` sudeep - chitraloka.com | Kannada Movie News, Reviews | Image

sudeep

  • ಕಿಚ್ಚನ ಮನವಿಗೆ ಸ್ಪಂದಿಸಿದ ಮುಖ್ಯಮಂತ್ರಿ

    cm sidaramaiah, sudeep image

    ಇತ್ತೀಚೆಗೆ ಕಿಚ್ಚ ಸುದೀಪ್ ಮುಖ್ಯಮಂತ್ರಿ ಸಿದ್ದರಾಮಯ್ಯನವರನ್ನು ಭೇಟಿ ಮಾಡಿ ವಿಷ್ನು ಸಮಾಧಿ ಅಭಿವೃದ್ಧಿಯ ಕುರಿತು ಮಾತನಾಡಿದ್ದರು. ವಿಷ್ಣು ಅವರ ಸಮಾಧಿ ಸ್ಥಳವನ್ನು ಪುಣ್ಯಭೂಮಿ ಎಂದು ಘೋಷಿಸಿ, ಅಭಿವೃದ್ಧಿಯ ಜವಾಬ್ದಾರಿಯನ್ನು ಅಭಿಮಾನಿಗಳಿಗೇ ಕೊಟ್ಟರೂ ನಿರ್ವಹಿಸುತ್ತೇವೆ ಎಂದು ಹೇಳಿದ್ದರು. ವಿಷ್ಣು ಸ್ಮಾರಕ ನಿರ್ಮಾಣದ ಯೋಜನೆಗೆ ಯಾವುದೇ ವಿರೋಧವಿಲ್ಲ ಎಂದು ಸ್ಪಷ್ಟಪಡಿಸಿದ್ದ ಸುದೀಪ್, ವಿಷ್ಣು ಅವರ ಸಮಾಧಿ ಸ್ಥಳ ಅಭಿವೃದ್ಧಿಯಾಗದೇ ಇರುವುದಕ್ಕೆ ಬೇಸರ ವ್ಯಕ್ತಪಡಿಸಿದ್ದರು.

    ಸುದೀಪ್ ಅವರ ಮನವಿಗೆ ತಕ್ಷಣ ಸ್ಪಂದಿಸಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ, ತಮ್ಮ ಅಪರ ಕಾರ್ಯದರ್ಶಿ ಡಾ.ಸಿಂಧೆ ಭೀಮಸೇನ ರಾವ್ ಅವರಿಗೆ ಈ ಕುರಿತು ಪರಿಶೀಲಿಸುವಂತೆ ಸೂಚನೆ ಕೊಟ್ಟಿದ್ದಾರೆ. ಡಾ.ವಿಷ್ಣುವರ್ಧನ ಪುಣ್ಯಭೂಮಿ ಅಭಿವೃದ್ಧಿ ಕುರಿತು ಸಿಎಂ ಸೂಚನೆ ನೀಡಿದ್ದು, ತಮ್ಮ ಅರ್ಜಿಯನ್ನು ಪರಿಶೀಲಿಸುತ್ತಿದ್ದೇವೆ ಎಂದು ಸ್ವತಃ ಭೀಮಸೇನ ರಾವ್ ಸುದೀಪ್ ಅವರಿಗೆ ಪತ್ರ ಬರೆದಿದ್ದಾರೆ. 

    ತುರ್ತಾಗಿ ಕ್ರಮ ತೆಗೆದುಕೊಂಡ ಮುಖ್ಯಮಂತ್ರಿಗಳಿಗೆ ಸುದೀಪ್ ಧನ್ಯವಾದ ಅರ್ಪಿಸಿದ್ದಾರೆ.ವಿಷ್ಣು ಅಭಿಮಾನಿಗಳಾದ ನಮಗೆಲ್ಲ ಇದು ಅವಿಸ್ಮರಣೀಯ ಕ್ಷಣ ಎಂದು ಹೇಳಿಕೊಂಡಿದ್ದಾರೆ ಸುದೀಪ್.

  • ಕಿಚ್ಚನ ಹುಟ್ಟುಹಬ್ಬಕ್ಕೆ 3 ಉಡುಗೊರೆ

    sudeep birthday gifts

    ಕಿಚ್ಚ ಸುದೀಪ್ ಈ ಬಾರಿ ಹುಟ್ಟುಹಬ್ಬವನ್ನು ಅಭಿಮಾನಿಗಳ ಜೊತೆಯಲ್ಲೇ ಆಚರಿಸಿಕೊಳ್ಳಲು ನಿರ್ಧರಿಸಿದ್ದಾರೆ. ಇದರ ಜೊತೆಯಲ್ಲೇ ಸುದೀಪ್ ಅವರಿಗೆ 3 ಉಡುಗೊರೆಗಳು ಕಾದಿವೆ. ಅದು ಚಿತ್ರತಂಡದವರಿಂದ.

    ಸುದೀಪ್ ಹುಟ್ಟುಹಬ್ಬಕ್ಕೆ ಅಂಬಿ ನಿಂಗೆ ವಯಸ್ಸಾಯ್ತೋ ಚಿತ್ರತಂಡ, ಒಂದು ಹಾಡನ್ನು ರಿಲೀಸ್ ಮಾಡುತ್ತಿದೆ. ಪೈಲ್ವಾನ್ ಹಾಗೂ ಕೋಟಿಗೊಬ್ಬ-3 ಚಿತ್ರತಂಡಗಳು ಟೀಸರ್ ಬಿಡುಗಡೆ ಮಾಡುತ್ತಿವೆ. ಒಬ್ಬ ನಟನಾಗಿ ನನಗೆ ಹಾಗೂ ನನ್ನ ಅಭಿಮಾನಿಗಳಿಗೆ ಇದು ಸಂಭ್ರಮದ ಸಮಯ ಎಂದು ಖುಷಿ ಹಂಚಿಕೊಂಡಿದ್ದಾರೆ ಸುದೀಪ್.

  • ಕಿಚ್ಚನ ಹುಟ್ಟುಹಬ್ಬಕ್ಕೆ ಬನ್ನಿ. ಷರತ್ತುಗಳು ಅನ್ವಯ..

    sudeep to celebrate hi birthday with fans this year

    ಕಳೆದ ವರ್ಷದ ಹುಟ್ಟುಹಬ್ಬವನ್ನು ಮನೆಯಿಂದ ಹೊರಗಿದ್ದು, ಅಭಿಮಾನಿಗಳಿಂದ ದೂರವಿದ್ದು ಆಚರಿಸಿಕೊಂಡಿದ್ದ ಕಿಚ್ಚ ಸುದೀಪ್, ಈ ಬಾರಿ ಅಭಿಮಾನಿಗಳ ಜೊತೆಯಲ್ಲೇ ಹುಟ್ಟುಹಬ್ಬ ಆಚರಿಸುತ್ತಿದ್ದಾರೆ. ಕಳೆದ ವರ್ಷ, ಹುಟ್ಟುಹಬ್ಬಕ್ಕೆಂದು ಮಾಡುವ ವೆಚ್ಚವನ್ನು ಯಾವುದಾದರೂ ಸಮಾಜ ಸೇವಾ ಕಾರ್ಯಗಳಿಗೆ ಬಳಸಿ ಎಂದು ಅಭಿಮಾನಿಗಳಲ್ಲಿ ಮನವಿ ಮಾಡಿಕೊಂಡಿದ್ದರು. ಆದರೆ, ಈ ಬಾರಿ ಮತ್ತೊಮ್ಮೆ ಅಭಿಮಾನಿಗಳ ಜೊತೆಗೇ ಹುಟ್ಟುಹಬ್ಬ ಆಚರಿಸುತ್ತಿದ್ದಾರೆ. ಕಾರಣ, ಬೇರೆ ಯಾರೂ ಅಲ್ಲ. ಅಭಿಮಾನಿಗಳೇ.

    ಸುದೀಪ್ ಎಲ್ಲೇ ಹೋಗಲೀ.. ಎಲ್ಲೆಡೆ ಅಭಿಮಾನಿಗಳದ್ದು ಒಂದೇ ಪ್ರಶ್ನೆಯಾಗಿತ್ತು. ನಮ್ಮ ಜೊತೆ ಹುಟ್ಟುಹಬ್ಬ ಆಚರಿಸಿ ಎಂದು ಪಟ್ಟು ಹಿಡಿಯುತ್ತಿದ್ದ ಅಭಿಮಾನಿಗಳು, ಸುದೀಪ್ ಓಕೆ ಎನ್ನುವವರೆಗೆ ಬಿಡುತ್ತಿರಲಿಲ್ಲ. ಕೊನೆಗೂ ಅಭಿಮಾನಿಗಳ ಎದುರು, ಸುದೀಪ್ ಶರಣಾಗಿದ್ದಾರೆ. ಆದರೆ, ಕೆಲವು ಷರತ್ತುಗಳನ್ನು ವಿಧಿಸಿದ್ದಾರೆ.

    ಸುದೀಪ್ ಹುಟ್ಟುಹಬ್ಬಕ್ಕೆ ಹೋಗುವವರು ಯಾವುದೇ ಹಾರ, ತುರಾಯಿ, ಕೇಕು ತೆಗೆದುಕೊಂಡು ಹೋಗುವಂತಿಲ್ಲ. ಉಡುಗೊರೆ ತೆಗೆದುಕೊಂಡು ಹೋಗುವಂತಿಲ್ಲ. ಬರೀ ಕೈಯ್ಯಲ್ಲಿ ಹೋಗಬೇಕು. ಶುಭಾಶಯ ಹೇಳಬೇಕು. ಅಷ್ಟೆ.. ಇದು ಸುದೀಪ್ ಅಭಿಮಾನಿಗಳಿಗೆ ವಿಧಿಸಿರುವ ಷರತ್ತು.

    ಅದಕ್ಕೆ ಕಾರಣವೂ ಇದೆ. ಹುಟ್ಟುಹಬ್ಬಕ್ಕೆಂದು ಬರುವವರು ನೂರಾರು ಕೆಜಿ ಕೇಕ್ ತಂದು, ಸ್ವಲ್ಪ ತಿಂದು ಮಿಕ್ಕಿದ್ದನ್ನು ರಸ್ತೆಯಲ್ಲಿ ಎಸೆದು ಹೋಗುತ್ತಾರೆ. ಹಾಗೆ ರಸ್ತೆಯಲ್ಲಿ ಎಸೆದು ಹೋದ ಕೇಕ್‍ನ್ನು ಅಪಾರ್ಟ್‍ಮೆಂಟ್‍ವೊಂದರಲ್ಲಿ ಕೆಲಸ ಮಾಡುತ್ತಿದ್ದವರ ಮಗಳು ತಿನ್ನುತ್ತಿದ್ದುದು ಆಕಸ್ಮಿಕವಾಗಿ ಸುದೀಪ್ ಕಣ್ಣಿಗೆ ಬಿದ್ದಿದೆ. ಸುದೀಪ್ ಮನಸ್ಸು ಕಲಕಿದೆ. ಹೀಗಾಗಿಯೇ ಅದನ್ನು ವೇಸ್ಟ್ ಮಾಡುವ ಬದಲು, ಹಸಿದಿರುವವರಿಗೆ ನೀಡಿ ಎಂದು ಮನವಿ ಮಾಡಿದ್ದರು ಸುದೀಪ್. 

    ಈ ಬಾರಿ ಅಭಿಮಾನಿಗಳ ಜೊತೆ ಸುದೀಪ್ ಇರುತ್ತಾರೇನೋ ಹೌದು. ಆದರೆ, ಸರಳವಾಗಿ ಆಚರಿಸಬೇಕು. ಶುಭಾಶಯಕ್ಕಷ್ಟೇ ಸೀಮಿತವಾಗಿರಬೇಕು. ಅಂದಹಾಗೆ.. ಸುದೀಪ್ ಹುಟ್ಟುಹಬ್ಬ ಸೆಪ್ಟೆಂಬರ್ 2ರಂದು.

  • ಕಿಚ್ಚನನ್ನು ಜಿಮ್‍ಗೆ ಕಳಿಸಿದ್ದೇ ಇವರು..!

    sudeep's intense workout for pailwan

    ಕಿಚ್ಚ ಸುದೀಪ್, ಒಂದು ಲೆಕ್ಕಾಚಾರದಲ್ಲಿ  ಜಿಮ್ ದ್ವೇಷಿ ಎಂದರೂ ತಪ್ಪಲ್ಲ. ಫಿಟ್‍ನೆಸ್‍ಗೆ ಎಷ್ಟು ಬೇಕೋ ಅಷ್ಟು ವ್ಯಾಯಾಮ ಮಾಡಿದರೆ ಸಾಕು ಎನ್ನುತ್ತಿದ್ದ ಸುದೀಪ್, ಈಗ ಸಿಕ್ಸ್‍ಪ್ಯಾಕ್ ಬೆನ್ನು ಹತ್ತಿದ್ದಾರೆ. ಹಾಗಂತ ಸುದೀಪ್‍ರನ್ನು ಜಿಮ್‍ಗೆ ಹೋಗುವಂತೆ ಮಾಡಿದ್ದು ನಿರ್ದೇಶಕ ಕೃಷ್ಣ ಒಬ್ಬರೇ ಎಂದುಕೊಂಡರೆ ಅದು ತಪ್ಪಾದೀತು. ಪೈಲ್ವಾನ್ ಚಿತ್ರದ ಸ್ಕ್ರಿಪ್ಟ್‍ನ ಜೊತೆಯಲ್ಲೇ ಸುದೀಪ್‍ರನ್ನು ಜಿಮ್‍ಗೆ ಹೋಗುವಂತೆ ಪ್ರೇರೇಪಿಸಿದ ಇನ್ನೊಬ್ಬರು ವ್ಯಕ್ತಿಯೂ ಇದ್ದಾರೆ. 

    ಸುದೀಪ್ ಅವರ ಪ್ರೀತಿಯ ಪತ್ನಿ ಪ್ರಿಯಾ ಅವರೇ ಸುದೀಪ್ ಅವರು ಜಿಮ್‍ಗೆ ಹೋಗುವಂತೆ ಮಾಡಿದವರು. ಇದನ್ನು ಸ್ವತಃ ಸುದೀಪ್ ಅವರೇ ಹೇಳಿಕೊಂಡಿರೋದು ವಿಶೇಷ. ತಮ್ಮ ಜಿಮ್ ಟ್ರೈನರ್ ಜೀತ್ ದೇವಯ್ಯ ಅವರನ್ನು ಅಭಿಮಾನಿಗಳಿಗೆ ಪರಿಚಯಿಸಿರುವ ಸುದೀಪ್, ತಮ್ಮನ್ನು ಜಿಮ್‍ಗೆ ಹೋಗುವಂತೆ ಮಾಡಲು ಪ್ರೇರೇಪಿಸಿದ ಪತ್ನಿ ಪ್ರಿಯಾಗೆ ಥ್ಯಾಂಕ್ಸ್ ಹೇಳಿದ್ದಾರೆ.

    ತಮ್ಮ ಪರ್ಸನಲ್ ಟ್ರೈನರ್ ಜೀತ್ ದೇವಯ್ಯ ಅವರನ್ನು ಪರಿಚಯಿಸುತ್ತಲೇ, ಯಾಕೆ ಎಲ್ಲರೂ ತಮ್ಮ ತಮ್ಮ ಜಿಮ್ ಟ್ರೈನರ್‍ನ್ನು ಭೂತ, ದೆವ್ವಗಳಂತೆ ನೋಡುತ್ತಾರೆ ಅನ್ನೋದು ನನಗೂ ಸ್ವಲ್ಪ ಸ್ವಲ್ಪ ಅರ್ಥವಾಗುತ್ತಿದೆ ಎಂದಿದ್ದಾರೆ ಸುದೀಪ್.

    ಅದಕ್ಕೆ ಜೀತ್ ದೇವಯ್ಯನವರು ಹೇಳಿರುವುದು ಇಷ್ಟು. ` ಒಳ್ಳೆಯ ವ್ಯಕ್ತಿತ್ವ ಇರುವ ಒಬ್ಬ ಜೆಂಟಲ್‍ಮ್ಯಾನ್ ಜೊತೆ ಕೆಲಸ ಮಾಡುತ್ತಿದ್ದೇನೆ. ನಿಧಾನವಾಗಿ ಕೆಲಸ ಶುರುವಾಗಿದೆ. ಗುರಿ ಮುಟ್ಟುತ್ತೇವೆ ಎಂಬ ನಂಬಿಕೆಯಿದೆ'.

  • ಕಿಚ್ಚನಲ್ಲಿ ಮಗುವನ್ನು ಕಂಡರಂತೆ ಶೃತಿ ಹರಿಹರನ್

    sruthi thanks sudeep

    ಕಿಚ್ಚ ಸುದೀಪ್ ಹೊರಗಿನಿಂದ ನೋಡುವವರಿಗೆ ಸದಾ ಸೀರಿಯಸ್ಸಾಗಿರುವಂತೆ ಕಾಣಿಸ್ತಾರೆ. ಅಫ್‍ಕೋರ್ಸ್, ವೃತ್ತಿಯ ವಿಚಾರಕ್ಕೆ ಬಂದರೆ ಕಿಚ್ಚ ಸುದೀಪ್ ಸಿಕ್ಕಾಪಟ್ಟೆ ಸೀರಿಯಸ್. ಆದರೆ ಅವರ ಜೊತೆ ಕೆಲಸ ಮಾಡಿದವರಿಗೆ ಸ್ನೇಹಮಯಿ ಸುದೀಪ್ ಇಷ್ಟವಾಗಿಬಿಡ್ತಾರೆ. ಶೃತಿ ಹರಿಹರನ್‍ಗೆ ಆಗಿರುವುದು ಕೂಡಾ ಇಂಥದ್ದೇ ಅನುಭವ.

    ಅಂಬಿ ನಿಂಗೆ ವಯಸ್ಸಾಯ್ತೋ ಚಿತ್ರದಲ್ಲಿ ಸುದೀಪ್‍ಗೆ ಜೋಡಿಯಾಗಿರುವ ಶೃತಿ ಹರಿಹರನ್, ಸುದೀಪ್ ಅವರಲ್ಲಿ ಮಗುವಿನ ಮನಸ್ಸು ಕಂಡಿದ್ದಾರಂತೆ. ನಿಮ್ಮೊಂದಿಗೆ ಕೆಲಸ ಮಾಡಿದ್ದು ಸುಂದರ ಅನುಭವ. ನಿಮ್ಮ ಆಹಾರ, ಸಂಗೀತ ಮತ್ತು ಸಿನಿಮಾ ಅಭಿರುಚಿ ಇಷ್ಟವಾಯ್ತು. ಎಲ್ಲಕ್ಕಿಂತ ಇಷ್ಟವಾಗಿದ್ದು ನಿಮ್ಮೊಳಗೆ ಈಗಲೂ ಜೀವಂತವಾಗಿರುವ ಮಗುತನ ಎಂದು ಹೇಳಿದ್ದಾರೆ ಶೃತಿ.

    ನೀವು ನನ್ನ ಸೀರಿಯಸ್ ಇಮೇಜ್‍ನ್ನೇ ಡ್ಯಾಮೇಜ್ ಮಾಡುತ್ತಿದ್ದೀರಿ ಎಂದಿರುವ ಕಿಚ್ಚ, ನಿಮ್ಮೊಂದಿಗೆ ಕೆಲಸ ಮಾಡಿದ್ದು ನನಗೂ ಮರೆಯಲಾಗದ ಅನುಭವ ಎಂದು ಹೇಳಿದ್ದಾರೆ.

  • ಕಿಚ್ಚನಿಗೆ ಕ್ರೇಜಿಸ್ಟಾರ್ ಕೊಟ್ಟ ಅಚ್ಚರಿ..!

    crazy star's surprise to kiccha sudeep

    ಸರ್‍ಪ್ರೈಸ್ ಕೊಡೋದ್ರಲ್ಲಿ ಕಿಚ್ಚ ಸುದೀಪ್ ಫೇಮಸ್ಸು. ಈ ಸರ್‍ಪ್ರೈಸ್ ಸ್ಟಾರ್‍ಗೆ ಸರ್‍ಪ್ರೈಸ್ ಕೊಟ್ಟಿರೋದು ಕ್ರೇಜಿಸ್ಟಾರ್ ರವಿಚಂದ್ರನ್. ಹೈದರಾಬಾದ್‍ನಲ್ಲಿ ಕೋಟಿಗೊಬ್ಬ 3 ಚಿತ್ರದ ಶೂಟಿಂಗ್ ನಡೆಯುತ್ತಿದ್ದು, ಇದ್ದಕ್ಕಿದ್ದಂತೆ ಸೆಟ್‍ಗೆ ಭೇಟಿ ಕೊಟ್ಟು ಕಿಚ್ಚನನ್ನು ಅಚ್ಚರಿಗೆ ಕೆಡವಿದ್ದಾರೆ ರವಿಚಂದ್ರನ್.

    ಆ ಸರ್‍ಪ್ರೈಸ್‍ನಲ್ಲಿ ರವಿಚಂದ್ರನ್ ಗೆಟಪ್ ಕೂಡಾ ಅಚ್ಚರಿಯೇ. ಇದುವರೆಗೆ ರವಿಚಂದ್ರನ್ ಕ್ಲೀನ್ ಶೇವ್ ಹಾಗೂ ಗಡ್ಡಧಾರಿಯಾಗಿ ನಟಿಸಿದ್ದಾರೆ. ಇದೇ ವಾರ ರಿಲೀಸ್ ಆಗುತ್ತಿರುವ ದಶರಥದಲ್ಲೂ ಅವರು ಗಡ್ಡಧಾರಿಯೇ. ಆದರೆ, ಈ ಲುಕ್‍ನಲ್ಲಿ ರವಿಚಂದ್ರನ್ ಗಡ್ಡ ಕಂಪ್ಲೀಟ್ ಡಿಫರೆಂಟ್. ಈ ಲುಕ್ ಸುದೀಪ್ ಅವರಿಗಷ್ಟೇ ಅಲ್ಲ, ರವಿಚಂದ್ರನ್‍ರ ಪ್ರತಿ ಅಭಿಮಾನಿಗೂ ಅಚ್ಚರಿ.

    ರವಿಚಂದ್ರನ್ ಕೊಟ್ಟಿರೋದು ಸರ್‍ಪ್ರೈಸ್ ವಿಸಿಟ್. ಆದರೆ ಅಭಿಮಾನಿಗಳ ನಿರೀಕ್ಷೆಯೇ ಬೇರೆ. ಮಾಣಿಕ್ಯ, ಅಪೂರ್ವ, ಮತ್ತು ಹೆಬ್ಬುಲಿಯಲ್ಲಿ ಒಂದಾಗಿದ್ದ ಸುದೀಪ್ ಮತ್ತು ರವಿಚಂದ್ರನ್ ಜೋಡಿ, ಕೋಟಿಗೊಬ್ಬ 3ಯಲ್ಲೂ ಒಟ್ಟಾಗ್ತಾರಾ ಎನ್ನುವ ನಿರೀಕ್ಷೆ. ಹಾಗೇನಾದರೂ ಆದರೆ.. ಅದೂ ಒಂದು ಸರ್‍ಪ್ರೈಸ್..!!!

  • ಕಿಚ್ಚನಿಗೆ ಹಾಲಿವುಡ್‍ನ ನಿಕೋಲ್ ಶಾಲ್ಮೋ ನಾಯಕಿ

    hollywood heroine for sudeep

    ಕಿಚ್ಚ ಸುದೀಪ್ ಹಾಲಿವುಡ್‍ನ ಸೈಂಟಿಫಿಕ್ ಥ್ರಿಲ್ಲರ್ ರೈಸನ್‍ನಲ್ಲಿ ನಟಿಸುತ್ತಿರುವುದು ಗೊತ್ತಿದೆಯಷ್ಟೆ. ಈಗ ಆ ಚಿತ್ರಕ್ಕೆ ನಾಯಕಿಯ ಆಯ್ಕೆ ಮುಗಿದಿದೆ. ಚಿತ್ರದ ನಾಯಕಿಯಾಗಿ ಹಾಲಿವುಡ್‍ನ ನಿಕೋಲ್ ಶಾಲ್ಮೋ ನಟಿಸುತ್ತಿದಾರೆ. ಎಡಿ ಆರ್ಯ ನಿರ್ದೇಶನದ ರೈಸನ್ ಚಿತ್ರದಲ್ಲಿ ಇಬ್ಬರು ನಾಯಕಿಯರು. ಇಬ್ಬರು ನಾಯಕಿಯರಲ್ಲಿ ಒಬ್ಬರು ನಿಕೋಲ್ ಶಾಲ್ಮೋ. ಭಾರತೀಯ ಮೂಲದ ನಾಯಕಿಯ ಪಾತ್ರದ ಆಯ್ಕೆ ಇನ್ನೂ ಅಗಿಲ್ಲ.

    ನಿಕೋಲ್ ಶಾಲ್ಮೋ ನ್ಯೂಯಾರ್ಕ್‍ನವರು. ರಂಗಭೂಮಿಯ ನಂಟಿದೆ. ಮ್ಯಾಕ್‍ಬೆತ್ ನಾಟಕದಲ್ಲಿ ಲೇಡಿ ಮ್ಯಾಕ್‍ಬೆತ್ ಪಾತ್ರದಲ್ಲಿ ದೊಡ್ಡ ಹೆಸರು ಮಾಡಿದ್ದ ಕಲಾವಿದೆ. ಇನ್ ಲವ್ ಇನ್ ಮಿಸರಿ, ನಿಕೋಲ್‍ಗೆ ದೊಡ್ಡ ಹೆಸರು ತಂದುಕೊಟ್ಟ ಮತ್ತೊಂದು ನಾಟಕ.

    ಫಾಲಿಂಗ್ ಔಟ್ ಆಫ್ ಲವ್ ಅವರು ನಟಿಸಿದ ಮೊದಲ ಸಿನಿಮಾ. ಇನ್ ಲವ್ ಇನ್ ಮಿಸರಿ, ಗೀಕ್ ಆನ್ ಸಟ್ರೀಟ್ ಇನ್ನಿತರ ಚಿತ್ರಗಳು. ನಿಕೋಲ್ ಅಭಿನಯದ ಕೆಲವು ದೃಶ್ಯಗಳ ಶೂಟಿಂಗ್ ಈಗಾಗಲೇ ಮುಕ್ತಾಯವಾಗಿದೆ.

    ಚಿತ್ರದ ಕುರಿತು ಚರ್ಚಿಸಲು ಸುದೀಪ್ ಆಸ್ಟ್ರೇಲಿಯಾಗೆ ಹೋಗಬೇಕಿತ್ತು. ಮಳೆಯ ಕಾರಣದಿಂದಾಗಿ ಆಸ್ಟ್ರೇಲಿಯಾ ಪ್ರವಾಸ ವಿಳಂಬವಾಗಿದೆ. ಡೇಟ್ಸ್ ಕ್ಲಾಷ್ ಆಗಿ, ಬೇರೆ ಚಿತ್ರಗಳ ಚಿತ್ರೀಕರಣಕ್ಕೆ ಡೇಟ್ಸ್ ಹೊಂದಾಣಿಕೆ ಮಾಡಿಕೊಂಡ ಕಾರಣ, ಚಿತ್ರತಂಡವನ್ನು ಭೇಟಿಯಾಗಲು ಸಾಧ್ಯವಾಗಿಲ್ಲ. ಚಿತ್ರದ ಸ್ಕ್ರಿಪ್ಟ್ ಹಾಗೂ ದೃಶ್ಯಗಳ ಕುರಿತು ಚರ್ಚಿಸಲು ಸುದೀಪ್ ಆಸ್ಟ್ರೇಲಿಯಾಗೆ ಹೋಗಬೇಕಿತ್ತು. ಸದ್ಯಕ್ಕೀಗ ಸುದೀಪ್ ಬ್ಯಾಂಕಾಕ್‍ನಲ್ಲಿ ದಿ ವಿಲನ್ ಶೂಟಿಂಗ್‍ನಲ್ಲಿ ಬ್ಯುಸಿಯಾಗಿದ್ದಾರೆ.

  • ಕಿಚ್ಚನೂ, ಗಣಿನೂ.. ಸಂಬಂಧಿಕರಂತೆ..!

    sudeep, ganesh are relatives

    ಕಿಚ್ಚ ಸುದೀಪ್ ಮತ್ತು ಗಣೇಶ್ ಬಂಧುಗಳು. ಅದರಲ್ಲೇನಿದೆ ವಿಶೇಷ. ಚಿತ್ರರಂಗದಲ್ಲಿರೋವ್ರೆಲ್ಲ ಹಾಗೆಯೇ ಇದ್ದಾರೆ ಅಂದ್ಕೊಂಡ್ರೆ ಅದು ತಪ್ಪು. ಇದು ಬಂಧು ಬಳಗದ ಬಂಧುತ್ವದ ಕಥೆ. ಇತ್ತೀಚೆಗೆ ಕೆಸಿಸಿ ಟೂರ್ನಿಯಲ್ಲಿ ಜೊತೆಯಲ್ಲಿದ್ದ ವೇಳೆ, ಸುದೀಪ್‍ಗೆ ಗೊತ್ತಾಗಿರುವ ಸತ್ಯ ಇದು.

    ಗಣೇಶ್, ಸುದೀಪ್ ಅವರಿಗೆ ದೂರದ ಸಂಬಂಧಿಯಾಗಬೇಕಂತೆ. ಅದನ್ನು ಖುಷಿಯಿಂದ ಹಂಚಿಕೊಂಡಿರೋ ಸುದೀಪ್, ನನ್ನ ಮನೆಯಲ್ಲೀಗ ಗೋಲ್ಡ್ ಇದೆ. ನಾನೀಗ ಶ್ರೀಮಂತ ಎಂದಿದ್ದಾರೆ.

  • ಕುಮಾರಸ್ವಾಮಿ-ಸುದೀಪ್ 2 ಗಂಟೆ ಮಾತುಕತೆ

    sudeep meets hdk

    ರಾಜ್ಯ ರಾಜಕೀಯದಲ್ಲಿ ಎಲೆಕ್ಷನ್ ಬಿರುಗಾಳಿ ಬೀಸುವ ಮೊದಲೇ ಕುಮಾರಸ್ವಾಮಿ, ಸುದೀಪ್ ಅವರ ಮನೆಗೆ ಭೇಟಿ ಕೊಟ್ಟಿದ್ದರು. ಕುಮಾರಸ್ವಾಮಿಯವರಿಗೆ ಸುದೀಪ್ ಅಡುಗೆ ಮಾಡಿ ಬಡಿಸಿ, ಅತಿಥಿ ಸತ್ಕಾರ ತೋರಿಸಿದ್ದರು. ಅದಾದ ನಂತರ ಸುದೀಪ್, ರಾಜಕೀಯಕ್ಕೆ ಬರ್ತಾರೆ ಅನ್ನೋ ಸುದ್ದಿ ಕಿಚ್ಚಿನಂತೆ ಹುಟ್ಟಿಕೊಂಡಿತ್ತು. ಆದರೆ, ನಾನು ರಾಜಕೀಯಕ್ಕೆ ಬರೋದಿಲ್ಲ ಎಂದು ಮತ್ತೊಮ್ಮೆ ಹೇಳುವ ಮೂಲಕ ಸುದ್ದಿಯ ಕಿಚ್ಚಿಗೆ ಫುಲ್‍ಸ್ಟಾಪ್ ಇಟ್ಟಿದ್ದರು ಸುದೀಪ್.

    ಈಗ ಮತ್ತೊಮ್ಮೆ ಅಂಥಾದ್ದೇ ಸುದ್ದಿ ತೇಲಿ ಬರುತ್ತಿದೆ. ಎಲೆಕ್ಷನ್ ಘೋಷಣೆಯಾಗಿರುವ ಈ ಸಮಯದಲ್ಲಿ ಸುದೀಪ್ ಸ್ವತಃ ಕುಮಾರಸ್ವಾಮಿಯವರ ಮನೆಗೆ ಹೋಗಿ ಭೇಟಿ ಮಾಡಿರುವುದು ರಾಜ್ಯ ರಾಜಕೀಯದಲ್ಲಿ ಸಂಚಲನವನ್ನೇ ಮೂಡಿಸಿದೆ. ಅದರಲ್ಲೂ ಸುದೀಪ್ 2 ಗಂಟೆ ಕುಮಾರಸ್ವಾಮಿಯವರ ಜೊತೆ ಮಾತನಾಡಿದ್ದಾರೆ ಎನ್ನುವ ಸುದ್ದಿ ಕಾಂಗ್ರೆಸ್ ಹಾಗೂ ಬಿಜೆಪಿಯಲ್ಲಿ ತಳಮಳ ಸೃಷ್ಟಿಸಿದೆ.

    ಸುದೀಪ್ ಎಷ್ಟು ಬಾರಿ ತಾವು ರಾಜಕೀಯಕ್ಕೆ ಬರುವುದಿಲ್ಲ ಎಂದು ಹೇಳಿದರೂ, ಅವರು ಪ್ರತಿಯೊಬ್ಬ ರಾಜಕೀಯ ನಾಯಕರನ್ನು ಭೇಟಿ ಮಾಡಿದಾಗ ಇಂಥ ಸುದ್ದಿ, ತಳಮಳಗಳು ಸೃಷ್ಟಿಯಾಗುತ್ತಲೇ ಇರುತ್ತವೆ. ಏಕೆಂದರೆ, ಅದು ಸಿನಿಮಾ ಅಲ್ಲ. ರಾಜಕೀಯ. 

  • ಕೆಂಪೇಗೌಡನ ಜರ್ನಿ - ಕಿಚ್ಚನಿಂದ ಅರ್ಜುನ್ ಜನ್ಯಾ, ಆರ್ಮುಗಂಗೆ ಹಾರೈಕೆ

    kempegowda completes 8 years

    ಕೆಂಪೇಗೌಡ, ಸುದೀಪ್ ಚಿತ್ರ ಜೀವನದ ಸಕ್ಸಸ್ ಸಿನಿಮಾಗಳಲ್ಲೊಂದು. ಈ ಚಿತ್ರ ರಿಲೀಸ್ ಆಗಿ ಇತ್ತೀಚೆಗೆ 8 ವರ್ಷ ಕಳೆದಿದೆ. ಇದನ್ನು ನೆನಪಿಸಿಕೊಂಡಿರೋ ಕಿಚ್ಚ ಸುದೀಪ್, ವಿಶೇಷ ಹಾರೈಕೆ ಮಾಡಿರುವುದು ರವಿಶಂಕರ್ ಮತ್ತು ಅರ್ಜುನ್ ಜನ್ಯಾಗೆ.

    ಈ ಚಿತ್ರದ ಮೂಲಕ ರವಿಶಂಕರ್, ಕನ್ನಡ ಚಿತ್ರರಂಗದಲ್ಲಿ ಅಭಿನವ ವಜ್ರಮುನಿಯಾಗಿ ವಿಜೃಂಭಿಸಿದರು. ಇಂದಿಗೂ ರವಿಶಂಕರ್ ಕನ್ನಡ ಚಿತ್ರರಂಗದ ಸೂಪರ್ ಸ್ಟಾರ್ ವಿಲನ್.

    ಇನ್ನು ಅರ್ಜುನ್ ಜನ್ಯಾಗೆ ದೊಡ್ಡ ಬ್ರೇಕ್ ಕೊಟ್ಟ ಮೊದಲ ಸಿನಿಮಾ ಕೆಂಪೇಗೌಡ. ಈಗ ಅವರು ಸಂಗೀತ ನಿರ್ದೇಶನ ನೀಡಿರುವ 99 ಚಿತ್ರ, ಅವರ 100ನೇ ಚಿತ್ರವಾಗಿದೆ.

    ಸುದೀಪ್ ಇವರಿಬ್ಬರಿಗೂ ವಿಶೇಷ ಹಾರೈಕೆ ಮಾಡಿರುವುದು ಇದೇ ಕಾರಣಕ್ಕೆ. ಕೆಂಪೇಗೌಡ, ಇವರಿಬ್ಬರಿಗೂ ಲೈಫ್ ಕೊಟ್ಟ ಸಿನಿಮಾ.

  • ಕೋಟಿಗೊಬ್ಬ 3 ಗುಟ್ಟು ಹೇಳಿದರಾ ಕಿಚ್ಚ..?

    sudeep gives hints about kotigobba 3

    ಕೋಟಿಗೊಬ್ಬ 3. ಇದು ಸುದೀಪ್ ಅಭಿನಯದ ಸಿನಿಮಾ. ಜೂನ್ 17ರಿಂದ ಯೂರೋಪ್‍ನಲ್ಲಿ ಶೂಟಿಂಗ್ ಶುರುವಾಗಲಿದೆ. ಕೋಟಿಗೊಬ್ಬ 2 ಸಕ್ಸಸ್ ನಂತರ, ಕೋಟಿಗೊಬ್ಬ 3ಗೆ ರೆಡಿಯಾಗುತ್ತಿರುವ ಸುದೀಪ್, ಚಿತ್ರದ ಒಂದು  ಗುಟ್ಟನ್ನು ಬಿಟ್ಟುಕೊಟ್ಟಿದ್ದಾರೆ.

    ಕೋಟಿಗೊಬ್ಬ 3 ನಲ್ಲಿ ಶಿವ ಮತ್ತೊಮ್ಮೆ ಹುಟ್ಟಬಹುದು. ಹೌದು, ಕೋಟಿಗೊಬ್ಬ2ನಲ್ಲಿ ಸತ್ಯ ಮತ್ತು ಶಿವ ಎಂಬ ಎರಡು ಪಾತ್ರ ನಿರ್ವಹಿಸಿದ್ದರು ಸುದೀಪ್. ಆದರೆ, ಅದು ಡಬಲ್ ಆ್ಯಕ್ಟಿಂಗ್ ಅಲ್ಲ. ಕೊನೆಯಲ್ಲಿ ಶಿವ ಸತ್ತು, ಸತ್ಯ ಒಬ್ಬನೇ ಉಳಿಯುತ್ತಾನೆ. ಹಾಗಾದರೆ ಕೋಟಿಗೊಬ್ಬ 3ನಲ್ಲಿ ಶಿವ ಮತ್ತೆ ಹುಟ್ಟಿಬರುತ್ತಾನಾ..? 

    ಬೆಲ್‍ಗ್ರೇಡ್‍ಗೆ ಹೊರಡುತ್ತಿದ್ದೇವೆ ಎಂದು ಟ್ವೀಟ್ ಮಾಡಿರುವ ಸುದೀಪ್, ಇದು ಸತ್ಯ, ಮತ್ತೊಮ್ಮೆ ಶಿವನನ್ನು ಸೃಷ್ಟಿಸುವ ಸಮಯ ಎನ್ನುವ ಮೂಲಕ ಗುಟ್ಟು ಹೇಳಿದ್ದಾರೆ.

    ಏನೇ ಇದ್ರೂ, ಸಿನಿಮಾ ತೆರೆಗೆ ಬರುವವರೆಗೆ ಅದು ಗುಟ್ಟಾಗಿಯೇ ಇರುತ್ತೆ. ಸಿನಿಮಾ ಬಿಡುಗಡೆಯಾಗುವವರೆಗೆ ವೇಯ್ಟ್ ಮಾಡಿ.

  • ಕೋಟಿಗೊಬ್ಬ 3 ಮೊದಲ ಶೆಡ್ಯೂಲ್ ಮುಗೀತು

    kotigobba 3 first schedule starts

    ಕಿಚ್ಚ ಸುದೀಪ್ ಅಭಿನಯದ ಕೋಟಿಗೊಬ್ಬ-3 ಚಿತ್ರದ ಮೊದಲ ಹಂತದ ಚಿತ್ರೀಕರಣವೇ ಮುಗಿದಿದೆ. ಸುದೀಪ್ ಅಭಿನಯಿಸುವ ದೃಶ್ಯಗಳು ಹಾಗೂ ಸುದೀಪ್ ಇಲ್ಲದ ದೃಶ್ಯಗಳ ಚಿತ್ರೀಕರಣ ಮುಕ್ತಾಯವಾಗಿದೆ. ಅವುಗಳ ಎಡಿಟಿಂಗ್ ಕೆಲಸವನ್ನೂ ಚಿತ್ರತಂಡ ಈಗಾಗಲೇ ಮುಗಿಸಿದೆ. ವಿಶೇಷವೆಂದರೆ ಚಿತ್ರಕ್ಕೆ ಇನ್ನೂ ನಾಯಕಿ ಯಾರು ಅನ್ನೋದೇ ಫೈನಲ್ ಆಗಿಲ್ಲ. ಪ್ರಮುಖ ಪಾತ್ರವೊಂದಕ್ಕೆ ಇನ್ನೂ ಹುಡುಕಾಟ ನಡೆಯುತ್ತಿದೆ. 

    ಇಷ್ಟು ವೇಗವಾಗಿ ಚಿತ್ರೀಕರಣ ನಡೆಯುತ್ತಿರುವುದರ ಕ್ರೆಡಿಟ್‍ನ್ನು ಸುದೀಪ್ ನೀಡಿರುವುದು ನಿರ್ದೇಶಕ ಕಾರ್ತಿಕ್‍ಗೆ. ಕಾರ್ತಿಕ್‍ಗೆ ಇದು ಮೊದಲ ಚಿತ್ರ. ಕೇವಲ ಆತನಲ್ಲಿದ್ದ ಉತ್ಸಾಹ ನೋಡಿ ಮೆಗಾಪ್ರಾಜೆಕ್ಟ್‍ನ್ನು ಅವರ ಕೈಗೆ ನೀಡಿದ್ದು ಸುದೀಪ್ ಮತ್ತು ನಿರ್ಮಾಪಕ ಸೂರಪ್ಪ ಬಾಬು.

    ಸೂರಪ್ಪ ಬಾಬು ಕತೆ ಹೇಳೋದಕ್ಕೆ ಒಬ್ಬ ಹುಡುಗನನ್ನು ಕರೆದುಕೊಂಡು ಬಂದ್ರು. ಆತ ಹೇಳಿದ ಕತೆ ನನಗೆ ಇಷ್ಟವಾಗಲಿಲ್ಲ. ಆದರೆ, ಆತನ ಉತ್ಸಾಹ ನನಗೆ ಮೆಚ್ಚುಗೆಯಾಯ್ತು. ಕತೆ ಹೇಳೋದ್ರ ಬಗ್ಗೆ ಫ್ಯಾಷನೇಟ್ ಆಗಿದ್ದ ಕಾರ್ತಿಕ್‍ಗೆ ನಾನೇ ಒಂದು ಕತೆ ಹೇಳಿದೆ. ಆ ಎಳೆಯನ್ನಿಟ್ಟುಕೊಂಡು ಚೆನ್ನಾಗಿ ಡೆವಲಪ್ ಮಾಡಿಕೊಂಡು ಬಂದ ಕಾರ್ತಿಕ್, ಒಳ್ಳೆಯ ಚಿತ್ರಕತೆಯನ್ನೂ ರೆಡಿ ಮಾಡಿಕೊಂಡು ತಂದ ಎಂದು ಹೇಳಿದ್ದಾರೆ ಸುದೀಪ್.

    ಸದ್ಯಕ್ಕಂತೂ ಸುದೀಪ್ ಸಿನಿಮಾದಲ್ಲಿ ಸಿಕ್ಕಾಪಟ್ಟೆ ಎಂದರೆ ಸಿಕ್ಕಾಪಟ್ಟೆ ಬ್ಯುಸಿ. ಒಂದು ಕಡೆ ದಿ ವಿಲನ್ ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸ, ಮತ್ತೊಂದೆಡೆ ಅಂಬಿ ನಿಂಗೆ ವಯಸ್ಸಾಯ್ತೋ ಚಿತ್ರ, ಇನ್ನೊಂದೆಡೆ ಕೋಟಿಗೊಬ್ಬ-3, ಮಗದೊಂದು ಕಡೆ ಪೈಲ್ವಾನ್ ಸಿನಿಮಾ.. ಸುದೀಪ್ ಕಂಪ್ಲೀಟ್ ಬ್ಯುಸಿ.

  • ಕೋಟಿಗೊಬ್ಬ ನಿರ್ದೇಶಕನ ಕೋಟಿಯಂತ ಮಾತು.

    kotigobba 3 teaser is super hit

    ಕಿಚ್ಚ ಸುದೀಪ್ ಅಭಿನಯದ ಕೋಟಿಗೊಬ್ಬ-3 ಚಿತ್ರದ ಟೀಸರ್, ಸೋಷಿಯಲ್ ಮೀಡಿಯಾದಲ್ಲಿ ಕ್ರೇಜ್ ಸೃಷ್ಟಿಸಿದೆ. ದಾಖಲೆ ಬರೆಯುತ್ತಿದೆ. 20 ಲಕ್ಷಕ್ಕೂ ಹೆಚ್ಚು ಮಂದಿ ವೀಕ್ಷಿಸಿರುವ ಚಿತ್ರದ ಟೀಸರ್, ಹಾಲಿವುಡ್ ಸಿನಿಮಾ ಸ್ಟೈಲ್‍ನಲ್ಲಿದೆ. ಅದ್ಭುತ ಮೇಕಿಂಗ್, ಕ್ಲಾಸಿಕ್ ಸ್ಟೈಲ್, ಮಾಸ್ ಲುಕ್ ಎಲ್ಲವೂ ಇರುವ ಚಿತ್ರದ ಟೀಸರ್, ಅಭಿಮಾನಿಗಳಿಗಂತೂ ಇಷ್ಟವಾಗಿಬಿಟ್ಟಿದೆ.

    ಸುದೀಪ್ ಜೊತೆ ಸಿನಿಮಾ ಮಾಡೋದು ಅಂದ್ರೆ, ರಜನಿ, ಕಮಲ್ ಚಿತ್ರಗಳನ್ನು ನಿರ್ದೇಶನ ಮಾಡಿದ ಅನುಭವವಾಗುತ್ತೆ. ನಾನು ಸುದೀಪ್ ಅವರಲ್ಲಿ ಮತ್ತೊಬ್ಬ ರಜನಿಯವರನ್ನು ಕಾಣುತ್ತಿದ್ದೇನೆ ಎಂದು ಥ್ರಿಲ್ ಆಗಿದ್ದಾರೆ ನಿರ್ದೇಶಕ ಶಿವಕಾರ್ತಿಕ್.

    ಈ ಮೊದಲು ಕನ್ನಡದಲ್ಲಿ ಪುಟ್ಟಣ್ಣ ಕಣಗಾಲ್, ರವಿಚಂದ್ರನ್.. ಬೇರೆ ಭಾಷೆಯ ಚಿತ್ರರಂಗದಲ್ಲೂ ನಿರೀಕ್ಷೆ ಹುಟ್ಟಿಸಿದ್ದರು. ಅವರ ಸಿನಿಮಾಗಳನ್ನು ಬೇರೆ ಚಿತ್ರರಂಗದ ದಿಗ್ಗಜರು ಬೆಂಗಳೂರಿಗೆ ಬಂದು ನೋಡುತ್ತಿದ್ದರು. ಕನ್ನಡ ಚಿತ್ರರಂಗದ ತಾಕತ್ತು, ಕೋಟಿಗೊಬ್ಬ-3 ಚಿತ್ರದ ಮೂಲಕ ಗೊತ್ತಾಗಬೇಕು ಎಂದಿದ್ದಾರೆ ಶಿವಕಾರ್ತಿಕ್.

  • ಕೋಟಿಗೊಬ್ಬ-3 ಶೂಟಿಂಗ್ ಶುರು.. ಸುದೀಪ್ ಇನ್ನೂ ಇಲ್ಲ..!

    kotigobba 3 shooting starts

    ಕೋಟಿಗೊಬ್ಬ-3, ಸ್ವತಃ ಸುದೀಪ್ ಕಥೆ ಬರೆದಿರುವ ಚಿತ್ರ. ಸೂರಪ್ಪ ಬಾಬು ನಿರ್ಮಾಣದಲ್ಲಿ ತಯಾರಾಗುತ್ತಿರುವ ಚಿತ್ರಕ್ಕೆ, ಶಿವಕಾರ್ತಿಕ್ ನಿರ್ದೇಶಕ. ಈಗಾಗಲೇ ಮುಹೂರ್ತ ಆಚರಿಸಿಕೊಂಡಿರುವ ಚಿತ್ರದ ಶೂಟಿಂಗ್ ಸದ್ದಿಲ್ಲದೆ ಶುರುವಾಗಿಬಿಟ್ಟಿದೆ. ಅದೂ ಸುದೀಪ್ ಇಲ್ಲದೆಯೇ..

    ಸುದೀಪ್, ತಮ್ಮದೇ ಬ್ಯಾನರ್‍ನ ಅಂಬಿ ನಿಂಗೆ ವಯಸ್ಸಾಯ್ತೋ ಚಿತ್ರದ ಚಿತ್ರೀಕರಣದಲ್ಲಿ ಸಂಪೂರ್ಣ ಬ್ಯುಸಿಯಾಗಿಬಿಟ್ಟಿದ್ದಾರೆ. ಆ ಚಿತ್ರದ ಹಾಡುಗಳ ಶೂಟಿಂಗ್ ಬಾಕಿಯಿದೆಯಂತೆ. ಆ ಶೂಟಿಂಗ್ ಮುಗಿದ ನಂತರ ಕೋಟಿಗೊಬ್ಬ-3 ಶೂಟಿಂಗ್‍ಗೆ ಬರಲಿದ್ದಾರೆ ಕಿಚ್ಚ.

    ಹೀಗಾಗಿ ಶೂಟಿಂಗ್ ಆರಂಭಿಸಿರುವ ಚಿತ್ರತಂಡ, ಸುದೀಪ್ ಅವರಿಲ್ಲದೇ ಇರುವ ದೃಶ್ಯಗಳ ಶೂಟಿಂಗ್ ನಡೆಸುತ್ತಿದೆ. ಅಂದಹಾಗೆ ಕೋಟಿಗೊಬ್ಬ-3 ಚಿತ್ರಕ್ಕೆ ಹೀರೋಯಿನ್ ಇನ್ನೂ ಅಂತಿಮವಾಗಿಲ್ಲ.

  • ಕ್ರಿಕೆಟ್ ಕಾಶಿಯತ್ತ ಮತ್ತೆ ಕಿಚ್ಚನ ಪ್ರಯಾಣ

    sudeep to be a part of mmc cricket tournament once again

    ಹಿಂದೂಗಳಿಗೆ ಕಾಶಿ ಹೇಗೋ.. ಹಾಗೆಯೇ ಕ್ರಿಕೆಟಿಗರಿಗೆ ಇಂಗ್ಲೆಂಡ್‍ನ ಲಾಡ್ರ್ಸ್ ಕ್ರೀಡಾಂಗಣ. ಅಲ್ಲಿ ಕ್ರಿಕೆಟ್ ಆಡಬೇಕು ಎನ್ನುವುದು ಪ್ರತಿಯೊಬ್ಬ ಕ್ರಿಕೆಟ್ ಆಟಗಾರನ ಕನಸು. ಅಂತಹ ಕ್ರಿಕೆಟ್ ಕಾಶಿಗೆ ಕಿಚ್ಚ ಸುದೀಪ್ ಕ್ರಿಕೆಟ್ ಆಡಲು ಹೋಗುತ್ತಿದ್ದಾರೆ. 

    ಸುದೀಪ್‍ಗೆ ಲಾಡ್ರ್ಸ್ ಕ್ರೀಡಾಂಗಣ ಹೊಸದೇನಲ್ಲ. ಈ ಹಿಂದೆ ಎಂಎಂಸಿ ಕ್ರಿಕೆಟ್ ಟೂರ್ನಮೆಂಟ್‍ನಲ್ಲಿ ಆಡಿದ್ದ ಸುದೀಪ್, ಪ್ರಶಸ್ತಿಯನ್ನೂ ಗೆದ್ದಿದ್ದರು. ವಿಸೈನರ್ ತಂಡದ ನಾಯಕರಾಗಿ ಕಪ್ ಗೆದ್ದಿದ್ದ ಸುದೀಪ್, ಈಗ ಮತ್ತೊಮ್ಮೆ ಲಾಡ್ರ್ಸ್‍ನತ್ತ ಪ್ರಯಾಣ ಬೆಳೆಸುತ್ತಿದ್ದಾರೆ. ಜೂನ್ 12ರಿಂದ ಲಾಡ್ರ್ಸ್‍ನಲ್ಲಿ ಎಂಎಂಸಿ ಕಾರ್ಪೊರೇಟ್ ಕ್ರಿಕೆಟ್ ಟೂರ್ನಿ ಶುರುವಾಗಲಿದ್ದು, ಮತ್ತೊಮ್ಮೆ ವಿಸೈನರ್ ತಂಡವನ್ನು ಸುದೀಪ್ ಮುನ್ನಡೆಸಲಿದ್ದಾರೆ.

  • ಕ್ರಿಸ್‍ಮಸ್‍ಗೆ ಬರ್ತಾನಂತೆ ಕೋಟಿಗೊಬ್ಬ 3

    sudeep's kotigobba 3 launched

    ಕಿಚ್ಚ ಸುದೀಪ್ ಅಭಿನಯದ ಕೋಟಿಗೊಬ್ಬ 3 ಚಿತ್ರಕ್ಕೆ ಮುಹೂರ್ತ ನೆರವೇರಿದೆ. ಶಿವ ಕಾರ್ತಿಕ್ ನಿರ್ದೇಶನದ ಈ ಚಿತ್ರಕ್ಕೆ ಸೂರಪ್ಪ ಬಾಬು ನಿರ್ಮಾಪಕ. ಕಥೆ ಸ್ವತಃ ಸುದೀಪ್ ಅವರದ್ದು.

    ಬೆಂಗಳೂರಿನ ಮಲ್ಲೇಶ್ವರಂನಲ್ಲಿರುವ ವೇಣುಗೋಪಾಲಸ್ವಾಮಿ ದೇಗುಲದಲ್ಲಿ ನಡೆದ ಚಿತ್ರದ ಮುಹೂರ್ತ ಕಾರ್ಯಕ್ರಮದಲ್ಲಿ ಸುದೀಪ್ ಅವರ ಇಡೀ ಕುಟುಂಬವೇ ಭಾಗವಹಿಸಿತ್ತು. ಕ್ಯಾಮೆರಾ ಸ್ವಿಚ್ ಆನ್ ಮಾಡಿದ್ದು  ಸುದೀಪ್ ಅವರ ತಂದೆ ಸರೋವರ್ ಸಂಜೀವ್. ಜ್ಯೋತಿ ಬೆಳಗಿದ್ದು ಸುದೀಪ್ ಅವರ ಪತ್ನಿ ಪ್ರಿಯಾ. ಕ್ಲಾಪ್ ಮಾಡಿದ್ದು ನಿರ್ಮಾಪಕ ಮುನಿರತ್ನ. 

    ರಾಕ್‍ಲೈನ್ ವೆಂಕಟೇಶ್, ಗುರುದತ್, ಸಿ.ಆರ್. ಮನೋಹರ್ ಸೇರಿದಂತೆ ಚಿತ್ರರಂಗದ ಹಲವರು ಭಾಗವಹಿಸಿದ್ದರು. ಚಿತ್ರದ ಚಿತ್ರೀಕರಣ ಮಾರ್ಚ್ ತಿಂಗಳ ಕೊನೆಯಲ್ಲಿ ಶುರುವಾಗಲಿದೆ. ಚೆನ್ನೈ, ಹೈದರಾಬಾದ್‍ನಲ್ಲಿ ಚಿತ್ರೀಕರಣ ನಡೆಯಲಿದೆ. ಎಲ್ಲವೂ ಅಂದುಕೊಂಡಂತೆಯೇ ನಡೆದರೆ, ಕ್ರಿಸ್‍ಮಸ್ ವೇಳೆಗೆ ಕೋಟಿಗೊಬ್ಬ 3 ತೆರೆಯ ಮೇಲೆ ಕಾಣಿಸಿಕೊಳ್ಳಲಿದ್ದಾನೆ. 

  • ಗಾಂಧಿನಗರದಲ್ಲೇ 3 ಥಿಯೇಟರ್‍ಗಳಲ್ಲಿ ದಿ ವಿಲನ್

    the villain will release in 3 theraters in gandhinagar

    ದಿ ವಿಲನ್. ಶಿವರಾಜ್‍ಕುಮಾರ್, ಸುದೀಪ್ ಅಭಿನಯದ ಚಿತ್ರ ಬಿಡುಗಡೆಗೂ ಮೊದಲೇ ಸೆನ್ಸೇಷನ್ ಸೃಷ್ಟಿಸಿದೆ. ಎಷ್ಟರಮಟ್ಟಿಗೆಂದರೆ, ಸಾವಿರ ಥಿಯೇಟರ್‍ಗಳಲ್ಲಿ ರಿಲೀಸ್ ಆಗುವ ಸಾಧ್ಯತೆ ಇದೆ. ಅದರಲ್ಲೂ ಗಾಂಧಿನಗರದಲ್ಲಿ ಒಂದೇ ಕಡೆ 3 ಥಿಯೇಟರ್‍ಗಳಲ್ಲಿ ರಿಲೀಸ್ ಆಗುತ್ತಿದೆ. ಸಂತೊಷ್, ನರ್ತಕಿ ಹಾಗೂ ಪಕ್ಕದಲ್ಲೇ ಇರುವ ತ್ರಿವೇಣಿ ಚಿತ್ರಮಂದಿರದಲ್ಲಿ ಸಿನಿಮಾ ಬಿಡುಗಡೆಯಾಗುತ್ತಿದೆ.

    ಸೆನ್ಸಾರ್‍ನಲ್ಲಿ ಯು/ಎ  ಪ್ರಮಾಣ ಪತ್ರ ಪಡೆದಿರವ ದಿ ವಿಲನ್, ಸೆಪ್ಟೆಂಬರ್ 20ಕ್ಕೆ ರಿಲೀಸ್ ಆಗುವ ಸಾಧ್ಯತೆ ಇದೆ. ಜೋಗಿ ಪ್ರೇಮ್ ಚಿತ್ರದ ಅದ್ಧೂರಿ ಬಿಡುಗಡೆಗೆ ಹೊಸ ಪ್ಲಾನ್ ಮಾಡಿಕೊಂಡಿದ್ದರೆ, ನಿರ್ಮಾಪಕ ಸಿ.ಆರ್.ಮನೋಹರ್.. ಒಂದು ಸಾವಿರ ಥಿಯೇಟರುಗಳಲ್ಲಿ ಬಿಡುಗಡೆ ಮಾಡುವ ಯೋಚನೆಯಲ್ಲಿದ್ದಾರಂತೆ. ಕೆಲವೇ ದಿನ. ಗೌರಿ, ಗಣೇಶ ಹಬ್ಬ ಕಳೆಯುತ್ತಿದ್ದಂತೆ ವಿಲನ್ ಹಬ್ಬ ಶುರುವಾಗಲಿದೆ.

  • ಗಿರ್‍ಮಿಟ್‍ಗೆ ಫಿದಾ ಆದ ಕಿಚ್ಚ

    mayuri, sudeep image

    ಬಿಗ್‍ಬಾಸ್‍ನಲ್ಲಿ ಕಿಚ್ಚನ್ ಕಿಚನ್ ವೀಕೆಂಡ್‍ನಲ್ಲಿ ಫೇಮಸ್ ಆಗುತ್ತಿದೆ. ಆದರೆ, ಈ ಕಿಚ್ಚನ್ ಕಿಚನ್‍ನಲ್ಲಿ ಕಿಚ್ಚ ಸುದೀಪ್ ತಮ್ಮ ಗಿರ್‍ಮಿಟ್ ಪ್ರೇಮವನ್ನು ಬಹಿರಂಗಪಡಿಸಿದ್ದಾರೆ. ಅದನ್ನು ಅವರು ಹೇಳಿಕೊಂಡಿರೋದು ಕಿಚ್ಚನ್ ಕಿಚನ್‍ಗೆ ಅತಿಥಿಯಾಗಿ ಬಂದಿದ್ದ ನಟಿ ಮಯೂರಿ ಅವರ ಜೊತೆ.

    ಅತಿಥಿಯಾಗಿದ್ದ ಮಯೂರಿ, ಸುದೀಪ್ ಅವರಿಗೆ ಗಿರ್‍ಮಿಟ್ ಮಾಡಿಕೊಟ್ರು. ಇದನ್ನು ಬಾಯ್ತುಂಬಾ ಸವಿದ ಸುದೀಪ್, ತಾವು ಉ.ಕರ್ನಾಟಕಕ್ಕೆ ಹೋದಾಗ ಗಿರ್‍ಮಿಟ್‍ನ್ನು ಮಿಸ್ ಮಾಡಿಕೊಳ್ಳೋದಿಲ್ಲ ಎನ್ನುವುದನ್ನು ಹೇಳಿಕೊಂಡ್ರು. ಗಿರ್‍ಮಟ್‍ಗೆ ಬೇಕಾಗುವ ಚುರುಮುರಿ ಸೇರಿದಂತೆ, ಎಲ್ಲವನ್ನೂ ಮನೆಯಿಂದಲೇ ತಂದಿದ್ದ ಮಯೂರಿ, ಗಿರ್‍ಮಿಟ್ ಮಾಡೋದು ಹೇಗೆ ಅನ್ನೋದನ್ನು ಸುದೀಪ್ ಅವರಿಗೆ ಹೇಳಿಕೊಟ್ರು.

  • ಗೀತಾ ಕಾನ್ಸೆಪ್ಟಿಗೆ ತಲೆದೂಗಿದ ಕಿಚ್ಚ

    sudeep likes geetha movie concept

    ಗೀತಾ ಚಿತ್ರದ ಟ್ರೇಲರ್ ಮಾಸ್ ಮತ್ತು ಕ್ಲಾಸ್ ಆಗಿದೆ. ಪ್ರೀತಿ, ಪ್ರೇಮ, ಚಳವಳಿಯ ಕಿಚ್ಚು, ಕೆಚ್ಚೆದೆಯ ಕನ್ನಡಿಗನ ರೊಚ್ಚು ಎಲ್ಲವೂ ಇರುವ ಸಿನಿಮಾದ ಟ್ರೇಲರ್ ಕುತೂಹಲ ಹುಟ್ಟಿಸುತ್ತದೆ. ಚಿತ್ರದ ಕಾನ್ಸೆಪ್ಟ್ ಏನಿರಬಹುದು ಎಂಬ ನಿರೀಕ್ಷೆ ಹುಟ್ಟಿಸುತ್ತದೆ. ಕಿಚ್ಚನಿಗೆ ಆಗಿರುವುದು ಕೂಡಾ ಅದೇ.

    ಟ್ರೇಲರ್ ನೋಡಿದೆ.ಉತ್ತಮವಾಗಿದೆ. ಕಾನ್ಸೆಪ್ಟ್ ಚೆನ್ನಾಗಿದೆ. 27ಕ್ಕೆ ರಿಲೀಸ್ ಆಗುತ್ತಿರುವ ಗೀತಾ ಚಿತ್ರಕ್ಕೆ ಶುಭ ಹಾರೈಕೆ ಎಂದಿದ್ದಾರೆ ಸುದೀಪ್.

    ಗಣೇಶ್ ಜೊತೆ ಈ ಚಿತ್ರದಲ್ಲಿ ಶಾನ್ವಿ ಶ್ರೀವಾಸ್ತವ್, ಪ್ರಯಾಗ ಮಾರ್ಟಿನ್, ಪಾರ್ವತಿ ಅರುಣ್, ಸುಧಾರಾಣಿ ನಟಿಸಿದ್ದು, ವಿಜಯ್ ನಾಗೇಂದ್ರ ಇದೇ ಮೊದಲ ಬಾರಿಗೆ ನಿರ್ದೇಶನ ಮಾಡಿದ್ದಾರೆ. ಶಿಲ್ಪಾ ಗಣೇಶ್ ಮತ್ತು ಸೈಯದ್ ಸಲಾಂ ಚಿತ್ರದ ನಿರ್ಮಾಪಕರು.

  • ಚಿಕ್ಕಮಗಳೂರಲ್ಲಿ ಲಂಡನ್ ಮಲ್ಲಿಗೆ ಘಮಘಮ..

    amy jackson feels energetic in chikkamangluru

    ಆ್ಯಮಿ ಜಾಕ್ಸನ್ ಮೂಲತಃ ಬ್ರಿಟನ್‍ನವರು. ಜೋಗಿ ಪ್ರೇಮ್ ಕಣ್ಣಿಗೆ ಬಿದ್ದು ದಿ ವಿಲನ್‍ಗೆ ಹೀರೋಯಿನ್ ಆದವರು. ವಿಲನ್ ಚಿತ್ರದ ಚಿತ್ರೀಕರಣ ಈಗ ಚಿಕ್ಕಮಗಳೂರಲ್ಲಿ ನಡೀತಾ ಇದೆ. ಕಿಚ್ಚ ಸುದೀಪ್ & ಆ್ಯಮಿ ಜಾಕ್ಸನ್ ಜೋಡಿಯ ಕೆಲವು ದೃಶ್ಯ ಮತ್ತು ಹಾಡುಗಳ ಚಿತ್ರೀಕರಣ ಮಾಡಿದ್ದಾರೆ ಜೋಗಿ ಪ್ರೇಮ್.

    ಈ ಲಂಡನ್ ಮಲ್ಲಿಗೆ ಚಿಕ್ಕಮಗಳೂರಿನ ಮಂಜಿಗೆ ಮಾರು ಹೋಗಿದೆ. ಅಲ್ಲಿನ ಚುಮು ಚುಮು ಚಳಿ, ತಣ್ಣನೆಯ ಗಾಳಿ, ಹಸಿರು ಬೆಟ್ಟ, ಒಂಟಿ ದೇಗುಲ, ತಂಪಾದ ಎಳನೀರು, ಘಂಟೆಯ ನಾದ..ಇವುಗಳಿಗೆಲ್ಲ ತನ್ಮಯವಾಗಿ ಹೋಗಿರುವ ಆ್ಯಮಿ ಜಾಕ್ಸನ್, ಬೆಟ್ಟದಲ್ಲಿ ದೇಗುಲದ ಎದುರು ಕುಳಿತು ಅಬ್ಬಾ.. ಎಂಥಾ ಎನರ್ಜಿ, ಎಂಥಾ ಬೆಟ್ಟ ಎಂದು ಖುಷಿಪಟ್ಟಿದ್ದಾರೆ.

    Related Articles :-

    ಇಂದಿನಿಂದ ಚಿಕ್ಕಮಗಳೂರಿನಲ್ಲಿ ವಿಲನ್ ಟೀಂ

    ದಿ ವಿಲನ್ ಚಿತ್ರದ ಸೀಕ್ರೆಟ್ ಹೇಳಿದ ಕಿಚ್ಚ

    ವಿಲನ್ ಚಿತ್ರದ ಕಾನ್ಸೆಪ್ಟ್ - ಹೀಗೂ ಉಂಟೆ..?

    Motion poster Of 'The Villain' Released!

    ಮತ್ತೆ ಬ್ಯಾಂಕಾಕ್‍ಗೆ `ದಿ ವಿಲನ್' ಟೀಂ

    The Villain Rights Sold

    ದಿ ವಿಲನ್, ಲಂಡನ್ ಶೂಟಿಂಗ್ ಮುಗೀತು - ಭಾನುವಾರದ ಕಿಚ್ಚನ ಪ್ಲಾನ್ ಏನು?

    ಲಂಡನ್ನಲ್ಲಿ ವಿಲನ್ ಜೊತೆ ಸೇರಿದ ಶಿವರಾಜ್ ಕುಮಾರ್

India Vs England Pressmeet Gallery

Odeya Audio Launch Gallery