ್ದಾಗಿರುವ ಪುಣ್ಯಳ ಎಂಟ್ರಿಯನ್ನು ಅವತಾರ್ ಪುರುಷ ಚಿತ್ರತಂಡ, ಪುಣ್ಯ ಹುಟ್ಟುಹಬ್ಬದ ದಿನವೇ ಅಧಿಕೃತವಾಗಿಯೇ ಘೋಷಿಸಿದೆ. 

ಸಿಂಪಲ್ ಸುನಿ ನಿರ್ದೇಶನದ ಅವತಾರ್ ಪುರುಷ ಚಿತ್ರಕ್ಕೆ ಶರಣ್ ಹೀರೋ. ಅಶಿಕಾ ರಂಗನಾಥ್ ಹೀರೋಯಿನ್. ಪುಣ್ಯ ರೋಲ್ ಏನು ಅನ್ನೋದು ಸದ್ಯಕ್ಕೆ ಸಸ್ಪೆನ್ಸ್.

ಚಮಕ್ ಚಿತ್ರದಲ್ಲಿ ಗಣೇಶ್ ಮಗಳನ್ನು ಬೆಳ್ಳಿತೆರೆಗೆ ತಂದಿದ್ದ ಸುನಿ, ಈ ಚಿತ್ರದಲ್ಲಿ ಶರಣ್ ಪುತ್ರಿಯನ್ನು ಪರಿಚಯಿಸುತ್ತಿದ್ದಾರೆ. ಪುಷ್ಕರ್ ಮಲ್ಲಿಕಾರ್ಜುನಯ್ಯ ನಿರ್ಮಾಣದ ಸಿನಿಮಾದ ಚಿತ್ರೀಕರಣ ಬಿರುಸಿನಿಂದ ಸಾಗುತ್ತಿದೆ.

ನಿನ್ನೆ ಮೊನ್ನೆ ಬಂದವ್ರೆಲ್ಲ ನಂಬರ್ 1 ಅಂತಾರೋ.. ಅಂತಾ ಜೋಗಿ ಪ್ರೇಮ್ ವಿಲನ್‍ನಲ್ಲಿ ಸುಮ್ಮನೆ ಬರೆದಿದ್ದೇನೂ ಅಲ್ಲ. ಮೊದಲ ಚಿತ್ರ ಮಾಡುವಾಗಲೇ ಹೀರೋಗೊಂದು ಬಿರುದು ಕೊಟ್ಟಿರುತ್ತಾರೆ. ಎಲ್ಲರೂ ಸ್ಟಾರ್‍ಗಳೇ. ಆದರೆ ಶರಣ್ ಹಾಗಲ್ಲ. ನೀವು ಅವರ ಯಾವುದೇ ಸಿನಿಮಾ ನೋಡಿ.. ಟೈಟಲ್ ಕಾರ್ಡ್‍ನಲ್ಲಿ ಜಸ್ಟ್ ಶರಣ್ ಎಂದಷ್ಟೇ ಬರುತ್ತೆ. ಆದರೆ, ಶರಣ್ ಲಿಸ್ಟ್‍ನಲ್ಲಿ ಈಗಾಗಲೇ ಹಿಟ್ ಚಿತ್ರಗಳ ದೊಡ್ಡ ಸಾಲೇ ಇದೆ. ಹೀಗಿದ್ದರೂ ಶರಣ್ ಯಾಕೆ ಸ್ಟಾರ್ ಅನ್ನೋ ಬಿರುದು ಬಾವಳಿ ಇಟ್ಟುಕೊಳ್ಳೋದಿಲ್ಲ ಎಂಬ ಪ್ರಶ್ನೆಗೆ ಶರಣ್ ಅವರೇ ಉತ್ತರ ಕೊಟ್ಟಿದ್ದಾರೆ.

`ನಾನು ಹುಟ್ಟುವ ವೇಳೆ ನನ್ನ ತಂದೆ, ತಾಯಿ ಗುಬ್ಬಿ ಕಂಪೆನಿಯಲ್ಲಿದ್ದರು. ಯಾದಗಿರಿಯಲ್ಲಿ ಕ್ಯಾಂಪ್ ಹಾಕಿದ್ದಾಗ ನನ್ನ ತಾಯಿ ಗರ್ಭಿಣಿ. ಅಮ್ಮನನ್ನು ಚೆಕ್ ಮಾಡಿದ ಡಾಕ್ಟರ್, ಮಗು ಅಪಾಯದಲ್ಲಿದೆ, ತೆಗೆಸಿಬಿಡಿ ಎಂದರಂತೆ. ಆದರೆ, ಅಮ್ಮ ಗಟ್ಟಿಗಿತ್ತಿ. ಅಲ್ಲಿಯೇ ಇದ್ದ ಶ್ರೀ ಶರಣ ಬಸವೇಶ್ವರ ಸನ್ನಿಧಿಗೆ ಹೋಗಿ, ಯಾವುದೇ ತೊಂದರೆಯಾಗದೆ ಮಗು ಹುಟ್ಟಿದರೆ ನಿನ್ನ ಹೆಸರೇ ಇಡುತ್ತೇನೆ ಎಂದು ಹರಕೆ ಹೊತ್ತರು. ಆಗ ನಾನು ಹುಟ್ಟಿದೆ. ಶರಣ ಎಂದು ಹೆಸರಿಟ್ಟರು. ಯಾವುದೇ ಗಳಿಗೆ, ಜಾತಕ, ನಕ್ಷತ್ರ, ರಾಶಿ ಫಲ ನೋಡಲಿಲ್ಲ. ಅದೇ ಹೆಸರು ಇಲ್ಲಿಯವರೆಗೆ ಕರೆದುಕೊಂಡು ಬಂದಿದೆ. ಮತ್ತೇಕೆ ಬಿರುದು..?''

ಇದು ಶರಣ್ ಪ್ರಶ್ನೆ. ನನ್ನ ಚಿತ್ರಗಳನ್ನು ಜನ ಕಾಮಿಡಿಗಾಗಿಯೇ ನೋಡುತ್ತಾರೆ. ಶಿಳ್ಳೆ ಹಾಕುತ್ತಾರೆ. ಚಪ್ಪಾಳೆ ತಟ್ಟುತ್ತಾರೆ. ಅದು ನನಗೆ ಸಾಕು ಅನ್ನೋ ಶರಣ್, ಅಧ್ಯಕ್ಷ ಇನ್ ಅಮೆರಿಕ ಚಿತ್ರದ ಮೂಲಕ ಶೀಘ್ರದಲ್ಲೇ ಮತ್ತೊಮ್ಮೆ ನಗಿಸೋಕೆ ರೆಡಿಯಾಗಿದ್ದಾರೆ.

ಶರಣ್ ಚಿತ್ರಗಳು ಸೂಪರ್ ಹಿಟ್ ಆಗಿವೆ. ಆವರೇಜ್ ಲೆವೆಲ್‍ನಲ್ಲಿ ಗೆದ್ದಿವೆ. ಫ್ಲಾಪ್ ಇಲ್ಲವೇ ಇಲ್ಲ ಎನ್ನುವಷ್ಟು ಕಡಿಮೆ. ಶರಣ್ ಚಿತ್ರಗಳಿಗೆ ಹೋದರೆ ಆರಾಮವಾಗಿ ನಕ್ಕು ಬರಬಹುದು ಎಂಬ ನಿರೀಕ್ಷೆ ಪ್ರೇಕ್ಷಕರದ್ದು. ಹೀಗಿದ್ದರೂ ಶರಣ್ ನಾಯಕತ್ವದ ಯಾವ ಚಿತ್ರಕ್ಕೂ, ರಾಜ್ ವಿಷ್ಣು ಚಿತ್ರಕ್ಕೆ ಸಿಗುತ್ತಿರುವಂತದ ದೊಡ್ಡ ಮಟ್ಟದ ಹೈಪ್ ಸಿಕ್ಕಿರಲಿಲ್ಲ.

ರಾಜ್ ವಿಷ್ಣು ಚಿತ್ರ ಏಕಕಾಲದಲ್ಲಿ 300 ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುತ್ತಿದೆ. ಶರಣ್ ಚಿತ್ರಜೀವನದಲ್ಲಿಯೇ ಇದು ಅತಿದೊಡ್ಡ ಮಟ್ಟದಲ್ಲಿ ಬಿಡುಗಡೆ ಭಾಗ್ಯ ಕಾಣುತ್ತಿರುವ ಚಿತ್ರ. ಕೋಟಿ ರಾಮು ಎಂದೇ ಫೇಮಸ್ ಆಗಿರುವ ರಾಮು ಬ್ಯಾನರ್‍ನ 37ನೇ ಚಿತ್ರ ರಾಜ್ ವಿಷ್ಣು.

ದುಡ್ಡು ಕೊಟ್ಟು ಬರುವ ಯಾವೊಬ್ಬ ಪ್ರೇಕ್ಷಕನಿಗೂ ಮೋಸವಾಗಲ್ಲ. ಎರಡು ಗಂಟೆ ಕಾಲ ನಗಬಹುದು. ಬಾಂಧವ್ಯಗಳ ಕಥೆಯನ್ನೂ ನೋಡಬಹುದು ಎಂದಿದ್ದಾರೆ ರಾಮು.

3 ವರ್ಷಗಳ ನಂತರ ಮತ್ತೆ ಜೊತೆಯಾಗಿರುವ ಶರಣ್-ಚಿಕ್ಕಣ್ಣ ಕಾಂಬಿನೇಷನ್, ಅವರಿಬ್ಬರ ನಗೆಯೂಟದ ಮಧ್ಯೆ ಉಪ್ಪಿನಕಾಯಿಯಂತೆ ಕಾಣುತ್ತಿರುವ ಸಾಧುಕೋಕಿಲ, ಹಿಟ್ ಆಗಿರುವ ಹಾಡುಗಳು.. ಎಲ್ಲವೂ ನಿರೀಕ್ಷೆಯನ್ನು ಭರ್ಜರಿಯಾಗಿಯೇ ಹೆಚ್ಚಿಸಿವೆ.

ಅಧ್ಯಕ್ಷ ಇನ್ ಅಮೆರಿಕ ಸಿನಿಮಾ ಮುಂದಿನ ತಿಂಗಳು ರಿಲೀಸ್ ಆಗುತ್ತಿದೆ. ಚಿತ್ರದ ಟೀಸರ್, ಹಾಡುಗಳು ಹೊರಬರುತ್ತಿದ್ದಂತೆಯೇ ಟ್ರೆಂಡ್ ಸೃಷ್ಟಿಸುತ್ತಿವೆ. ರಾಗಿಣಿಯಂತೂ ಮುದ್ದು ಮುದ್ದಾಗಿ ಕಾಣುತ್ತಿದ್ದು, ಅಭಿಮಾನಿಗಳು ಥ್ರಿಲ್ಲಾಗಿದ್ದಾರೆ.

ಆದರೆ, ಎಲ್ಲ ಕಡೆಯಲ್ಲೂ ಅಭಿಮಾನಿಗಳು ಕಿಚಾಯಿಸುತ್ತಿರುವುದು ಶರಣ್ ಅವರನ್ನೇ. ಏಕೆಂದರೆ ರಾಗಿಣಿ ನಾಯಕಿಯಾಗಿದ್ದ ಕೆಂಪೇಗೌಡ, ಆರಕ್ಷಕ ಮೊದಲಾದ ಚಿತ್ರಗಳಲ್ಲಿ ಶರಣ್ ಕಾಮಿಡಿಯನ್ ಆಗಿದ್ದರು. ಈಗ ಅದೇ ರಾಗಿಣಿ, ಶರಣ್‍ಗೆ ಹೀರೋಯಿನ್.

ಹಾಗೆಂದು ರಾಗಿಣಿ, ಶರಣ್ ಜೊತೆ ನಟಿಸುತ್ತಿರುವುದು ಇದೇ ಮೊದಲಲ್ಲ. ಹಿಂದೆ ವಿಕ್ಟರಿ ಚಿತ್ರದಲ್ಲಿ ರಾಗಿಣಿ ಸ್ಪೆಷಲ್ ಸಾಂಗಿಗೆ ಹೆಜ್ಜೆ ಹಾಕಿದ್ದರು. ಈಗ ನಾಯಕಿಯೇ ಆಗಿ ಬಂದಿದ್ದಾರೆ.

ಆದರೂ.. ಏನ್ ಅದೃಷ್ಟಾರೀ ಶರಣ್ ನಿಮ್ದು ಎಂದು ಕಿಚಾಯಿಸುತ್ತಲೇ ಇದ್ದಾರೆ ಫ್ಯಾನ್ಸ್. ಯೋಗಾನಂದ್ ನಿರ್ದೇಶನದ ಅಧ್ಯಕ್ಷ ಇನ್ ಅಮೆರಿಕ ಅಕ್ಟೋಬರ್ 4ರಂದು ರಿಲೀಸ್ ಆಗುತ್ತಿದೆ.

ಕಾಮಿಡಿ ಚಿತ್ರಗಳೆಂದರೆ ಈಗ ತಕ್ಷಣ ನೆನಪಾಗುವುದು ನಟ ಶರಣ್. ಸದಾ ಬ್ಯುಸಿಯಾಗಿರುವ ಶರಣ್ ಅಭಿನಯದ ಹೊಸ ಚಿತ್ರವೊಂದು ಸೆಟ್ಟೇರಿದೆ. ಚಿತ್ರಕ್ಕಿನ್ನೂ ಹೆಸರಿಟ್ಟಿಲ್ಲ. ಚಿತ್ರದ ನಿರ್ದೇಶಕ ಸಂತು. ನಿರ್ಮಾಪಕ ತರುಣ್ ಶಿವಪ್ಪ.

ಮಾಸ್ ಲೀಡರ್ ಚಿತ್ರದ ನಂತರ ತರುಣ್ ಶಿವಪ್ಪ ನಿರ್ಮಿಸುತ್ತಿರುವ ಸಿನಿಮಾ ಇದು. ಕಾಲೇಜ್ ಕುಮಾರ ನಂತರ ಸಂತು ನಿರ್ದೇಶಿಸುತ್ತಿರುವ ಸಿನಿಮಾಗೆ ಶರಣ್ ಹೀರೋ. ಇನ್ನು ಕಾಲೇಜ್ ಕುಮಾರ ಚಿತ್ರದ ರಿಯಲ್ ಹೀರೋ ಆಗಿದ್ದ ರವಿಶಂಕರ್ ಚಿತ್ರದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸುತ್ತಿದ್ದಾರೆ.

ಸಾಧುಕೋಕಿಲ, ತಬಲಾ ನಾಣಿ, ಪ್ರಶಾಂತ್ ಸಿದ್ಧಿ ಮೊದಲಾದವರು ನಟಿಸುತ್ತಿರುವ ಚಿತ್ರಕ್ಕೆ ನಾಯಕಿಯ ಆಯ್ಕೆ ಇನ್ನೂ ಫೈನಲ್ ಆಗಿಲ್ಲ. ತರುಣ್ ಸುಧೀರ್ ಕಥೆ ಮತ್ತು ಚಿತ್ರಕಥೆ ಇರುವ ಚಿತ್ರಕ್ಕೆ ಅರ್ಜುನ್ ಜನ್ಯ ಸಂಗೀತವಿದೆ.

ಶರಣ್ ಅಭಿನಯದ, ದಯಾಳ್ ಪದ್ಮನಾಭ್ ನಿರ್ದೇಶನದ ಸತ್ಯ ಹರಿಶ್ಚಂದ್ರ ಬಿಡುಗಡೆಗೂ ಮುನ್ನ ಭರ್ಜರಿ ಸದ್ದು ಮಾಡುತ್ತಿದೆ. ಮೊದಲು ಕುಲದಲ್ಲಿ ಕೀಳ್ಯಾವುದೋ ಚಿತ್ರದಿಂದ ಸೌಂಡ್ ಮಾಡಿದ್ದ ಚಿತ್ರ, ನಂತರ ಹಲವಾರು ವಿಶೇಷಗಳಿಂದ ಕುತೂಹಲ ಹೆಚ್ಚಿಸುತ್ತಲೇ ಇದೆ. ಶರಣ್ ಚಿತ್ರವಾದ್ದರಿಂದ ನಗುವಿಗೆ ಮೋಸವಿಲ್ಲ. ಕಾಮಿಡಿಗೆ ಬರವಿಲ್ಲ.

ಇನ್ನು ಚಿತ್ರತಂಡದವರ ಖುಷಿ ಹೆಚ್ಚಿಸಿರುವುದು ಇದಷ್ಟೇ ಅಲ್ಲ, ಚಿತ್ರರಂಗದ ಹಲವು ಕಲಾವಿದರು ಸತ್ಯ ಹರಿಶ್ಚಂದ್ರ ಚಿತ್ರವನ್ನು ಮೆಚ್ಚಿಕೊಂಡಿದ್ದಾರೆ. ಆ ಚಿತ್ರದ ಟ್ರೇಲರ್‍ನ್ನು ಶಿವಣ್ಣ ನೋಡಿದ್ದು ಕೂಡಾ ಆಕಸ್ಮಿಕ. ಕೆ.ಮಂಜು ಅವರಿಗೆ ಶಿವರಾಜ್ ಕುಮಾರ್‍ಗಾಗಿ ಚಿತ್ರವೊಂದನ್ನು ನಿರ್ಮಿಸಬೇಕು ಎಂಬ ಕನಸಿದೆ. ಹೀಗಾಗಿ ಸತ್ಯ ಹರಿಶ್ಚಂದ್ರ ಚಿತ್ರದ ನಿರ್ದೇಶಕ ದಯಾಳ್ ಜೊತೆ ಕಥೆಯೊಂದನ್ನು ಹೇಳಲು ಹೋಗಿದ್ದಾಗ, ಶಿವಣ್ಣ ಟ್ರೇಲರ್ ನೋಡುವ ಆಸೆ ಹೇಳಿಕೊಂಡಿದ್ದಾರೆ. ಚಿತ್ರದ ಟ್ರೇಲರ್ ನೋಡಿದ ನಂತರ, ದೀಪಾವಳಿಗೆ ಒಳ್ಳೆ ಸಿನಿಮಾ ಕೊಡುತ್ತಿದ್ದೀರಿ ಎಂದು ಹೊಗಳಿದರಂತೆ ಶಿವರಾಜ್ ಕುಮಾರ್. 

ಸಿನಿಮಾ ಮೇಕಿಂಗ್ ಶಿವಣ್ಣಗೆ ಇಷ್ಟವಾಗಿದೆ. ಶರಣ್, ಸಂಚಿತಾ ಪಡುಕೋಣೆ ಹಾಗೂ ಭಾವನಾ ರಾವ್ ಅಭಿನಯದ ಚಿತ್ರದಲ್ಲಿ ಸತ್ಯ ಮತ್ತು ಸುಳ್ಳಿನ ಕಥೆಯಿದೆ. ಅದನ್ನು ಹಾಸ್ಯದೊಂದಿಗೆ ಹೇಳಲಾಗಿದೆ. ಸತ್ಯ ಹರಿಶ್ಚಂದ್ರ ಈ ದೀಪಾವಳಿಗೆ ಪ್ರೇಕ್ಷಕರ ಎದೆಯಲ್ಲಿ ನಗೆಯ ಪಟಾಕಿ ಹಚ್ಚಲಿದ್ದಾನೆ.

ಯಾವುದೇ ಸಿನಿಮಾ ಬಿಡುಗಡೆಗೆ ಮುನ್ನವೇ ಸದ್ದು ಮಾಡಿದರೆ, ಮೊದಲು ಖುಷಿಯಾಗುವುದು ನಿರ್ಮಾಪಕ. ಏಕೆಂದರೆ, ಅವನು ಚಿತ್ರಕ್ಕೆ ಹಾಕಿದ ಬಂಡವಾಳ ವಾಪಸ್ಸು ಬರಲು ಶುರುವಾಗಿರುತ್ತೆ. ಈಗ ಹಾಗೆ ಖುಷಿಪಡುವ ಸರದಿ ಸತ್ಯ ಹರಿಶ್ಚಂದ್ರ ಚಿತ್ರದ ನಿರ್ಮಾಪಕ ಕೆ. ಮಂಜು ಅವರದ್ದು.

ಶರಣ್ ಅಭಿನಯದ ಸತ್ಯ ಹರಿಶ್ಚಂದ್ರ ಇನ್ನೂ ರಿಲೀಸ್ ಆಗಬೇಕಿದೆ. ಮುಂದಿನ ವಾರ ರಿಲೀಸ್ ಆಗುತ್ತಿರುವ ಈ ಸಿನಿಮಾದಿಂದ ಈಗಾಗಲೇ ಅರ್ಧ ದುಡ್ಡು ಬಂದಿದೆಯಂತೆ. ಟಿವಿ ರೈಟ್ಸ್‍ನಿಂದ 1.80 ಕೋಟಿ, ಆಡಿಯೋ ರೈಟ್ಸ್‍ನಿಂದ 15 ಲಕ್ಷ ಹಾಗೂ ಹಿಂದಿ ಡಬ್ಬಿಂಗ್ ರೈಟ್ಸ್‍ನಿಂದ 30 ಲಕ್ಷ ಬಂದಿದೆಯಂತೆ. ಹೀಗಾಗಿ ಚಿತ್ರ ಬಿಡುಗಡೆಗೂ ಮೊದಲೇ ನಾನು ಅರ್ಧ ಸೇಫ್ ಎಂದು ಹೇಳಿಕೊಂಡಿದ್ದಾರೆ ಮಂಜು. 

ಚಿತ್ರದ ವಿತರಣೆ ಹಕ್ಕು ಪಡೆದಿರುವುದು ಜಾಕ್ ಮಂಜು. ಬಿಡುಗಡೆಯಾಗುತ್ತಿರುವುದು ದೀಪಾವಳಿ ಟೈಮಲ್ಲಿ. ಹೀಗಾಗಿ ಲಾಭ ಕಟ್ಟಿಟ್ಟ ಬುತ್ತಿ ಎಂಬ ನಿರೀಕ್ಷೆಯಲ್ಲಿದ್ದಾರೆ ಸತ್ಯ ಹರಿಶ್ಚಂದ್ರನ ನಿರ್ಮಾಪಕ. 

ಸತ್ಯ ಹರಿಶ್ಚಂದ್ರ. ಇದೇ ದೀಪಾವಳಿಗೆ ತೆರೆಗೆ ಬರುತ್ತಿರುವ ಚಿತ್ರ. ಚಿತ್ರದ ಹೀರೋ ಶರಣ್, ನಾಯಕಿ ಭಾವನಾ ರಾವ್. ನಿರ್ದೇಶಕ ದಯಾಳ್ ಪದ್ಮನಾಭನ್. ನಿರ್ಮಾಪಕ ಕೆ.ಮಂಜು. ಈ ಇಷ್ಟೂ ಜನರ ಮಧ್ಯೆ ಇರೋ ಒಂದು ಕಾಮನ್ ವಿಷಯ.. ಇವರೆಲ್ಲರೂ ಸ್ನೇಹಿತರು.

ಸಿನಿಮಾವನ್ನು ರಿಲೀಸ್‍ಗೆ ಸಿದ್ಧಪಡಿಸಿರುವ ನಿರ್ದೇಶಕ ದಯಾಳ್ ಪದ್ಮನಾಭನ್ ಬಿಗ್‍ಬಾಸ್ ಮನೆ ಸೇರಿದ್ದಾರೆ. ವಿಶೇಷವೆಂದರೆ, ಶರಣ್ ಮತ್ತು ದಯಾಳ್ ಇಬ್ಬರೂ ಚಿತ್ರರಂಗಕ್ಕೆ ಬಂದಿದ್ದು ಒಂದೇ ಸಮಯದಲ್ಲಿ. ಇನ್ನು ಸತ್ಯ ಹರಿಶ್ಚಂದ್ರ ಚಿತ್ರದಲ್ಲಿ ಶರಣ್ ಅವರಿಂದ ಎಷ್ಟೋ ವಿಷಯಗಳನ್ನು ಕಲಿತೆ. ಒಳ್ಳೊಳ್ಳೆಯ ಮಾಹಿತಿ ಪಡೆದುಕೊಂಡೆ ಎಂದಿದ್ದಾರೆ ದಯಾಳ್.

ಇನ್ನು ಭಾವನಾ ರಾವ್ ಅವರು ಫೇಮಸ್ ಆಗಿದ್ದು ಗಾಳಿಪಟದ ಮೂಲಕ. ನಿರ್ದೇಶಕ ಯೋಗರಾಜ್ ಭಟ್ ಅವರಿಗೆ ಭಾವನಾ ರಾವ್ ಅವರನ್ನು ಪರಿಚಯಿಸಿದ್ದೇ ದಯಾಳ್. ಚಿತ್ರದ ನಿರ್ಮಾಪಕ ಕೆ.ಮಂಜು ಜೊತೆ ಈ ಹಿಮದೆ ಯಶ್‍ವಂತ್ ಸಿನಿಮಾ ಮಾಡಿದ್ದ ದಯಾಳ್, ಮಂಜು ಅವರಿಗೂ ಸ್ನೇಹಿತರು. 

ಹೀಗೆ ಸ್ನೇಹಿತರೆಲ್ಲ ಒಟ್ಟಾಗಿ ಸೇರಿ ಮಾಡಿರುವ ಸಿನಿಮಾ, ದೀಪಾವಳಿಗೆ ತೆರೆ ಕಾಣುತ್ತಿದೆ. ಅದು ಪಟಾಕಿಯಂತೆ ಸದ್ದು ಮಾಡಿ, ಸುರುಸುರು ಬತ್ತಿಯಂತೆ ಬೆಳಗಲಿ.

ಸತ್ಯ ಹರಿಶ್ಚಂದ್ರ ಚಿತ್ರದ ಕಥೆ ಏನು..? ಅಣ್ಣಾವ್ರ ಆ ಚಿತ್ರಕ್ಕೂ, ಶರಣ್‍ರ ಈ ಚಿತ್ರಕ್ಕೂ ಎಲ್ಲಾದರೂ ಹೋಲಿಕೆಯಿದೆಯೇ..? ಇಂಥ ಪ್ರಶ್ನೆಗಳಿಗೆ ಉತ್ತರ ಸಿಕ್ಕಿದೆ. ಚಿತ್ರದಲ್ಲಿ ಶರಣ್ ಅವರದ್ದು ಎನ್‍ಆರ್‍ಐ ಪಾತ್ರ. ಆತ ಬಾಯ್ಬಿಟ್ಟರೆ ಹೇಳೋದು ಸುಳ್ಳು. ಆ ಸುಳ್ಳೇ ಒಂದ್ಸಲ ಆತನ ಜೀವಕ್ಕೇ ಅಪಾಯ ತಂದುಬಿಡುತ್ತೆ. ಅದರಿಂದ ತಪ್ಪಿಸಿಕೊಳ್ಳಲು ಆತ ಏನು ಮಾಡ್ತಾನೆ..? ಸುಳ್ಳು ಹೇಳೋದ್ರಿಂದ ಉದ್ಭವವಾಗುವ ಸಮಸ್ಯೆಗಳು ಎಂಥವು..? ಇವುಗಳನ್ನೆಲ್ಲ ಪ್ರೇಮಕಥೆಯ ಮಸಾಲೆ ಜೊತೆ ಅದ್ಬುತವಾಗಿ ಹೇಳಿದ್ದಾರಂತೆ ದಯಾಳ್ ಪದ್ಮನಾಭನ್.

ಇದು ಸಿಂಗಾರ್ ವರ್ಸಸ್ ಕೌರ್ ಎಂಬ ಪಂಜಾಬಿ ಚಿತ್ರದ ರೀಮೇಕ್. ಚಿತ್ರದಲ್ಲಿ ಸಂಚಿತಾ ಪಡುಕೋಣೆ ಹಾಗೂ ಭಾವನಾ ರಾವ್ ನಾಯಕಿಯರು. ಭಾವನಾ ಅವರದ್ದು ಮುಗ್ಗ ಹುಡುಗಿಯ ಪಾತ್ರ. ಫೇಸ್‍ಬುಕ್‍ನಲ್ಲೇ ಲವ್ವಾಗಿ ಅವನನ್ನು ಹುಡುಕಿಕೊಂಡು ಯೂರೋಪ್‍ಗೆ ಹೋಗುವ ಪಾತ್ರ. ಚಿತ್ರದ ಕಥಾ ಹಂದರವಂತೂ ಕುತೂಹಲ ಹುಟ್ಟಿಸುತ್ತಿದೆ.

ಸಲೀಂ ಅನಾರ್ಕಲಿ ಅಮರ ಪ್ರೇಮಿಗಳು. ಈಗ ಆ ಅಮರ ಪ್ರೇಮಿಗಳ ವೇಷದಲ್ಲಿ.. ರೂಪದಲ್ಲಿ.. ಪ್ರೇಮದ ಟಾನಿಕ್ ಕೊಡಲು ಬಂದಿದ್ದಾರೆ ಶರಣ್ ಮತ್ತು ರಾಗಿಣಿ ದ್ವಿವೇದಿ. ಅಧ್ಯಕ್ಷ ಇನ್ ಅಮೆರಿಕ ಚಿತ್ರದಲ್ಲಿ ಅನ್ನೋದನ್ನು ಪ್ರತ್ಯೇಕವಾಗಿ ಹೇಳಬೇಕಿಲ್ಲ.

ಸಲೀಮ್ ಅನಾರ್ಕಲಿ ಗೋಡೆ ಕಟ್ಟೋ ಟೈಮಿನಲ್ಲಿ ಕಾಂಪೌಂಡ್ ಹಾರಿ ಓಡೋಗಿರ್ಬೋದು.. ಎನ್ನುವ ಹಾಡಿನ ಮೊದಲ ಸಾಲೇ ಕಾಮಿಡಿಯ ಪರಾಕಾಷ್ಠೆ ತೋರಿಸುತ್ತಿದೆ.

ಇಂತಹ ತರಲೆಯನ್ನು ಇನ್ಯಾರು ಅಕ್ಷರ ರೂಪಕ್ಕೆ ತಂದಿರಬಹುದು ಎಂಬ ಬಗ್ಗೆ ಅನುಮಾನವೇ ಬೇಡ. ಅದು ಯೋಗರಾಜ ಭಟ್ಟರ ಸಾಹಿತ್ಯ. ವಿ. ಹರಿಕೃಷ್ಣ ಸಂಗೀತದಲ್ಲಿ ಹಾಡಿಗೆ ಧ್ವನಿ ನೀಡಿರುವುದು ಸಂಚಿತ್ ಹೆಗ್ಡೆ. ಯೋಗಾನಂದ್ ಮದ್ದಾನ್ ನಿರ್ದೇಶನದ ಮೊದಲ ಚಿತ್ರವಿದು.

ಸತ್ಯ ಹರಿಶ್ಚಂದ್ರ. ಈತ ಮೊದಲೇ ಸುಳ್ಳು ಹೇಳೋ ಸತ್ಯ ಹರಿಶ್ಚಂದ್ರ. ಶರಣ್, ಸಂಚಿತಾ ಪಡುಕೋಣೆ, ಭಾವನಾ ರಾವ್ ಅಭಿನಯದ ಸತ್ಯ ಹರಿಶ್ಚಂದ್ರ ಇವತ್ತೇ ಥಿಯೇಟರಿಗೆ ಕಾಲಿಟ್ಟಿದೆ. ಆದರೆ, ಚಿತ್ರದ ನಿರ್ದೇಶಕ ದಯಾಳ್ ಪದ್ಮನಾಭ್ ಇಲ್ಲಿಲ್ಲ. 

ದಯಾಳ್, ಬಿಗ್‍ಬಾಸ್ ಮನೆ ಸೇರಿದ್ದಾರೆ. ನಿರ್ದೇಶಕರೇ ಇಲ್ಲದೆ ಚಿತ್ರದ ಪ್ರಚಾರ ಮಾಡುತ್ತಿದೆ ಚಿತ್ರತಂಡ. ಸಿನಿಮಾವನ್ನು ಯಶಸ್ವಿಯಾಗಿ ಮುಗಿಸಿಕೊಟ್ಟು, ಚಿತ್ರವನ್ನು ಥಿಯೇಟರಿಗೆ ಸೇರಿಸುವವರೆಗೂ ಕೆಲಸ ಮಾಡಿದ್ದ ದಯಾಳ್, ಸಿನಿಮಾ ರಿಲೀಸ್ ಆಗುವ ಕೆಲವೇ ದಿನಗಳ ಮುನ್ನ ಬಿಗ್‍ಬಾಸ್ ಮನೆ ಸೇರಿದ್ದಾರೆ. 

ಹಾಗೆಂದು ಚಿತ್ರಕ್ಕೇನೂ ಸಮಸ್ಯೆಯಾಗಿಲ್ಲ. ಚಿತ್ರ ಒಂದು ಹವಾ ಎಬ್ಬಿಸಿದೆ. ಥಿಯೇಟರಿಗೆ ನುಗ್ಗುತ್ತಿದೆ. ಪ್ರೇಕ್ಷಕರು ಥಯ್ಯಕುದಾ.. ಥಕತಯ್ಯೇ ಕುದಾ ಅನ್ನಬೇಕಷ್ಟೆ..

ಸಿಂಪಲ್ ಸುನಿ. ಸಿನಿಮಾ ನಿರ್ದೇಶಕರಷ್ಟೇ ಅಲ್ಲ, ಅಪ್ಪಟ ಕ್ರಿಕೆಟ್ ಪ್ರೇಮಿ. ರಣಜಿ ಕ್ರಿಕೆಟ್‍ನ್ನೂ ಬಿಡದೆ ಫಾಲೋ ಮಾಡುವ ಅಪ್ಪಟ ಕ್ರಿಕೆಟ್ ಅಭಿಮಾನಿ. ಸಹಜವಾಗಿಯೇ ಆರ್.ಸಿ.ಬಿ. ಫ್ಯಾನು. ವಿರಾಟ್ ಕೊಹ್ಲಿಗೆ ಕಟ್ಟರ್ ಫ್ಯಾನು. ಹೀಗಾಗಿ ಅವರು ಬುಧವಾರ ಒಂದು ಆಫರ್ ಬಿಟ್ಟಿದ್ದರು. ಚೆನ್ನೈ ಮತ್ತು ಆರ್‍ಸಿಬಿ ಮ್ಯಾಚ್‍ನಲ್ಲಿ ಕೊಹ್ಲಿ ಸೆಂಚುರಿ ಹೊಡೆದರೆ.. ಅವರ ಟ್ವೀಟ್‍ನ್ನು ರೀ ಟ್ವೀಟ್ ಮಾಡಿದವರಿಗೆಲ್ಲ ಅವತಾರ ಪುರುಷ ಟಿಕೆಟ್ ಫ್ರೀ ಎಂದಿದ್ದರು ಸುನಿ.

ಸುನಿ ನಿರ್ದೇಶನದ ಅವತಾರ ಪುರುಷ ಇದೇ ವಾರ ರಿಲೀಸ್. ಶರಣ್, ಅಶಿಕಾ ರಂಗನಾಥ್, ಶ್ರೀನಗರ ಕಿಟ್ಟಿ ಪ್ರಧಾನ ಪಾತ್ರದಲ್ಲಿರೋ ಚಿತ್ರದಲ್ಲಿ ಕಾಮಿಡಿ ಹಾರರ್ ಸಬ್ಜೆಕ್ಟ್ ಇದೆ. ಸುನಿಯವರ ಆಸೆ ಮತ್ತು ಆಫರ್‍ಗೆ ನಿರ್ಮಾಪಕ ಪುಷ್ಕರ ಮಲ್ಲಿಕಾರ್ಜುನಯ್ಯ ಅವರ ಸಪೋರ್ಟೂ ಇತ್ತು. ಆದರೆ.. ಫೈನಲಿ..

ಆರ್.ಸಿ.ಬಿ. ಮ್ಯಾಚ್ ಗೆಲ್ತು. ಇದೇ ಟೂರ್ನಿಯಲ್ಲಿ ಆಗಿದ್ದ ಸೋಲಿನ ಸೇಡು ತೀರಿಸಿಕೊಳ್ತು. ಆದರೆ ಕೊಹ್ಲಿ ಆಟ 30 ರನ್ನಿಗೇ ಮುಗಿದು ಹೋಯ್ತು. ಸೆಂಚುರಿಗೆ ಜಸ್ಟ್ 70 ರನ್ ಕಡಿಮೆ.

ಆದರೆ.. ಸುನಿ & ಆರ್.ಸಿಬಿ. ಅಭಿಮಾನಿಗಳು ಮಾತ್ರ..  ಐಪಿಎಲ್ ಅತ್ಲಾಗಿರಲಿ.. ಸಿನಿಮಾ ಸೂಪರ್ ಆಗಿ ಗೆಲ್ಲಲಿ ಎನ್ನುತ್ತಿದ್ದಾರೆ.

ನವೆಂಬರ್ 26ಕ್ಕೆ ಗಣೇಶ್, ನಿಶ್ವಿಕಾ ನಾಯ್ಡು ನಟಿಸಿರೋ ಸಖತ್ ರಿಲೀಸ್.

ಡಿಸೆಂಬರ್ 10ಕ್ಕೆ ಶರಣ್, ಆಶಿಕಾ ರಂಗನಾಥ್, ಶ್ರೀನಗರ ಕಿಟ್ಟಿ ಪ್ರಧಾನ ಪಾತ್ರದಲ್ಲಿರೋ ಅವತಾರ್ ಪುರುಷ ರಿಲೀಸ್.

ಎರಡೂ ಚಿತ್ರಗಳ ಡೈರೆಕ್ಟರ್ ಒಬ್ಬರೇ. ಸಿಂಪಲ್ ಸುನಿ. ಹಾಗಾಗಿಯೇ ಇದು ಡಬಲ್ ಪಟಾಕಿ.

ಸಖತ್ ಚಿತ್ರಕ್ಕೆ ನಿಶಾ ವೆಂಕಟ್ ಸೋಳಂಕಿ, ಸುಪ್ರೀತ್ ನಿರ್ಮಾಪಕರಾದರೆ, ಅವತಾರ್ ಪುರುಷ ಚಿತ್ರಕ್ಕೆ ಪುಷ್ಕರ್ ಮಲ್ಲಿಕಾರ್ಜುನಯ್ಯ ನಿರ್ಮಾಪಕರು.

ಸುನಿ ಕೈಚಳಕ ಇದ್ದ ಮೇಲೆ ನಗುವಿಗೆ ಬರವಿರಲ್ಲ. ಜೊತೆಗೆ ಸಖತ್ ಚಿತ್ರದಲ್ಲಿ ಗಣೇಶ್ ಹೀರೋ ಆದರೆ, ಅವತಾರ್ ಪುರುಷನಾಗಿರೋದು ಶರಣ್. ಅಲ್ಲಿಗೆ ನಗುವೂ ಡಬಲ್ ಪಟಾಕಿಯಂತೆ ಸಿಡಿಯಲಿದೆ.

ಇತ್ತೀಚೆಗೆ ಸೀಕ್ವೆಲ್ ಸ್ಟಾರ್ ಆಗುತ್ತಿರುವ ಶರಣ್ ಗಂಟಲಿಗೆ ಇನ್‍ಫೆಕ್ಷನ್ ಆಗಿದೆ. ಹೀಗಾಗಿಯೇ ಶರಣ್ ಅವರ ಅಧ್ಯಕ್ಷ ಇನ್ ಅಮೆರಿಕ ಚಿತ್ರದ ಡಬ್ಬಿಂಗ್‍ಗೆ ಬ್ರೇಕ್ ಬಿದ್ದಿದೆ. ಏಕೋ ಏನೋ ಗೊತ್ತಿಲ್ಲ. ಡಬ್ ಮಾಡುವಾಗ ನನ್ನ ಧ್ವನಿ ನನಗೇ ಕರ್ಕಶ ಎನ್ನಿಸೋಕೆ ಶುರುವಾಯ್ತು. ಹೀಗಾಗಿ ಡಬ್ಬಿಂಗ್‍ಗೆ ನಿಲ್ಲಿಸಿದ್ದೇವೆ ಎಂದಿದ್ದಾರೆ ಶರಣ್.

ಇತ್ತೀಚೆಗೆ ಶರಣ್ ಸೀಕ್ವೆಲ್ ಸ್ಟಾರ್ ಆಗುತ್ತಿದ್ದಾರೆ. ರ್ಯಾಂಬೋ-2, ವಿಕ್ಟರಿ 2 ನಂತರ ಈಗ ಅಧ್ಯಕ್ಷ ಇನ್ ಅಮೆರಿಕ ಶೂಟಿಂಗ್ ಮುಗಿಸಿದ್ದಾರೆ. ಇದು ಅಧ್ಯಕ್ಷ ಚಿತ್ರದ ಸೀಕ್ವೆಲ್. ಇವೆಲ್ಲ ಅವರದ್ದೇ ಚಿತ್ರದ ಸೀಕ್ವೆಲ್ ಆದರೆ, ಮುಂದಿನ ಸಿನಿಮಾ ಯೋಗರಾಜ್ ಭಟ್ಟರ ಗಾಳಿಪಟ 2. ಅದು ಭಟ್ಟರೇ ಮಾಡುತ್ತಿರುವ ಅವರ ಚಿತ್ರದ ಸೀಕ್ವೆಲ್. ಒಟ್ಟಿನಲ್ಲಿ ಶರಣ್ ಈಗ ಸೀಕ್ವೆಲ್ ಸ್ಟಾರ್.

ವಿಭಿನ್ನ ಪ್ರಯತ್ನಗಳಿಂದಲೇ ಯಶಸ್ಸನ್ನೂ ಪಡೆದು, ಹೆಸರು ಮಾಡುತ್ತಿರುವ ನಿರ್ಮಾಪಕ ಪುಷ್ಕರ್ ಮಲ್ಲಿಕಾರ್ಜುನಯ್ಯ, ಹೀಗೂ ಸಿನಿಮಾ ಮಾಡಿ ಗೆಲ್ಲಬಹುದು ಎಂದು ತೋರಿಸಿಕೊಟ್ಟ, ಹೊಸ ಜಾನರೆ ಸೃಷ್ಟಿಸಿದ ಸಿಂಪಲ್ ಸುನಿ, ಪ್ರೇಕ್ಷಕರನ್ನು ಡಿಸೈನ್ ಡಿಸೈನಾಗಿ ನಗಿಸಿ ಗೆಲ್ಲುತ್ತಿರುವ ಶರಣ್.. ಈ ಮೂವರೂ ಒಂದಾಗಿದ್ದಾರೆ. ಹೊಸ ಚಿತ್ರ ಮಾಡುತ್ತಿದ್ದಾರೆ. 

ಚಿತ್ರಕ್ಕೆ ಮಹಾಭಾರತದ ತ್ರಿಶಂಕು ಕಥೆಯೇ ಸ್ಫೂರ್ತಿ. ಸುನಿ ಮತ್ತು ಶರಣ್ ಜೊತೆ ಸಿನಿಮಾ ಮಾಡುತ್ತಿರುವುದಕ್ಕೆ ಭಾರಿ ಖುಷಿ ಇದೆ ಎಂದಿದ್ದಾರೆ ಪುಷ್ಕರ್ ಮಲ್ಲಿಕಾರ್ಜುನಯ್ಯ.

ಕಾಮಿಡಿ ಕಥೆಯೇ ಆದರೂ, ಇದು ನನ್ನ ರೆಗ್ಯುಲರ್ ಸಿನಿಮಾ ಅಲ್ಲ. ನನಗೆ ಇದೊಂದು ಸವಾಲಿನ ಪಾತ್ರ ಎಂದಿದ್ದಾರೆ ಶರಣ್. ಮಹಾಭಾರತದ ಕಥೆಯನ್ನಿಟ್ಟುಕೊಂಡು ಒಂದು ಮಜವಾದ ಕಥೆ ಹೇಳುತ್ತಿದ್ದೇನೆ ಎಂದಿದ್ದಾರೆ ಸುನಿ.

ಜನವರಿ 16ಕ್ಕೆ ಆ ಸಿನಿಮಾ ಸೆಟ್ಟೇರುತ್ತಿದೆ. ಜನವರಿ 20ಕ್ಕೆ ಸಿನಿಮಾ ಚಿತ್ರೀಕರಣ ಶುರುವಾಗಲಿದೆ.

ಕನ್ನಡ ಚಿತ್ರರಸಿಕರ ಅಧ್ಯಕ್ಷ ಶರಣ್, ಈಗ ಅವತಾರ ಪುರುಷನಾಗುತ್ತಿದ್ದಾರೆ. ಶರಣ್‍ರನ್ನು ಅವತಾರ ಪುರುಷನನ್ನಾಗಿಸಿರುವುದು ಸಿಂಪಲ್ ಸುನಿ. ಫೆಬ್ರವರಿ 6ನೇ ತಾರೀಕು ಅವರ ಹುಟ್ಟುಹಬ್ಬ. ಆದರೆ, ಶರಣ್ ಮನೆಯಲ್ಲಿ ಇರಲ್ಲ. ಹಾಗಾದ್ರೆ ಎಲ್ಲಿರ್ತಾರೆ..?

ನನಗೂ ಅಭಿಮಾನಿಗಳ ಜೊತೆ ಮನೆಯೆದುರೇ ಹುಟ್ಟುಹಬ್ಬ ಆಚರಿಸಿಕೊಳ್ಳಬೇಕು ಅನ್ನೋ ಆಸೆ ಇದೆ. ಯಾಕಂದ್ರೆ, ಅಭಿಮಾನಿಗಳೇ ನಾವು ಸಂಪಾದಿಸಿರುವ ಆಸ್ತಿ. ಆದರೆ, ಮೊದಲಿನಿಂದಲೂ ಹುಟ್ಟುಹಬ್ಬದ ದಿನ ಯಾವುದಾದರೂ ದೇವಸ್ಥಾನಕ್ಕೆ ಹೋಗುವ ಅಭ್ಯಾಸ ಬೆಳೆದುಕೊಂಡು ಬಂದಿದೆ. ಕುಟುಂಬ ಸಮೇತ ದೇವರ ಸನ್ನಿಧಿಯಲ್ಲೇ ಹುಟ್ಟುಹಬ್ಬ ಆಚರಿಸುತ್ತೇವೆ. ಕಳೆದ ವರ್ಷ ತಿರುಪತಿಗೆ ಹೋಗಿದ್ದೆವು. ಈ ಬಾರಿ ದಕ್ಷಿಣ ಕರ್ನಾಟಕದ ದೇವಸ್ಥಾನಗಳಿಗೆ ಹೊರಟಿದ್ದೇವೆ ಎಂದಿದ್ದಾರೆ ಶರಣ್.

ಶರಣ್ ಹುಟ್ಟುಹಬ್ಬಕ್ಕೆಂದೇ ಅವತಾರ ಪುರುಷ ಚಿತ್ರ ತಂಡ ವಿಶೇಷ ಟೀಸರ್ ರಿಲೀಸ್ ಮಾಡುತ್ತಿದೆ. ಅಷ್ಟದಿಗ್ಬಂದನ ಮಂಡಲಕ ಅನ್ನೋ ಸ್ಪೆಷಲ್ ಟೈಟಲ್ ಕೊಟ್ಟಿರೋ ಸುನಿ ಮತ್ತು ಪುಷ್ಕರ್ ಮಲ್ಲಿಕಾರ್ಜುನಯ್ಯ, ಶರಣ್ ಹುಟ್ಟುಹಬ್ಬವನ್ನು ದೊಡ್ಡ ಮಟ್ಟದಲ್ಲೇ ಸೆಲಬ್ರೇಟ್ ಮಾಡುತ್ತಿದ್ದಾರೆ.