ಲವ್ 360. ಪ್ರೇಕ್ಷಕರಿಗೆ ಪ್ರೀತಿಯ ಬೇರೆಯದೇ ಅನುಭವ ನೀಡಿದ ಚಿತ್ರ. ಒಲವೇ ನೀನು ಗೆಳತಿಯೇ.. ಹಾಡಂತೂ ಪ್ರೇಕ್ಷಕರಿಗೆ ಸಿಕ್ಕಾಪಟ್ಟೆ ಇಷ್ಟವಾಗಿ ಹೋಗಿತ್ತು. ರಚನಾ ಇಂದರ್ ಮತ್ತು ಪ್ರವೀಣ್ ಅಭಿನಯದ ಸಿನಿಮಾ ಪ್ರೀತಿಯ ಬೇರೊಂದು ಎತ್ತರವನ್ನು ತೋರಿಸಿತ್ತು. ಆರಂಭದಲ್ಲಿ ಸೋಲಿನ ಸುಳಿಗೆ ಸಿಲುಕಿದ್ದ ಚಿತ್ರ, ಶಶಾಂಕ್ ಮನವಿಯ ನಂತರ ಮೇಲೆದ್ದಿತ್ತು. ಸಿನಿಮಾ ಲಾಭದ ಹಳಿಗೆ ಬಂದಿತ್ತು.

ಲವ್ 360 ಸಿನಿಮಾ ಕೈ ಕಚ್ಚಲಿಲ್ಲ. ನಷ್ಟವಂತೂ ಆಗಲಿಲ್ಲ. ಸಿನಿಮಾ ಬಿಡುಗಡೆಗೆ ಮುನ್ನವೇ ಹಾಕಿದ ಬಂಡವಾಳದ ಶೇ.75ರಷ್ಟು ಹಣ ಬಂದಿತ್ತು. ಉಳಿದ ಶೇ.25ರಷ್ಟು ಬಂಡವಾಳ ಥಿಯೇಟರಿಂದ ಬರಬೇಕಿತ್ತು. 2ನೇ ವಾರ ಚಿತ್ರ ಪಿಕಪ್ ಆಯಿತು. ಆದರೆ.. ಹಾಕಿದ ಶ್ರಮಕ್ಕೆ ತಕ್ಕ ಪ್ರತಿಫಲ ಸಿಗಲಿಲ್ಲ ಅನ್ನೋದಷ್ಟೇ ಬೇಸರ ಎನ್ನುತ್ತಾರೆ ಶಶಾಂಕ್.

ಲವ್ 360 ಮುಗಿದ ಬೆನ್ನಲ್ಲೇ ಡಾರ್ಲಿಂಗ್ ಕೃಷ್ಣ ಜೊತೆ ಮೊದಲೇ ಘೋಷಿಸಿದ್ದಂತೆ ಹೊಸ ಚಿತ್ರ ಘೋಷಣೆ ಮಾಡಿದ್ದಾರೆ. ಇನ್ನೊಂದೆರಡು ಮೂರು ದಿನಗಳಲ್ಲಿ ನಾಯಕಿಯ ಫೈನಲೈಸ್ ಮಾಡುತ್ತೇವೆ. ಇದು ನನ್ನ ಬ್ಯಾನರ್‍ನಲ್ಲೇ ತಯಾರಾಗುವ ಸಿನಿಮಾ. ಕ್ಯಾನ್‍ವಾಸ್ ದೊಡ್ಡದು. ಅದ್ಧೂರಿ ಬಜೆಟ್ ಅಂತೂ ಇರುತ್ತೆ ಎಂದಿದ್ದಾರೆ ಶಶಾಂಕ್.

ಲವ್ 360. ಈಗ ಥಿಯೇಟರಿನಲ್ಲಿರೋ ಸಿನಿಮಾ. ಈ ಸಿನಿಮಾಗು ಕ್ರಿಕೆಟ್ ಲೋಕದ ದಂತಕಥೆ ಎಬಿ ಡಿವಿಲಿಯರ್ಸ್‍ಗೂ ಏನು ಸಂಬಂಧ ಎಂದು ತಲೆಗೆ ಹುಳ ಬಿಟ್ಕೋಬೇಡಿ. ಅದನ್ನ ಖುದ್ದು ಶಶಾಂಕ್ ಅವರೇ ಹೇಳಿಕೊಂಡಿದ್ದಾರೆ.

ಹೇಳಿಕೇಳಿ ಶಶಾಂಕ್ 14 ವರ್ಷಗಳ ನಂತರ ಹೊಸಬರಿಗಾಗಿ ನಿರ್ದೇಶಿಸಿರೋ ಸಿನಿಮಾ ಲವ್ 360. ಮೊಗ್ಗಿನ ಮನಸ್ಸು ಚಿತ್ರದಲ್ಲಿ ಯಶ್-ರಾಧಿಕಾ ಪಂಡಿತ್‍ರನ್ನು ತೆರೆಗೆ ತಂದು ಗೆಲ್ಲಿಸಿದ್ದು ಇವರೇ. ಈಗ 14 ವರ್ಷಗಳ ನಂತರ ಮತ್ತೊಮ್ಮೆ ಹೊಸಬರ ಚಿತ್ರ ಸಿದ್ಧ ಮಾಡಿದ್ದಾರೆ. ಲವ್ 360.

ಈ ಚಿತ್ರದಲ್ಲೂ ಅಷ್ಟೆ, ಹೀರೋ ಪ್ರವೀಣ್ ಅವರನ್ನು ಖುದ್ದು ಶಶಾಂಕ್ ಅವರೇ ಪರಿಚಯಿಸುತ್ತಿದ್ದಾರೆ. ನಾಯಕಿ ರಚನಾ ಇಂದರ್ ಹೆಂಗೆ ನಾವು ಖ್ಯಾತಿಯ ಚೆಲುವೆ. ಎರಡು ಚಿತ್ರಗಳಲ್ಲಿ ನಟಿಸಿದ್ದರೂ ಚಿತ್ರರಂಗದ ಮಟ್ಟಿಗೆ ಹೊಸ ಮುಖವೇ.

ಚಿತ್ರದಲ್ಲಿ ಲವ್ ಸ್ಟೋರಿ ಜೊತೆ ಕ್ರೈಂ, ಥ್ರಿಲ್ಲರ್ ಕೂಡಾ ಇದೆ. ಹೀಗಾಗಿ ಚಿತ್ರಕ್ಕೆ ಯಾವ ಟೈಟಲ್ ಇಡಬೇಕು ಎಂದು ಯೋಚಿಸುತ್ತಿದ್ದಾಗ ಕಣ್ಣ ಮುಂದೆ ಬಂದಿದ್ದು ಎಬಿಡಿ. ಕ್ರಿಕೆಟ್‍ನಲ್ಲಿ ಅವರನ್ನ ಮಿಸ್ಟರ್ 360 ಎಂದು ಕರೆಯುತ್ತಾರೆ. ಅದನ್ನೇ ಸ್ಫೂರ್ತಿಯಾಗಿಟ್ಟುಕೊಂಡು ಲವ್ 360 ಅನ್ನೋ ಟೈಟಲ್ ಇಟ್ಟೆ ಎಂದಿದ್ದಾರೆ ಶಶಾಂಕ್.

ಎಬಿಡಿ ಹೇಗೆ ಮೈದಾನದ ಎಲ್ಲ ಮೂಲೆಗಳಿಗೂ.. ಎಂತಹುದೇ ಬಾಲಿಗೂ ಹೊಡೆಯುತ್ತಾರೋ..  ಅದೇ ರೀತಿ ಚಿತ್ರದ ಲವ್ ಸ್ಟೋರಿ. ನಾಯಕ ನಾಯಕಿಯನ್ನು ಹೇಗೇ ಇದ್ದರೂ ಪ್ರೀತಿಸುತ್ತಾನೆ ಎನ್ನುತ್ತಾರೆ ಶಶಾಂಕ್. ಚಿತ್ರವನ್ನು ಅರ್ಜುನ್ ಜನ್ಯ ಮ್ಯೂಸಿಕ್ ಮತ್ತು ಅಭಿಲಾಷ್ ಕಳತಿಯವರ ಸಿನಿಮಾಟೋಗ್ರಫಿ ಚಿತ್ರವನ್ನು ಇನ್ನೊಂದು ಲೆವೆಲ್ಲಿಗೆ ಏರಿಸಿದೆ ಎಂದು ಖುಷಿಯಾಗಿದ್ದಾರೆ ನಿರ್ಮಾಪಕರೂ ಆಗಿರುವ ಶಶಾಂಕ್.

ಲವ್ 360 ಚಿತ್ರ ಈ ಶುಕ್ರವಾರ ಬಿಡುಗಡೆಯಾಗಿರುವ ಸಿನಿಮಾ. ಶಶಾಂಕ್ ನಿರ್ದೇಶನದ ಲವ್ 360 ಚಿತ್ರದಲ್ಲಿ ನಟಿಸಿರುವುದು ಪ್ರವೀಣ್ ಎಂಬ ಹೊಸ ಹುಡುಗ ಮತ್ತು ಹೆಂಗೆ ನಾವು ಖ್ಯಾತಿಯ ರಚನಾ ಇಂದರ್. ಬಿಡುಗಡೆಗೂ ಮುನ್ನ ಜಗವೇ ನೀನು ಗೆಳತಿಯೇ ಹಾಡು ಸೂಪರ್ ಹಿಟ್ ಎನಿಸಿಕೊಂಡಿತ್ತು. ಚಿತ್ರದ ಹಾಡುಗಳೆಲ್ಲ ಹಿಟ್ ಆಗಿದ್ದವು. ಶಿವಣ್ಣ, ಉಪೇಂದ್ರ, ಸುದೀಪ್ ಚಿತ್ರದ ಹಾಡುಗಳನ್ನು ರಿಲೀಸ್ ಮಾಡಿಕೊಟ್ಟಿದ್ದರು. ಇಷ್ಟೆಲ್ಲ ಆಗಿಯೂ ಚಿತ್ರಕ್ಕೆ ಅಂದುಕೊಂಡಿದ್ದ ಓಪನಿಂಗ್ ಸಿಗಲಿಲ್ಲ. ಚಿತ್ರದ ಬಗ್ಗೆ ಪಾಸಿಟಿವ್ ವಿಮರ್ಶೆಗಳು ಬಂದವಾದರೂ ಪ್ರೇಕ್ಷಕರ ಸಂಖ್ಯೆ ಏರಲಿಲ್ಲ.

ಲವ್ 360 ಚಿತ್ರಕ್ಕೆ ಗಾಳಿಪಟ 2 ಟೀಂ ಬೆಂಬಲ ನೀಡಿರುವುದು ವಿಶೇಷ. ಇದು ಹೊಸಬರ ಚಿತ್ರ. ಈ ಹಿಂದೆಯೂ ನಾನು ಹೊಸಬರೊಂದಿಗೆ ಸಿನಿಮಾ ಮಾಡಿದ್ದಾಗ ಪ್ರೇಕ್ಷಕರು ಕೈ ಹಿಡಿದಿದ್ದರು. ಹೊಸಬರಿದ್ದ ಕಾರಣ ಹೌಸ್‍ಫುಲ್ ನಿರೀಕ್ಷೆ ಇರಲಿಲ್ಲ. ಆದರೆ ಪಿಕಪ್ ಆಗುವ ಭರವಸೆ ಇತ್ತು. ಆದರೆ ವೀರೇಶ್ ಚಿತ್ರಮಂದಿರ ಹೊರತುಪಡಿಸಿದರೆ ಬೇರೆ ಕಡೆ ನಿರೀಕ್ಷಿತ ಮಟ್ಟದಲ್ಲಿ ಪ್ರೇಕ್ಷಕರು ಬರುತ್ತಿಲ್ಲ. ಹೀಗೇ ಆದರೆ ಥಿಯೇಟರ್ ಕಳೆದುಕೊಳ್ಳುತ್ತೇವೆ. ದಯವಿಟ್ಟು ಒಳ್ಳೆಯ ಚಿತ್ರವನ್ನು ಪ್ರೀತಿಸಿ.. ನೋಡಿ.. ಪ್ರೋತ್ಸಾಹಿಸಿ ಎಂದಿದ್ದಾರೆ ನಿರ್ದೇಶಕ ಶಶಾಂಕ್.

ಚಿತ್ರವನ್ನು ನೋಡಿ ಬಂದ ಪ್ರೇಕ್ಷಕರೇನೋ ಚಿತ್ರವನ್ನು ಮೆಚ್ಚಿಕೊಂಡಿದ್ದಾರೆ. ವಿಶೇಷವೆಂದರೆ ಶಶಾಂಕ್ ಚಿತ್ರಕ್ಕೆ ಗಾಳಿಪಟ 2 ಟೀಂ ಬೆಂಬಲ ಮತ್ತು ಬಲ ನೀಡಿರುವುದು. ನಿರ್ದೇಶಕ ಯೋಗರಾಜ್ ಭಟ್, ನಿರ್ಮಾಪಕ ರಮೇಶ್ ರೆಡ್ಡಿ ಸೇರಿದಂತೆ  ಇಡೀ ಗಾಳಿಪಟ 2 ಚಿತ್ರತಂಡ ಲವ್ 360 ಸಿನಿಮಾ ನೋಡಿ. ಒಂದೊಳ್ಳೆ ಸಿನಿಮಾ ಸೋಲಬಾರದು. ಗೆಲ್ಲಿಸುವ ಹೊಣೆ ಪ್ರೇಕ್ಷಕರದ್ದು ಎಂದು ಮನವಿ ಮಾಡಿದೆ. ಹಾಗೆ ನೋಡಿದರೆ ಗಾಳಿಪಟ 2ಗೆ ಥಿಯೇಟರುಗಳಲ್ಲಿ ಎದುರಾಳಿ ಲವ್ 360.  ಎರಡೂ ಚಿತ್ರಗಳು ಕ್ಲಾಷ್ ಆಗಬಾರದೆಂದು ಮಾತನಾಡಿಕೊಂಡೇ ಒಂದು ವಾರ್ ಗ್ಯಾಪ್ ತೆಗೆದುಕೊಂಡು ರಿಲೀಸ್ ಆದ ಚಿತ್ರಗಳು. ಗಾಳಿಪಟ 2 ಚಿತ್ರದ ಬಗ್ಗೆ ಖುದ್ದು ಶಶಾಂಕ್ ಕೂಡಾ ಪ್ರೀತಿಯ ಮಾತುಗಳನ್ನಾಡಿದ್ದರು. ಈಗ ಗಾಳಿಪಟ 2 ಟೀಂ ಕೂಡಾ ಲವ್ 360 ಚಿತ್ರವನ್ನು ನೋಡಿ ಎಂದು ಮನವಿ ಮಾಡಿದೆ.

ಶಶಾಂಕ್ ಚಿತ್ರಗಳಲ್ಲಿ ಲವ್ ಸ್ಟೋರಿ ಇದೆ ಎಂದರೆ, ಮುದ್ದಾದ ಕಥೆಯೂ ಇರುತ್ತೆ ಎಂದರ್ಥ. ಅದನ್ನು ಈ ಈಗಾಗಲೇ ಸಾಬೀತು ಮಾಡಿರುವ ಶಶಾಂಕ್ ಅವರಿಗೀಗ ಒಬ್ಬ ವಿಲನ್ ಸಿಕ್ಕಿದ್ದಾರೆ. ಅದೂ ಲೇಡಿ ವಿಲನ್. ನೋಡೋಕೆ ಮುದ್ದು ಮುದ್ದಾಗಿರುವ ವಿಲನ್. ಹೆಸರು ಕಾವ್ಯಾ ಶಾಸ್ತ್ರಿ.

ಇತ್ತೀಚೆಗೆ ಕ್ಯಾನ್ಸರ್ ರೋಗಿಗಳಿಗಾಗಿ ತಮ್ಮ ಉದ್ದನೆಯ ಕೂದಲನ್ನು ಕಟ್ ಮಾಡಿಸಿದ್ದ ಕಾವ್ಯಾ ಶೆಟ್ಟಿ, ಬಾಬ್ ಕಟ್‍ನಲ್ಲಿರೋ ಫೋಟೋವನ್ನು ತಮ್ಮ ಪೇಜಿನಲ್ಲಿ ಹಾಕಿದ್ದರು. ಅದರಿಂದಲೇ ಇಂಪ್ರೆಸ್ ಆದ ಶಶಾಂಕ್ ಅವರು ಕಾವ್ಯಾ ಶಾಸ್ತ್ರಿಯವರನ್ನು ಕರೆಸಿಕೊಂಡು ಕಥೆ ಹೇಳಿದ್ದಾರೆ.

ನೆಗೆಟಿವ್ ರೋಲ್ ಮಾಡಬೇಕು ಅನ್ನೋದು ಪ್ರತಿ ಕಲಾವಿದೆಯ ಕನಸು. ಅಲ್ಲಿ ನಟನೆಗೆ ಸ್ಕೋಪ್ ಜಾಸ್ತಿ ಇರುತ್ತೆ. ಇದೂವರೆಗೆ ನಾನು ಗ್ಲಾಮರಸ್ ಅಥವಾ ನೆಗೆಟಿವ್ ರೋಲ್‍ನಲ್ಲಿ ನಟಿಸಿಯೇ ಇಲ್ಲ. ಸಂಪ್ರದಾಯಬದ್ಧ ಪಾತ್ರಗಳಲ್ಲೇ ಹೆಚ್ಚು ಕಾಣಿಸಿಕೊಂಡಿದ್ದೆ. ಹೀಗಾಗಿ ಶಶಾಂಕ್ ಈ ಕಥೆ ಹೇಳಿದಾಗ ತಕ್ಷಣ ಓಕೆ ಎಂದುಬಿಟ್ಟೆ ಎಂದಿದ್ದಾರೆ ಕಾವ್ಯಾ ಶೆಟ್ಟಿ.

ಶಶಾಂಕ್ ಈ ಚಿತ್ರದಲ್ಲಿ ಪ್ರವೀಣ್ ಎಂಬ ಹುಡುಗನನ್ನು ಹೀರೋ ಆಗಿ ಪರಿಚಯಿಸುತ್ತಿದ್ದಾರೆ. ರಚನಾ ಇಂಧರ್ ನಾಯಕಿ.