` dr vishnuvardhan, - chitraloka.com | Kannada Movie News, Reviews | Image

dr vishnuvardhan,

  • ನಿಷ್ಕರ್ಷ ಸಿನಿಮಾ ಮಿಸ್ ಮಾಡದೇ ನೋಡಿ - ಅಪ್ಪು ಮನವಿ

    puneeth promores nishkarsha

    ನಿಷ್ಕರ್ಷ ಸಿನಿಮಾ 26 ವರ್ಷಗಳ ನಂತರ ರಿಲೀಸ್ ಆಗುತ್ತಿದೆ. ವಿಷ್ಣುವರ್ಧನ್ ಅಭಿನಯದ ಈ ಕ್ಲಾಸಿಕ್ ಸಿನಿಮಾ ವಿಷ್ಣು ಹುಟ್ಟುಹಬ್ಬದ ಸ್ಪೆಷಲ್ ಆಗಿ ಇದೇ ಶುಕ್ರವಾರ ಚಿತ್ರಮಂದಿರಗಳಲ್ಲಿ ರಾರಾಜಿಸಲಿದೆ. 1993ರಲ್ಲಿ 100 ದಿನ ಓಡಿದ್ದ ಚಿತ್ರವಿದು.

    ವಿಷ್ಣು ಸರ್ ಅಭಿನಯದ ಸೂಪರ್ ಸಿನಿಮಾಗಳಲ್ಲಿ ಇದೂ ಒಂದು. ನಾನಂತೂ ಈ ಚಿತ್ರದ ಅಭಿಮಾನಿ. ಆಗಿನ ಕಾಲಕ್ಕೇ ಹಾಲಿವುಡ್ ಶೈಲಿಯ ಸಿನಿಮಾ ಕೊಟ್ಟಿದ್ದರು ಸುನಿಲ್ ಕುಮಾರ್ ದೇಸಾಯಿ. ನಾನಂತೂ ಈ ಚಿತ್ರವನ್ನು ಹಲವು ಬಾರಿ ನೋಡಿದ್ದೇನೆ. ಈಗ ನಿರ್ಮಾಪಕ ಬಿ.ಸಿ.ಪಾಟೀಲ್, ಚಿತ್ರವನ್ನು ಹೊಸ ಟೆಕ್ನಾಲಜಿಯಲ್ಲಿ ರಿಲೀಸ್ ಮಾಡುತ್ತಿದ್ದಾರೆ. ಆಗ ನೋಡಿದ್ದವರೂ ಈಗ ಮತ್ತೆ ನೋಡಬೇಕು. ಖಂಡಿತಾ ಅದ್ಭುತ ಅನುಭವ ನಿಮ್ಮದಾಗಲಿದೆ ಎಂದಿದ್ದಾರೆ ಪುನೀತ್ ರಾಜ್ಕುಮಾರ್.

    ವಿಷ್ಣುವರ್ಧನ್ ಜೊತೆಗೆ ಅನಂತ್ ನಾಗ್, ಬಿ.ಸಿ.ಪಾಟೀಲ್, ಸುಮನ್ ನಗರ್ಕರ್ ನಟಿಸಿದ್ದ ಚಿತ್ರವನ್ನು ಆಗಿನ ಕಾಲಕ್ಕೆ 60 ಲಕ್ಷ ಬಜೆಟ್ಟಿನಲ್ಲಿ ನಿರ್ಮಿಸಲಾಗಿತ್ತು. ಈಗ ಅದೇ ಚಿತ್ರವನ್ನು 1 ಕೋಟಿ ಖರ್ಚು ಮಾಡಿ ರಿಲೀಸ್ ಮಾಡುತ್ತಿದ್ದಾರೆ ಬಿ.ಸಿ.ಪಾಟೀಲ್.

  • ನಿಷ್ಕರ್ಷಕ್ಕೆ ವಿಷ್ಣು ಪಡೆದಿದ್ದ ಸಂಭಾವನೆ ಎಷ್ಟು..?

    what was vishnuvardhan's remunaration for nishkarsha

    ಇದೇ ಸೆಪ್ಟೆಂಬರ್ 18ಕ್ಕೆ ವಿಷ್ಣುವರ್ಧನ್ ಹುಟ್ಟುಹಬ್ಬ. ವಿಷ್ಣು ಚಿತ್ರಜೀವನದಲ್ಲಿ ಹಲವು ಮೈಲುಗಲ್ಲು ಚಿತ್ರಗಳಿವೆ. ಅವುಗಳಲ್ಲಿ ನಿಷ್ಕರ್ಷ ಚಿತ್ರವೂ ಒಂದು. ಕನ್ನಡದ ಅದ್ಭುತ ಥ್ರಿಲ್ಲರ್ ಸಿನಿಮಾ. ಅವರ ಹುಟ್ಟುಹಬ್ಬಕ್ಕಾಗಿಯೇ ರಿಲೀಸ್ ಆಗುತ್ತಿರುವ ಈ ಚಿತ್ರಕ್ಕೆ ವಿಷ್ಣುವರ್ಧನ್ ಪಡೆದಿದ್ದ ಸಂಭಾವನೆ ಎಷ್ಟು..?

    ಆಗ ವಿಷ್ಣುವರ್ಧನ್ ಅವರಿಗೆ 7.5 ಲಕ್ಷ ಸಂಭಾವನೆಗೆ ಮಾತನಾಡಿದ್ದೆವು. ಅನಂತ್ ನಾಗ್ ಅವರಿಗೆ 2 ಲಕ್ಷ ರೂ. ಸಂಭಾವನೆ. ಆದರೆ ಚಿತ್ರ ಸಾಗುತ್ತಾ ಹೋದಂತೆ ನಾವು ಪಡುತ್ತಿದ್ದ ಕಷ್ಟಗಳನ್ನು ನೋಡಿ ವಿಷ್ಣುವರ್ಧನ್ ಸಂಭಾವನೆಯಲ್ಲಿ 1 ಲಕ್ಷ ರೂ. ಬಿಟ್ಟಿದ್ದರು. 6.5 ಲಕ್ಷ ರೂ. ಸಂಭಾವನೆ ಪಡೆದರು.

    ನಿಷ್ಕರ್ಷ ಚಿತ್ರ ಗೆದ್ದಿದ್ದು ನೋಡಿ ಅವರಿಗೆ ಖುಷಿಯಾಗಿತ್ತು. ಸಂಘರ್ಷದಲ್ಲಿ ಕಳೆದುಕೊಂಡಿದ್ದನ್ನು ದೇಸಾಯಿ ಮತ್ತು ವಿಷ್ಣುವರ್ಧನ್ ನಿಷ್ಕರ್ಷದಲ್ಲಿ ಪಡೆದಿದ್ದರು.

  • ಪಡ್ಡೆಹುಲಿ ಕಥೆಗೂ ಸಾಹಸ ಸಿಂಹನಿಗೂ ಇದೆ ನಂಟು

    relationship between paddehuli and vishnuvardhan

    ನಿರ್ಮಾಪಕ ಕೆ.ಮಂಜು, ವಿಷ್ಣುವರ್ಧನ್ ಅವರ ಕಟ್ಟಾ ಅಭಿಮಾನಿಯಾಗಿದ್ದವರು. ಅವರ ಕೊನೆಯ ದಿನಗಳಲ್ಲಿ ವಿಷ್ಣು ಜೊತೆಗಿದ್ದ ಆತ್ಮೀಯರಲ್ಲಿ ಮಂಜು ಕೂಡಾ ಒಬ್ಬರು. ಈಗ ಅವರ ಮಗ ಶ್ರೇಯಸ್ ಹೀರೋ ಆಗಿ ಬರುತ್ತಿದ್ದಾರೆ. ಪಡ್ಡೆಹುಲಿ ಚಿತ್ರದಲ್ಲಿ ಶ್ರೇಯಸ್, ವಿಷ್ಣು ಅಭಿಮಾನಿಯಾಗಿಯೇ ಎಂಟ್ರಿ ಕೊಡುತ್ತಿದ್ದಾರೆ. 

    ಮಗನ ಮೊದಲ ಚಿತ್ರದಲ್ಲಿ ಶ್ರೇಯಸ್‍ಗೆ ನಾಗರಹಾವು ವಿಷ್ಣು ಗೆಟಪ್‍ನಲ್ಲಿ ಚಿತ್ರದುರ್ಗದ ಕೋಟೆಯಲ್ಲೇ ಹಾಡು ಸೃಷ್ಟಿಸಿದ್ದಾರೆ. ರಾಜಾಹುಲಿ ಖ್ಯಾತಿಯ ನಿರ್ದೇಶಕ ಗುರು ದೇಶಪಾಂಡೆ, ಮ್ಯೂಸಿಕಲ್ ಲವ್ ಸ್ಟೋರಿ ಮಾಡಿದ್ದಾರೆ. ಇದೆಲ್ಲದರ ಜೊತೆಗೆ ವಿಷ್ಣುವರ್ಧನ್ ಅವರಿಗೂ ಈ ಚಿತ್ರದ ಕಥೆಗೂ ಒಂದು ಭಾವನಾತ್ಮಕ ನಂಟು ಇದೆ.

    ವಿಷ್ಣುವರ್ಧನ್ ಅವರೇ ಒಮ್ಮೆ ಮಂಜು ಅವರಿಗೆ ಕಾಲೇಜ್ ಬೇಸ್ ಇರುವ ಲವ್ ಸ್ಟೋರಿಯ ಎಳೆಯನ್ನು ಹೇಳಿದ್ದರಂತೆ. ಅದು ಮಂಜು ಅವರಿಗೂ ಇಷ್ಟವಾಗಿತ್ತು. ಅದನ್ನು ಡೆವಲಪ್ ಮಾಡು, ಒಳ್ಳೆ ಸಿನಿಮಾ ಆಗುತ್ತೆ ಎಂದು ಕೂಡಾ ಹೇಳಿದ್ದರಂತೆ.

    ತಮ್ಮ ಮಗನನ್ನು ಗ್ರ್ಯಾಂಡ್ ಆಗಿ ಎಂಟ್ರಿ ಕೊಡಿಸಲು ಕಥೆಯ ಹುಡುಕಾಟದಲ್ಲಿದ್ದಾಗ ನೆನಪಾಗಿದ್ದು ಈ ಕಥೆ. ಅದು ವಿಷ್ಣು ಆಶೀರ್ವಾದ ಎಂದೇ ನಂಬಿಕೊಂಡು ಸಿನಿಮಾ ರೆಡಿ ಮಾಡಿದ್ದಾರೆ.

    ರಮೇಶ್ ರೆಡ್ಡಿ ನಿರ್ಮಾಣದ ಚಿತ್ರದಲ್ಲಿ ರವಿಚಂದ್ರನ್, ಸುಧಾರಾಣಿ, ರಕ್ಷಿತ್ ಶೆಟ್ಟಿ, ಪುನೀತ್ ರಾಜ್‍ಕುಮಾರ್ ಕೂಡಾ ನಟಿಸಿದ್ದಾರೆ. ಅಮ್ಮ ಐ ಲವ್ ಯು ಖ್ಯಾತಿಯ ನಿಶ್ವಿಕಾ ನಾಯ್ಡು ನಾಯಕಿ. 

  • ಪಡ್ಡೆಹುಲಿಯ ವಿಷ್ಣು ಪ್ರೇಮ

    paddehli vishnu rap song

    ಪಡ್ಡೆಹುಲಿ. ವಿಷ್ಣುವರ್ಧನ್ ಅವರನ್ನು ಗುರು ಎಂದೇ ಸ್ವೀಕರಿಸಿರುವ ಕೆ.ಮಂಜು ಅವರ ಮಗ ಶ್ರೇಯಸ್ ಅಬಿನಯದ ಮೊದಲ ಸಿನಿಮಾ. ಗುರುದೇಶಪಾಂಡೆ ನಿರ್ದೇಶನದ ಪಡ್ಡೆಹುಲಿ ಚಿತ್ರತಂಡ, ವಿಷ್ಣು ಹುಟ್ಟುಹಬ್ಬಕ್ಕೆ ವಿಶೇಷ ರ್ಯಾಪ್ ಸಾಂಗ್ ರಿಲೀಸ್ ಮಾಡುತ್ತಿದೆ. ಅಜನೀಶ್ ಲೋಕನಾಥ್ ಸಂಗೀತ ನಿರ್ದೇಶನದಲ್ಲಿ ಚಾಮುಂಡಿ ತಾಯಿ ಮಡಿಲಲ್ಲಿ ಹುಟ್ಟಿ, ದುರ್ಗದ ಕೋಟೆಯಲ್ಲಿ ಬೆಳಕು ಕಂಡ ವಿಷ್ಣು ಚಿತ್ರಣವಿದೆ.

    ಸಿನಿಮಾದಲ್ಲಿ ಹೀರೋ ವಿಷ್ಣುವರ್ಧನ್ ಅಭಿಮಾನಿ. ನಾಯಕ ಗುರಿ ಮುಟ್ಟುವುದಕ್ಕೆ ನಾಗರಹಾವು ಸಿನಿಮಾ ಸ್ಫೂರ್ತಿಯಾಗುತ್ತೆ. ಚಿತ್ರದ ಕಥೆ ಶುರುವಾಗುವುದೇ ಚಿತ್ರದುರ್ಗದ ಕೋಟೆಯಿಂದ ಎಂದು ಕಥೆಯ ಒಂದಿಷ್ಟು ಎಳೆ ಬಿಟ್ಟುಕೊಟ್ಟಿದ್ದಾರೆ ಗುರು ದೇಶಪಾಂಡೆ.

    ನನಗೆ ವಿಷ್ಣು ಸರ್ ಗುರುಗಳು. ನನ್ನ ಬದುಕಿನ ಬಹುದೊಡ್ಡ ತಿರುವು, ಯಶಸ್ಸಿಗೆ ವಿಷ್ಣು ಸರ್ ಕಾರಣ. ಹೀಗಾಗಿ ನನ್ನ ಮಗನ ಮೊದಲ ಸಿನಿಮಾ ವಿಷ್ಣು ಸರ್ ಆಶೀರ್ವಾದ ಬೇಕು. ಅವರಿಗೆ ನಮನ ಸಲ್ಲಿಸಲಿಕ್ಕೆಂದೇ ಪಡ್ಡೆಹುಲಿ ಚಿತ್ರ ತಂಡದಿಂದ ಈ ರ್ಯಾಪ್ ಸಾಂಗ್ ಮಾಡಿದ್ದೇವೆ ಎಂದು ತಿಳಿಸಿದ್ದಾರೆ ಕೆ.ಮಂಜು.

  • ರಾಮಾಚಾರಿ, ಜಲೀಲ ಒಂದೇ ಚಿತ್ರದಲ್ಲಿ..!

    vishnu and ambi unite in rajasimha

    ವಿಷ್ಣುವರ್ಧನ್ ಮತ್ತು ಅಂಬರೀಷ್ ಚಿತ್ರರಂಗಕ್ಕೆ ಒಟ್ಟಿಗೇ ಬಂದವರು. ಅಂಬರೀಷ್ ಖಳನ ಪಾತ್ರಗಳಿಂದ ಆರಂಭಿಸಿ ರೆಬಲ್‍ಸ್ಟಾರ್ ಆದರೆ, ವಿಷ್ಣುವರ್ಧನ್ ಸಾಹಸ ಸಿಂಹನಾಗಿ ಮೆರೆದರು. ವಿಶೇಷವೆಂದರೆ ಪರಸ್ಪರ ಸ್ಪರ್ಧಿಗಳಾಗಿದ್ದರೂ ಅಂಬರೀಷ್ ಮತ್ತು ವಿಷ್ಣು ಜೀವದ ಗೆಳೆಯರು. ಅದು ಗುಟ್ಟಾಗಿಯೇನೂ ಇರಲಿಲ್ಲ. ಪರಸ್ಪರರ ಏಳಿಗೆಗೆ ನೆರವಾಗುತ್ತಿದ್ದ, ಸಂಕಟಗಳಲ್ಲಿ ಜೊತೆಯಾಗುತ್ತಿದ್ದ ಇಬ್ಬರೂ ಅದೆಷ್ಟೋ ಚಿತ್ರಗಳಲ್ಲಿ ಒಟ್ಟಿಗೇ ನಟಿಸಿದ್ದಾರೆ. 

    ಅದರಲ್ಲಿಯೂ ದಿಗ್ಗಜರು ಚಿತ್ರದಲ್ಲಿ ವಿಷ್ಣು ಮತ್ತು ಅಂಬಿಯನ್ನು ನೋಡಿದವರು, ಅವರನ್ನು ಪಾತ್ರಗಳಾಗಿ ನೋಡಿರಲೇ ಇಲ್ಲ ಎನ್ನುವುದರಲ್ಲೇ ಕುಚಿಕು ಗೆಳೆಯರ ಶ್ರೇಯಸ್ಸಿದೆ. ಈಗ ಅವರಿಬ್ಬರೂ ಒಟ್ಟಿಗೇ, ಒಂದೇ ಚಿತ್ರದಲ್ಲಿ ನಟಿಸಿದ್ದಾರೆ. 

    ಹೇಗೆ ಅಂತಾ ಗೊಂದಲ ಬೇಡ. ರಾಜಸಿಂಹ ಚಿತ್ರದಲ್ಲಿ ವಿಷ್ಣುವರ್ಧನ್ ಅವರನ್ನು ಗ್ರಾಫಿಕ್ಸ್‍ನಲ್ಲಿ ಮರುಸೃಷ್ಟಿ ಮಾಡಲಾಗಿದೆ. ಅದೇ ಚಿತ್ರದಲ್ಲಿ ಅಂಬರೀಷ್ ಕೂಡಾ ಪ್ರಮುಖ ಪಾತ್ರವೊಂದರಲ್ಲಿ ನಟಿಸಿದ್ದಾರೆ. ವಿಷ್ಣು ಪತ್ನಿಯಾಗಿ ನಟಿಸಿರುವುದು ಭಾರತಿ. ವಿಷ್ಣು, ಸಿಂಹಾದ್ರಿಯ ಸಿಂಹನ ನರಸಿಂಹ ಗೌಡನಾಗಿ ಬರಲಿದ್ದಾರೆ. ಕುಚ್ಚಿಕು ಗೆಳೆಯರ ಪುನರ್‍ಮಿಲನವನ್ನು ಕಣ್ತುಂಬಿಕೊಳ್ಳೋಕೆ ಅಭಿಮಾನಿಗಳೂ ಕಾಯುತ್ತಿದ್ದಾರೆ. 

  • ವಿಲನ್ ಪಾತ್ರಕ್ಕೆ ಡಿಮ್ಯಾಂಡ್ ಇಟ್ಟು ನಿರ್ಮಾಪಕರಾಗಿದ್ದ ಬಿ.ಸಿ.ಪಾಟೀಲ್

    what was bc patils condition to suni kumar desai

    ನಿಷ್ಕರ್ಷ ಚಿತ್ರ 90ರ ದಶಕದ ಸೂಪರ್ ಡ್ಯೂಪರ್ ಹಿಟ್ ಸಿನಿಮಾ. ರೆಗ್ಯುಲರ್ ಲೆಕ್ಕಾಚಾರಗಳನ್ನೆಲ್ಲ ಉಲ್ಟಾ ಮಾಡಿ, ಸಿದ್ಧಸೂತ್ರಗಳನ್ನೆಲ್ಲ ಆಚೆಯಿಟ್ಟು ನಿರ್ಮಿಸಿದ್ದ ಸಿನಿಮಾ. ಎಷ್ಟರಮಟ್ಟಿಗೆಂದರೆ ವಿಷ್ಣುವರ್ಧನ್, ಅನಂತ್ ನಾಗ್ ಇದ್ದರೂ.. ಈ ಚಿತ್ರ ಕನ್ನಡಕ್ಕಲ್ಲ ಎಂದು ವಿತರಕರು ಚಿತ್ರವನ್ನು ತೆಗೆದುಕೊಳ್ಳಲು ಹೆದರಿದ್ದರು. ಇಷ್ಟೆಲ್ಲ ಆಗಿ ಸಿನಿಮಾವನ್ನು ರಿಲೀಸ್ ಮಾಡಿ ಗೆದ್ದಿದ್ದರು ಬಿ.ಸಿ.ಪಾಟೀಲ್.

    ವಿಶೇಷವೇನು ಗೊತ್ತೇ.. ಚಿತ್ರದ ನಿರ್ಮಾಪಕ ಬಿ.ಸಿ.ಪಾಟೀಲ್ ನಿರ್ದೇಶಕ ದೇಸಾಯಿ ಅವರ ಎದುರು ಒಂದು ಕಂಡಿಷನ್ ಇಟ್ಟಿದ್ದರಂತೆ. ನನ್ನನ್ನು ವಿಲನ್ ಮಾಡುವುದಾದರೆ ನಾನು ಸಿನಿಮಾ ನಿರ್ಮಾಪಕನಾಗುತ್ತೇನೆ ಎಂದಿದ್ದರಂತೆ. ಅರೆ.. ದುಡ್ಡು ಹಾಕುವ, ನೋಡಲು ಚೆನ್ನಾಗಿಯೂ ಇರುವ ಬಿ.ಸಿ.ಪಾಟೀಲ್, ಹೀರೋ ಪಾತ್ರಕ್ಕೆ ಡಿಮ್ಯಾಂಡ್ ಇಡಬಹುದಾಗಿತ್ತಲ್ಲ ಎನ್ನುತ್ತೀರಾ..? ಅಲ್ಲಿಯೇ ಇರೋದು ಸ್ವಾರಸ್ಯ.

    ``ದೇಸಾಯಿ ನಿರ್ದೇಶನದ ಉತ್ಕರ್ಷದಲ್ಲಿ ಅಂಬರೀಷ್ ಹೀರೋ. ಆದರೆ ಮಿಂಚಿದ್ದು ದೇವರಾಜ್. ತರ್ಕ ಚಿತ್ರದಲ್ಲಿ ಶಂಕರ್ ನಾಗ್ ಹೀರೋ. ಆದರೆ ಮಿಂಚಿದ್ದು ದೇವರಾಜ್. ಹೀಗಾಗಿ ದೇಸಾಯಿ ಚಿತ್ರದಲ್ಲಿ ವಿಲನ್ ಆದರೆ ಮಿಂಚಬಹುದು ಎಂದುಕೊಂಡು ವಿಲನ್ ಪಾತ್ರಕ್ಕೆ ಷರತ್ತು ಹಾಕಿದ್ದೆ' ಎನ್ನುತ್ತಾರೆ ಬಿ.ಸಿ.ಪಾಟೀಲ್.

    ವಿಷ್ಣು, ಅನಂತ್ ಅವರಂತಹ ಸೀನಿಯರ್ ನಟರ ಎದುರು ಹೊಸಬನನ್ನು ವಿಲನ್ ಮಾಡುವುದು ಹೇಗೆ ಎಂಬ ಹಿಂಜರಿಕೆಯಲ್ಲೇ ಪಾತ್ರ ಕೊಟ್ಟಿದ್ದರಂತೆ ದೇಸಾಯಿ. ಆದರೆ ಸಿನಿಮಾ ನೋಡುವಾಗ ಜನರು ಬಿ.ಸಿ.ಪಾಟೀಲರಿಗೆ ಬೈಯ್ಯುವುದನ್ನು ನೋಡಿ ಗೆದ್ದುಬಿಟ್ರಿ ನೀವು ಎಂದು ಬೆನ್ನು ತಟ್ಟಿದ್ದರಂತೆ ದೇಸಾಯಿ.

  • ವಿಷ್ಣು ಅಭಿಮಾನದ ಉತ್ಸವದಲ್ಲಿ ಏನಿದು ವಿವಾದ..?

    what is vishnuvardhan's birthday controversy

    ಇದೇ ಸೆಪ್ಟೆಂಬರ್ 18ಕ್ಕೆ ವಿಷ್ಣುವರ್ಧನ್ ಅವರ 68ನೇ ಹುಟ್ಟುಹಬ್ಬವಿದೆ. ವಿಷ್ಣುವರ್ಧನ್ ಅವರ ಹುಟ್ಟುಹಬ್ಬವನ್ನ ವಿಷ್ಣು ಅಭಿಮಾನಿಗಳ ಸಂಘ ವಿಷ್ಣು ಸೇನಾ ಸಮಿತಿ ಅದ್ಧೂರಿಯಾಗಿ ಆಚರಿಸುತ್ತಿದೆ. ಇದರ ನಡುವೆಯೇ ಭಾರತಿ ವಿಷ್ಣುವರ್ಧನ್ ನೀಡಿರುವ ಹೇಳಿಕೆ ಆರೋಪ ಪ್ರತ್ಯಾರೋಪಕ್ಕೆ ಕಾರಣವಾಗಿದೆ.

    ಯಜಮಾನರು ಆಡಂಬರದ ಕಾರ್ಯಕ್ರಮ ಇಷ್ಟಪಡುತ್ತಿರಲಿಲ್ಲ. ಕೆಲವರು ಅವರ ಹೆಸರಿನಲ್ಲಿ ಉತ್ಸವ, ಕಾರ್ಯಕ್ರಮ ಮಾಡಿ ಹೊಟ್ಟೆ ತುಂಬಿಸಿಕೊಳ್ಳುತ್ತಿದ್ದಾರೆ ಎಂದು ಆರೋಪಿಸಿದ್ದರು ಭಾರತಿ ವಿಷ್ಣುವರ್ಧನ್.

    ಈ ಕುರಿತು ಪ್ರತಿಕ್ರಿಯೆ ನೀಡಿರುವು ವಿಷ್ಣು ಸೇನಾ ಸಮಿತಿ ಅಧ್ಯಕ್ಷ ವೀರಕಪುತ್ರ ಶ್ರೀನಿವಾಸ್, ವಿಷ್ಣುವರ್ಧನ್ ಹುಟ್ಟುಹಬ್ಬವನ್ನು ಆಚರಿಸಲು ಯಾರಿಂದಲೂ ಹಣ ಸ್ವೀಕರಿಸಿಲ್ಲ. ನಮ್ಮ ಸ್ವಂತ ಹಣದಿಂದ, ಕೇವಲ ಅಭಿಮಾನದಿಂದ ಖರ್ಚು ಮಾಡುತ್ತಿದ್ದೇವೆ. ಅಷ್ಟೇ ಅಲ್ಲ, ವಿಷ್ಣು ಅವರ ಹುಟ್ಟುಹಬ್ಬವನ್ನು ಅದ್ಧೂರಿತನಕ್ಕಿಂತ ಹೆಚ್ಚಾಗಿ ಸಮಾಜಮುಖಿ ಕಾರ್ಯಕ್ರಮಗಳ ಮೂಲಕ ಆಚರಿಸುತ್ತಿದ್ದೇವೆ ಎಂದಿದ್ದಾರೆ.

    ಇದರ ನಡುವೆ ಸ್ಮಾರಕ ವಿವಾದವೂ ಮತ್ತೊಮ್ಮೆ ಕೇಳಿಸಿದೆ. ವಿಷ್ಣು ಸ್ಮಾರಕ ಕುರಿತಂತೆ ಇದುವರೆಗೆ 6 ಸಿಎಂಗಳನ್ನು ಭೇಟಿ ಮಾಡಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ. ಕಾಣದ ಕೈಗಳು ಅಡ್ಡಿಪಡಿಸುತ್ತಿವೆ ಎಂದು ದೂರಿದ್ದಾರೆ ಭಾರತಿ.

    ಈ ಕುರಿತು ಅಭಿಮಾನಿ ಸಂಘದ ಅಧ್ಯಕ್ಷ ವೀರಕಪುತ್ರ ಶ್ರೀನಿವಾಸ್ ಹೇಳುವುದು ಇಷ್ಟು. ಸ್ಮಾರಕ ಮೈಸೂರಿನಲ್ಲಿ ಆಗುವುದಕ್ಕೆ ನಮ್ಮ ವಿರೋಧವಿದೆ. ಅವರ ಸಂಸ್ಕಾರ ನಡೆದ ಸ್ಥಳದಲ್ಲೇ ಸ್ಮಾರಕವೂ ಆಗಲಿ ಎನ್ನುವುದು ನಮ್ಮ ಬಯಕೆ. ಅಷ್ಟೇ ಹೊರತು ಮತ್ತೇನಿಲ್ಲ. ಇನ್ನು ವಿಷ್ಣು ಅವರ ಹುಟ್ಟುಹಬ್ಬವನ್ನು ನಮ್ಮ ಉಸಿರು ಇರುವವರೆಗೂ ಆಚರಿಸುತ್ತೇವೆ. ನಮ್ಮ ಅಭಿಮಾನ ಎಂಥದ್ದು ಎಂದು ಯಾರಿಗೂ ಹೇಳಬೇಕಿಲ್ಲ. ಭಾರತಿ ಅವರ ಮಾತು ನೋವು ತಂದಿದೆ ಎಂದಿದ್ದಾರೆ.

  • ವಿಷ್ಣು ಓದಿದ ಶಾಲೆಗಾಗಿ ಅಭಿಮಾನಿಗಳ ಹೋರಾಟ

    vishnu doctorate

    ಸಾಹಸಸಿಂಹ ವಿಷ್ಣುವರ್ಧನ್ ಅವರು ಓದಿದ್ದ ಶಾಲೆ ಚಾಮರಾಜಪೇಟೆಯ ಮಾಡೆಲ್ ಸ್ಕೂಲ್ ಎಜುಕೇಷನ್ ಸೊಸೈಟಿ. ನಿಮಗೆ ಇನ್ನೂ ಒಂದು ವಿಷಯ ನೆನಪಿರಲಿ. ಅದು ಬೆಂಗಳೂರಿನ ಪ್ರಪ್ರಥಮ ಕನ್ನಡ ಶಾಲೆಯೂ ಹೌದು. ಇದೇ ಶಾಲೆಯಲ್ಲಿ ಖ್ಯಾತ ನಟ ರಮೇಶ್‍ಭಟ್ ಕೂಡಾ ಓದಿದ್ದರು ಎಂಬುದು ನಿಮ್ಮ ಗಮನಕ್ಕಿರಲಿ. ಈ ಎಲ್ಲ ಕಾರಣಗಳಿಂದಾಗಿ, ಈ ಶಾಲೆ ಕರ್ನಾಟಕದ ಹೆಮ್ಮೆಯಾಗಬೇಕಿತ್ತು. ಆದರೆ, ಆ ಶಾಲೆಯನ್ನೀಗ ಮುಚ್ಚಲು ಹೊರಟಿದೆ ಸರ್ಕಾ

    ಶಾಲೆಯಲ್ಲಿ ವಿದ್ಯಾರ್ಥಿಗಳ ಸಂಖ್ಯೆ ಕಡಿಮೆ ಇದೆ. ಫಲಿತಾಂಶವೂ ಸರಿಯಾಗಿ ಬರುತ್ತಿಲ್ಲ ಎನ್ನುವುದು ಸರ್ಕಾರ ಶಾಲೆಯನ್ನು ನೀಡುತ್ತಿರುವ ಕಾರಣ. ಆದರೆ, ಇದೇ ಸರ್ಕಾರ 15 ವರ್ಷಗಳಿಂದ ಶಾಲೆಗೆ ಗಣಿತ ಶಿಕ್ಷಕರನ್ನು ನೀಡಿಲ್ಲ ಎನ್ನವುದನ್ನು ಮರೆತುಬಿಟ್ಟಿದೆ. ಶಿಕ್ಷಕರನ್ನೇ ನೀಡದ ಸರ್ಕಾರ, ಈಗ ಕಳಪೆ ಫಲಿತಾಂಶಕ್ಕೆ ಶಾಲೆಯನ್ನೇ ಬಲಿ ಕೊಡಲು ಮುಂದಾಗಿದೆ. ಇನ್ನೂ ಒಂದು ವಿಷಯ ನೆನಪಿರಲಿ, ಈ ಶಾಲೆಯಲ್ಲಿ ನೂರಾರು ಅನಾಥ ಮಕ್ಕಳು ವಿದ್ಯಾಭ್ಯಾಸ ಮಾಡಿದ್ದಾರೆ.

    ಸರ್ಕಾರದ ಈ ನಿರ್ಧಾರದ ವಿರುದ್ಧ ವಿಷ್ಣು ಅಭಿಮಾನಿಗಳು ಆಕ್ರೋಶಗೊಂಡಿದ್ದಾರೆ. ಶಿಕ್ಷಕರನ್ನೇ ನೀಡದೆ ಫಲಿತಾಂಶದ ನಿರೀಕ್ಷೆ ಮಾಡುತ್ತಿರುವ ಸರ್ಕಾರದ ಹೊಣೆಗೇಡಿತನದ ವಿರುದ್ಧ ಬೀದಿಗಿಳಿಯುತ್ತಿದ್ದಾರೆ. ಇಂದು ಡಾ.ವಿಷ್ಣು ಸೇನಾ ಸಮಿತಿ ಸದಸ್ಯರು ಚಾಮರಾಜಪೇಟೆಯ ಈ ಶಾಲೆಯ ಎದುರು ಪ್ರತಿಭಟನೆ ನಡೆಸಲಿದ್ದಾರೆ. ಕನ್ನಡ ಚಿತ್ರಕಲಾವಿದರು, ಸಾಹಿತಿಗಳೂ ಕೂಡಾ ಈ ಹೋರಾಟದಲ್ಲಿ ಭಾಗಿಯಾಗಲಿದ್ದಾರೆ.

    ವಿಷ್ಣುವರ್ಧನ್‍ರಂತಹ ಕನ್ನಡದ ಖ್ಯಾತ ಕಲಾವಿದ ಕಲಿತ ಶಾಲೆ, ಬೆಂಗಳೂರಿನ ಪ್ರಪ್ರಥಮ ಕನ್ನಡ ಶಾಲೆಯನ್ನು ಉಳಿಸಿಕೊಳ್ಳಬೇಕಾದ ಜವಾಬ್ದಾರಿ ಸರ್ಕಾರದ್ದು.

  • ವಿಷ್ಣು ರಾಷ್ಟ್ರೀಯ ಉತ್ಸವ ಅದ್ಧೂರಿ..

    vishnu national film festival

    ಡಾ.ವಿಷ್ಣುವರ್ಧನ್ ಅವರ ಹುಟ್ಟುಹಬ್ಬದ ಪ್ರಯುಕ್ತ ಬೆಂಗಳೂರಿನಲ್ಲಿ ವಿಷ್ಣುಸೇನಾ ಸಮಿತಿಯಿಂದ ನಡೆಯುತ್ತಿರುವ ಡಾ.ವಿಷ್ಣುವರ್ಧನ್ ರಾಷ್ಟ್ರೀಯ ಉತ್ಸವಕ್ಕೆ ಭರ್ಜರಿ ಚಾಲನೆ ಸಿಕ್ಕಿದೆ. ಉತ್ಸವದಲ್ಲಿ ಕಿಚ್ಚ ಸುದೀಪ್, ವಿಷ್ಣುಗೀತೆಯನ್ನು ಹಾಡಿ ರಂಜಿಸಿದರು. ವೇದಿಕೆಯಲ್ಲಿ ವಿಷ್ಣು ಸ್ಮಾರಕ ವಿವಾದವೂ ಪ್ರಸ್ತಾಪವಾಯ್ತು.

    ಮೈಸೂರಿನಲ್ಲಿ ವಿಷ್ಣುವರ್ಧನ್ ಸ್ಮಾರಕ ನಿರ್ಮಾಣವಾಗಲಿ, ಬೆಂಗಳೂರಿನಲ್ಲಿರುವ ಅಂತ್ಯಕ್ರಿಯೆ ನಡೆದ ಸ್ಥಳ ಪುಣ್ಯಭೂಮಿಯಾಗಲಿ ಎಂದು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಸಾಹಿತಿಗಳು, ಕಲಾವಿದರು ಸರ್ಕಾರಕ್ಕೆ ಮನವಿ ಮಾಡಿದರು. ನಾವು ವಿಷ್ಣು ಅಭಿಮಾನಿಗಳು. ನಾವು ಮಾಡುವ ಕೆಲಸವನ್ನು ಶಿಸ್ತಿನಿಂದ ಮಾಡಿದರೆ ಸೂಕ್ತ ಫಲ ಸಿಗಲಿದೆ ಎಂದರು ಕಿಚ್ಚ ಸುದೀಪ್.

    ಕಾರ್ಯಕ್ರಮದಲ್ಲಿ ಹಿರಿಯ ಪತ್ರಕರ್ತ, ಸಾಹಿತಿ, ಕನ್ನಡಪ್ರಭದ ಪುರವಣಿ ಸಂಪಾದಕ ಜೋಗಿ ಅವರ `ಮಾತು ಮೌನ ಧ್ಯಾನ ವಿಷ್ಣುವರ್ಧನ' ಹಾಗೂ ಬಿಟಿವಿವಿ ಸಿನಿಮಾ ವಿಭಾಗದ ಮುಖ್ಯಸ್ಥ ಸದಾಶಿವ ಶೆಣೈ ಅವರ `ಮುಗಿಯದಿರಲಿ ಸಾಹಸಸಿಂಹ' ಮತ್ತು ಮನು ಅವರ `ಸಾಹಸಸಿಂಹ' ಕಾದಂಬರಿ ಕೃತಿಗಳು ಲೋಕಾರ್ಪಣೆಗೊಂಡವು.

    ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಕನ್ನಡಪ್ರಭ-ಸುವರ್ಣ ನ್ಯೂಸ್ ಪ್ರಧಾನ ಸಂಪಾದಕ ರವಿ ಹೆಗಡೆ, ವಿಷ್ಣು ಸ್ಮಾರಕ ನಿರ್ಮಾಣ ಕುರಿತು ವಿಷ್ಣು ಸೇನಾ ಸಮಿತಿ ನಡೆಸುತ್ತಿರುವ ಹೋರಾಟಕ್ಕೆ ಬೆಂಬಲ ಸೂಚಿಸಿದರು.

  • ವಿಷ್ಣು ಸ್ಮಾರಕಕ್ಕೆ ಜಾಗ ನೀಡಲು ಬಂದ ವಿಷ್ಣುದಾದಾ ಫ್ಯಾನ್ಸ್ ಎಷ್ಟು ಜನ ಗೊತ್ತಾ..? 

    vishnu fans comes forward to help vishnu memorial

    ವಿಷ್ಣು ಸ್ಮಾರಕ ಎಲ್ಲಿ ಆಗಬೇಕು ಎಂಬ ವಿವಾದ ಜಟಾಪಟಿಗೆ ಕಾರಣವಾಗಿರುವಾಗಲೇ, ಜಾಗ ನೀಡಲು ಹಾಗೂ ಖರ್ಚು ವೆಚ್ಚದ ಹೊಣೆ ಹೊತ್ತುಕೊಳ್ಳಲು ವಿಷ್ಣು ಅಭಿಮಾನಿಗಳು ನಾ ಮುಂದು ತಾ ಮುಂದು ಎಂದು ಮುಂದೆ ಬಂದಿದ್ದಾರೆ.

    ನಿರ್ಮಾಪಕ ಕೆ.ಮಂಜು, ವಿಷ್ಣು ಪುಣ್ಯಭೂಮಿ ಸ್ಥಳದಲ್ಲಿ 15000 ಚದರಡಿ ಜಾಗವನ್ನು ಸ್ವಂತ ಖರ್ಚಿನಲ್ಲಿ ಖರೀದಿಸಿ ವಿಷ್ಣು ಸ್ಮಾರಕಕ್ಕೆ ನೀಡುವುದಾಗಿ ಘೋಷಿಸಿದ್ದಾರೆ. ಕೆ.ಮಂಜು, ವಿಷ್ಣುವರ್ಧನ್ ಅವರ ಅತಿದೊಡ್ಡ ಅಭಿಮಾನಿಯಾಗಿದ್ದವರು.

    ಮತ್ತೊಬ್ಬ ವಿಷ್ಣು ಅಭಿಮಾನಿ ಲೋಕೇಶ್ ಎಂಬುವವರು 50 ಲಕ್ಷ ರೂ. ನೀಡಲು ಮುಂದೆ ಬಂದಿದ್ದಾರೆ.

    ಮಂಡ್ಯದ ಉಂಡುವಾಡಿ ಗ್ರಾಮದ ಅಭಿಮಾನಿ ರಾಜಣ್ಣ ಎಂಬುವವರು ಕೆಆರ್‍ಎಸ್ ಬಳಿ ತಮ್ಮ 8 ಸಾವಿರ ಚದರ ಅಡಿ ಜಾಗವನ್ನು ಉಚಿತವಾಗಿ ಕೊಡುತ್ತೆನೆ. ಇನ್ನೂ ಬೇಕು ಎಂದರೆ, ಅದರ ಪಕ್ಕದಲ್ಲಿಯೇ ಇರುವ 13 ಗುಂಟೆ ಜಾಗವನ್ನು ಖರೀದಿಸಿ ಕೊಡುತ್ತೇನೆ ಎಂದಿದ್ದಾರೆ.

    ದಾವಣಗೆರೆಯ ರೈತರೊಬ್ಬರು ವಿಷ್ಣು ಸ್ಮಾರಕಕ್ಕೆ 2 ಎಕರೆ ಜಾಗ ನೀಡೋದಾಗಿ ಹೇಳಿದರೆ, ಮೇಲುಕೋಟೆಯ ರಾಜು, ಮೈಸೂರಿನಲ್ಲಿ 15 ಸಾವಿರ ಚದರಡಿ ನಿವೇಶನ ಕೊಡೋದಾಗಿ ಹೇಳಿದ್ದಾರೆ.

    ಇದು ಕೇವಲ ಅಭಿಮಾನಕ್ಕಾಗಿ. ದಟ್ ಈಸ್ ವಿಷ್ಣುವರ್ಧನ್.

  • ವಿಷ್ಣು ಹುಟ್ಟುಹಬ್ಬಕ್ಕೆ ಆಪ್ತಮಿತ್ರ-2

    p vasu, vishnuvardhan image

    ಇದೇ ಸೆಪ್ಟೆಂಬರ್ 18ಕ್ಕೆ ವಿಷ್ಣುವರ್ಧನ್ ಹುಟ್ಟುಹಬ್ಬವಿದೆ. ಆ ಹುಟ್ಟುಹಬ್ಬದ ದಿನ ಆಪ್ತಮಿತ್ರ-2 ಸೆಟ್ಟೇರುತ್ತಿದೆ. ಆ ಚಿತ್ರ ನಿರ್ಮಿಸುತ್ತಿರುವುದು ರಮೇಶ್ ಬಾಬು. ನಿರ್ದೇಶಕ ಒನ್ಸ್ ಎಗೇಯ್ನ್ ಪಿ.ವಾಸು. ಒಟ್ಟಿನಲ್ಲಿ ಬರೋಬ್ಬರಿ 13 ವರ್ಷಗಳ ನಂತರ ಆಪ್ತಮಿತ್ರ-2 ಬರುತ್ತಿದೆ. ಹಾಗೆ ನೋಡಿದರೆ, ವಿಷ್ಣು ಅಭಿನಯದ ಕೊನೆಯ ಚಿತ್ರ ಆಪ್ತರಕ್ಷಕ, ಆಪ್ತಮಿತ್ರ ಚಿತ್ರದ ಮುಂದುವರಿದ ಭಾಗದಂತೆಯೇ ಇತ್ತಾದರೂ, ನಿರ್ಮಾಪಕರು ಬೇರೆಯಾಗಿದ್ದರು. ಆಪ್ತಮಿತ್ರ ಎಂಬ ಹೆಸರು ಬಳಕೆಯಾಗಿರಲಿಲ್ಲ.

    ಇಲ್ಲಿಯವರೆಗೆ 21 ಚಿತ್ರ ನಿರ್ಮಿಸಿರುವ ರಮೇಶ್ ಬಾಬು, ವಿಷ್ಣು ಅಭಿಮಾನಿಯೂ ಹೌದು. ಹಾಗೆ ಯೋಚನೆ ಬಂದಿದ್ದೇ ತಡ, ನಿರ್ದೇಶಕರಾಗಿ ಹೊಳೆದ ಹೆಸರೇ ಪಿ.ವಾಸು ಅವರದು. ಅಂದಹಾಗೆ ಇದು ವೊರಿಜಿನಲ್ ಕಥೆಯಲ್ಲ. ಮಲಯಾಳಂನ `ಅರಮನೈ' ಚಿತ್ರವನ್ನು ಆಪ್ತಮಿತ್ರ-2ನಲ್ಲಿ ಅಳವಡಿಸಿಕೊಳ್ಳಲಾಗುತ್ತಿದೆ.

    ಇದರಲ್ಲಿ ವಿಷ್ಣುವರ್ಧನ್ ಪಾತ್ರ ತರುವುದು ಹೇಗೆ ಎಂದು ಆಲೋಚಿಸಿದಾಗ, ವಿಷ್ಣು ಅವರನ್ನು ಮೈಸೂರು ದೊರೆ ಅಥವಾ ಸಾಮ್ರಾಟರಾಗಿ ತೋರಿಸುವ ಚಿಂತನೆ ನಡೆದಿದೆ. ಆಪ್ತಮಿತ್ರ-2ನಲ್ಲಿ ಮೂವರು ನಾಯಕಿಯರಿರುತ್ತಾರೆ. ಉಳಿದ ವಿವರಗಳನ್ನೇನಿದ್ದರೂ, ನಿರ್ದೇಶಕ ವಾಸು ಅವರನ್ನೇ ಕೇಳಬೇಕು ಎನ್ನುತ್ತಾರೆ ನಿರ್ಮಾಪಕ ರಮೇಶ್‍ಬಾಬು.

  • ವಿಷ್ಣುವರ್ಧನ್ ರಾಷ್ಟ್ರೀಯ ಉತ್ಸವಕ್ಕೆ ಶುಭ ಕೋರಿದ ಕಿಚ್ಚ 

    sudeep

    ಆಗಸ್ಟ್ 27ರಂದು ನವದೆಹಲಿಯಲ್ಲಿ ಡಾ. ವಿಷ್ಣುವರ್ಧನ್ ರಾಷ್ಟ್ರೀಯ ಉತ್ಸವ ನಡೆಯುತ್ತಿದೆ. ದೇಶ ವಿದೇಶಗಳಿಂದ ನೂರಾರು ಅಭಿಮಾನಿಗಳು ಆ ಕಾರ್ಯಕ್ರಮಕ್ಕೆ ಆಗಮಿಸುತ್ತಿದ್ದಾರೆ. ಡಾ. ವಿಷ್ಣುವರ್ಧನ್ ಅವರ ಸಿನಿಮಾ, ಜೀವನ, ಕೊಡುಗೆ, ಅದರ್ಶಗಳ ಸ್ಮರಣೆ ನಡೆಯಲಿದೆ. ಚಿತ್ರರಂಗದ ಹಲವು ಕಲಾವಿದರು, ತಂತ್ರಜ್ಞರು ಆ ಕಾರ್ಯಕ್ರಮಕ್ಕೆ ತೆರಳುತ್ತಿರುವುದು ವಿಶೇಷ. ಕಾರ್ಯಕ್ರಮದಲ್ಲಿ ವಿಷ್ಣುವರ್ಧನ್ ಅವರ ಮೇಣದ ಪ್ರತಿಮೆಯೂ ಅನಾವರಣಗೊಳ್ಳಲಿದೆ. 

    ಈ ಕುರಿತು ಅಭಿಮಾನಿಯೊಬ್ಬರು ಮಾಡಿದ್ದ ಟ್ವೀಟ್​ಗೆ ಪ್ರತಿಕ್ರಿಯಿಸಿರುವ ಕಿಚ್ಚ ಸುದೀಪ್, ವಿಷ್ಣುವರ್ಧನ್ ನಮ್ಮ ಹೆಮ್ಮೆ. ನನ್ನ ಆದರ್ಶ. ವಿಷ್ಣು ರಾಷ್ಟ್ರೀಯ ಉತ್ಸವ ಯಶಸ್ವಿಯಾಗಲಿ ಎಂದು ಶುಭ ಹಾರೈಸಿದ್ದಾರೆ.

    Related Articles :-

    ರಾಷ್ಟ್ರ ರಾಜಧಾನಿಯಲ್ಲಿ ವಿಷ್ಣುವರ್ಧನ್

  • ವಿಷ್ಣುವರ್ಧನ್‍ಗೇ ಥ್ರಿಲ್ ಕೊಟ್ಟಿದ್ದ ಪತ್ರಕರ್ತ.. ಆಮೇಲೆ ಶಾಕ್ ಕೊಟ್ಟಿದ್ದ ಕಥೆ

    25 years ago vishnuvardhan was shocked by that journalist

    ವಿಷ್ಣುವರ್ಧನ್, ಅನಂತ್ ನಾಗ್, ಬಿ.ಸಿ.ಪಾಟೀಲ್, ಸುಮನ್ ನಗರ್‍ಕರ್, ರಮೇಶ್ ಭಟ್.. ಹೀಗೆ ಹಲವು ಕಲಾವಿದರ ಸಂಗಮವಾಗಿದ್ದ ನಿಷ್ಕರ್ಷ, ಕನ್ನಡದ ಬೆಸ್ಟ್ ಥ್ರಿಲ್ಲರ್ ಸಿನಿಮಾಗಳಲ್ಲೊಂದು. ಸುನಿಲ್ ಕುಮಾರ್ ದೇಸಾಯಿ ನಿರ್ದೇಶನದ ಟಾಪ್ ಸಿನಿಮಾ. ಆ ಸಿನಿಮಾವನ್ನು ನಿರ್ಮಾಪಕ ಬಿ.ಸಿ.ಪಾಟೀಲ್ ರೀರಿಲೀಸ್ ಮಾಡುತ್ತಿದ್ದಾರೆ. ನಿಷ್ಕರ್ಷದ ಥ್ರಿಲ್‍ನ್ನು ಮತ್ತೆ ಅನುಭವಿಸಲು ವಿಷ್ಣು ಅಭಿಮಾನಿಗಳೂ ತುದಿಗಾಲಲ್ಲಿ ನಿಂತಿದ್ದಾರೆ. ಆ ನಿಷ್ಕರ್ಷ ಚಿತ್ರದ ಪ್ರೆಸ್‍ಮೀಟ್‍ನಲ್ಲಿ ನಡೆದಿದ್ದ ಘಟನೆ ಇದು.

    ನಿಷ್ಕರ್ಷ ಚಿತ್ರಕ್ಕೆ ಮಯೂರ ಹೋಟೆಲ್‍ನಲ್ಲಿ ಮುಹೂರ್ತ ನೆರವೇರಿತ್ತು. ದಿನಾಂಕ : ಮೇ 12, 1993. ಶಂಕರ್ ಬಿದರಿ, ಕೆಂಪಯ್ಯ ಸೇರಿದಂತೆ ಸೀನಿಯರ್ ಪೊಲೀಸ್ ಅಧಿಕಾರಿಗಳು ಉಪಸ್ಥಿತರಿದ್ದರು. ಪ್ರೆಸ್‍ಮೀಟ್‍ನಲ್ಲಿ ವಿಷ್ಣುವರ್ಧನ್ ಪತ್ರಕರ್ತರ ಪ್ರಶ್ನೆಗಳಿಗೆ ಉತ್ತರ ಕೊಡುತ್ತಿದ್ದರು. ಆ ವೇಳೆ ಪತ್ರಕರ್ತರ ಗ್ಯಾಲರಿಯಲ್ಲಿದ್ದ ಯಂಗ್ ಜರ್ನಲಿಸ್ಟ್ ಒಬ್ಬರು ಪ್ರಶ್ನೆಗಳ ಮೇಲೆ ಪ್ರಶ್ನೆಗಳನ್ನು ಕೇಳುತ್ತಿದ್ದರು.

    ಪ್ರಶ್ನೆಗಳು ಎಷ್ಟೊಂದು ಇಂಟರೆಸ್ಟಿಂಗ್ ಆಗಿದ್ದವೆಂದರೆ ಆತನ ಪ್ರಶ್ನೆಗಳಿಗೆ ಸ್ವತಃ ವಿಷ್ಣುವರ್ಧನ್ ಕೂಡಾ ಥ್ರಿಲ್ಲಾಗಿದ್ದರು. ಹಲವು ಸೀನಿಯರ್ ಜರ್ನಲಿಸ್ಟುಗಳೂ ಆಸಕ್ತಿಯಿಂದ ಆ ಯುವ ಪತ್ರಕರ್ತ ಮತ್ತು ವಿಷ್ಣು ಜುಗಲ್‍ಬಂದಿ ನೋಡುತ್ತಿದ್ದರು. ಹೀಗೆ ಪ್ರಶ್ನೆ ಕೇಳುತ್ತಾ ಇದ್ದ ಆ ಯುವಕ, ಪ್ರಶ್ನೆಗಳು ಮುಗಿಯುತ್ತಿದ್ದಂತೆ ಎದ್ದು ಹೊರಟೇ ಬಿಟ್ಟ. ವಿಷ್ಣು ಸೇರಿದಂತೆ ಎಲ್ಲರಿಗೂ ಶಾಕ್.

    ಸಾಮಾನ್ಯವಾಗಿ ಸುದ್ದಿಗೋಷ್ಠಿಗಳು ಮುಗಿಯುವ ಮೊದಲೇ ಪತ್ರಕರ್ತರು ಹೊರಹೋಗುವುದಿಲ್ಲ. ಅದರಲ್ಲೂ ವಿಷ್ಣುರಂತಹ ಸೀನಿಯರ್ ನಟರಿದ್ದಾಗ ಪತ್ರಕರ್ತರೂ ಅಷ್ಟೇ ಶಿಸ್ತುಬದ್ಧರಾಗಿರುತ್ತಾರೆ. ಆದರೆ, ಅಷ್ಟೆಲ್ಲ ರೋಮಾಂಚನ ಹುಟ್ಟಿಸಿದ್ದ ಪತ್ರಕರ್ತ ಇದ್ದಕ್ಕಿದ್ದಂತೆ ಎದ್ದು ಹೋಗಿದ್ದೇಕೆ ಎಂದು ವಿಷ್ಣು ಕೂಡಾ ಗಾಬರಿಯಾದರು.

    ತಕ್ಷಣ ತಮ್ಮ ಸಹಾಯಕನನ್ನು ಆ ಯುವಕನನ್ನು ಹುಡುಕಿ ಮತ್ತೆ ಕರೆದುತರುವಂತೆ ಕಳಿಸಿಕೊಟ್ಟರು. ಆ ಯುವಕನ ಬೆನ್ನು ಹತ್ತಿ ಹೋದ ವಿಷ್ಣು ಸಹಾಯಕ ತಂದ ಉತ್ತರ, ವಿಷ್ಣು ಸೇರಿದಂತೆ ಎಲ್ಲ ಪತ್ರಕರ್ತರಿಗೂ ಶಾಕ್ ಕೊಟ್ಟಿತ್ತು.

    ಹಾಗೆ ಹೊರಗೆ ಹೋಗಿದ್ದ ಆ ಯಂಗ್ ಜರ್ನಲಿಸ್ಟ್, ಪತ್ರಕರ್ತನೇ ಆಗಿರಲಿಲ್ಲ. ವಿಷ್ಣುವರ್ಧನ್‍ಗೇ ರೋಮಾಂಚನಗೊಳಿಸಿದ್ದ ಆತ ವಿಷ್ಣು ಅಭಿಮಾನಿಯಾಗಿದ್ದ ಮತ್ತು ಆಟೋ ಡ್ರೈವರ್ ಆಗಿದ್ದ. ಸುದ್ದಿಗೋಷ್ಟಿಯ ನಡುವೆ ಎದ್ದು ಹೋದ ಅವನನ್ನು ಹುಡುಕಿತರಲು ಹೋದ ಸಹಾಯಕರಿಗೆ ಕಂಡಿದ್ದು ಆಟೋ ಡ್ರೈವರ್ ಯೂನಿಫಾರ್ಮಲ್ಲಿ ಆಟೋ ಓಡಿಸಿಕೊಂಡು ಹೋದ ಯುವಕ. 

  • ಶಿವಣ್ಣನಿಗೆ ವಿಷ್ಣು ಕೊಟ್ಟಿದ್ದ ಆ ಕಾಣಿಕೆಯ ಕಥೆ..!

    shivarajkumar shares vishnu's gift story

    ಹ್ಯಾಟ್ರಿಕ್ ಹೀರೋ ಶಿವ ರಾಜ್‍ಕುಮಾರ್, ವಿಷ್ಣುವರ್ಧನ್ ಅವರನ್ನು, ಅವರ ಜೊತೆಗಿನ ಹಲವು ನೆನಪುಗಳನ್ನು ಹಂಚಿಕೊಂಡಿದ್ದಾರೆ. ಆದರೆ, ಇದು ವಿಶೇಷ ಕಥೆ. ವಿಷ್ಣುವರ್ಧನ್‍ರ ನಾಗರಹಾವು ರಿಲೀಸ್ ಆದಾಗ, ಶಿವಣ್ಣ.. 12 ವರ್ಷದ ಹುಡುಗ. ಯಾರೀ ರಾಮಾಚಾರಿ ಎಂದು ಬೆರಗುಗೊಂಡಿದ್ದ ಶಿವಣ್ಣಂಗೆ ವಿಷ್ಣು ಸರ್‍ಪ್ರೈಸ್ ಕೊಟ್ಟಿದ್ದು ಆನಂದ್ ರಿಲೀಸ್ ಆದಾಗ.

    ಆನಂದ್ ಚಿತ್ರವನ್ನು ನೋಡಿ ಮೆಚ್ಚಿಕೊಂಡಿದ್ದ ವಿಷ್ಣುವರ್ಧನ್, ಶಿವರಾಜ್‍ಕುಮಾರ್ ಅವರಿಗೆ ಒಂದು ಉಡುಗೊರೆ ಕೊಟ್ಟಿದ್ದರು. ಅದು ಒಂದು ಪುಟ್ಟ ವಾಚ್. ಆ ವಾಚ್‍ನ್ನು ವಿಷ್ಣು ಅವರಿಗೆ ಎಂಜಿಆರ್ ಕೊಟ್ಟಿದ್ದರಂತೆ. ಅಂತಹ ಸವಿನೆನಪಿನ ಕಾಣಿಕೆಯನ್ನು ಶಿವಣ್ಣನಿಗೆ ನೀಡಿ ಶುಭ ಹಾರೈಸಿದ್ದರು ವಿಷ್ಣುವರ್ಧನ್.

    ವಿಷ್ಣುವರ್ಧನ್ ಜೊತೆಗಿನ ನೆನಪು ಸ್ಮರಿಸಿಕೊಂಡ ಶಿವರಾಜ್‍ಕುಮಾರ್, ಅವರೊಂದಿಗೆ ಹಲವು ವಿಷಯಗಳನ್ನು ಮಾತನಾಡಿದ್ದೇನೆ. ಯಾವ ಯಾವ ವಿಚಾರ ಮಾತನಾಡಿದ್ದೆವು ಅನ್ನೋದು ನಮ್ಮಿಬ್ಬರಿಗಷ್ಟೇ ಗೊತ್ತು ಎಂದು ಹೇಳಿಕೊಂಡಿದ್ದಾರೆ.

  • ಸರ್ಕಾರಕ್ಕೆ ವಿಷ್ಣು ಅಭಿಮಾನಿ ಯಶ್ ಎಚ್ಚರಿಕೆ

    yash image

    ರಾಕಿಂಗ್ ಸ್ಟಾರ್ ಯಶ್, ವಿಷ್ಣುವರ್ಧನ್ ಅವರ ಅಭಿಮಾನಿ ಎನ್ನುವುದು ಗುಟ್ಟೇನಲ್ಲ. ಯಶ್ ಚಿತ್ರಜೀವನದ ಮೈಲುಗಲ್ಲು ಎಂದೇ ಪರಿಗಣಿತವಾಗುವ ರಾಮಾಚಾರಿ ಚಿತ್ರದಲ್ಲಿ ಯಶ್, ವಿಷ್ಣು ಅಭಿಮಾನಿಯಾಗಿಯೇ ಮಿಂಚಿದ್ದರು. ಈಗ ಯಶ್, ವಿಷ್ಣು ಅವರಿಗೆ ಸರ್ಕಾರ ಕೊಡಬೇಕಾದ ಗೌರವ ಕೊಡುತ್ತಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

    ವಿಷ್ಣುವರ್ಧನ್ ಅವರ ಅಳಿಯ ರಾಜಾಸಿಂಹ ಚಿತ್ರದ ಆಡಿಯೋ ಬಿಡುಗಡೆಗೆ ಆಗಮಿಸಿದ್ದ ಯಶ್, ಸರ್ಕಾರ ವಿಷ್ಣು ಅವರಿಗೆ ಕೊಡಬೇಕಾದ ಗೌರವ ಕೊಡುತ್ತಿಲ್ಲ. ಈ ಕೆಲಸವನ್ನು ಸರ್ಕಾರ ತುರ್ತಾಗಿ ಮಾಡಬೇಕು. ಇಲ್ಲದೇ ಹೋದರೆ, ಅಭಿಮಾನಿಗಳಾದ ನಾವೇ ಅದನ್ನು ಮಾಡಬೇಕಾಗುತ್ತದೆ ಎಂದಿದ್ದಾರೆ. ಯಶ್ ಅವರ ಮಾತಿನಲ್ಲಿ ಮನವಿಯಷ್ಟೇ ಇರಲಿಲ್ಲ, ಎಚ್ಚರಿಕೆಯೂ ಇತ್ತು ಎಂಬುದನ್ನು ಮರೆಯುವಂತಿಲ್ಲ.

  • ಸೆಪ್ಟೆಂಬರ್‍ನಲ್ಲಿ ವಿಷ್ಣು ಹಬ್ಬ

    vishnu rastriya utsava in september

    ಸಾಹಸಸಿಂಹ ಡಾ. ವಿಷ್ಣುವರ್ಧನ್ ಅವರನ್ನು ಚಿತ್ರರಂಗಕ್ಕೆ ಪರಿಚಯಿಸಿದ ನಾಗರಹಾವು ಚಿತ್ರ, ಥಿಯೇಟರುಗಳಲ್ಲಿ ಮೋಡಿ ಮಾಡುತ್ತಿದ್ದರೆ, ಅತ್ತ ಅಭಿಮಾನಿಗಳು ವಿಷ್ಣು ಹಬ್ಬದ ಆಚರಣೆಗೆ ಸಿದ್ಧರಾಗುತ್ತಿದ್ದಾರೆ. ವಿಷ್ಣುವರ್ಧನ್ ಅಭಿಮಾನಿ, ವಿಷ್ಣುಸೇನಾ ಸಮಿತಿ 

    ಸೆ. 16, 17, 18ರಂದು ವಿಷ್ಣು ರಾಷ್ಟ್ರೀಯ ಉತ್ಸವ ಆಯೋಜಿಸಿದೆ.

    ವಿಷ್ಣುವರ್ಧನ್ ಅವರ 69ನೇ ಹುಟ್ಟುಹಬ್ಬವನ್ನು ರಾಷ್ಟ್ರೀಯ ಉತ್ಸವವನವನಾಗ ಆಚರಿಸುತ್ತಿದೆ ವಿಷ್ಣು ಸೇನಾ ಸಮಿತಿ. ರಾಷ್ಟ್ರೀಯ ಉತ್ಸವದ ಸಂಪೂರ್ಣ ಮಾಹಿತಿ ನೀಡಿದ್ದಾರೆ ವಿಷ್ಣುಸೇನಾ ಸಮತಿ ಅಧ್ಯಕ್ಷ ವೀರಕಪುತ್ರ ಶ್ರೀನಿವಾಸ್.

    ಸೆ.16ರಂದು ಕೆ.ಆರ್.ರಸ್ತೆಯ ಕುವೆಂಪು ಕಲಾಕ್ಷೇತ್ರದಲ್ಲಿ ರಾಷ್ಟ್ರೀಯ ಉತ್ಸವ ಉದ್ಘಾಟನೆ. ಬಿಬಿಎಂಪಿಯಿಂದ ಕಲಾಕ್ಷೇತ್ರದವರೆಗೆ ವಿವಿಧ ಜಾನಪದ ತಂಡಗಳ ಮೆರವಣಿಗೆ. ಮೆರವಣಿಗೆಯಲ್ಲಿ ನೂರಾರು ಕಲಾತಂಡಗಳು ಹಾಗೂ ಚಿತ್ರರಂಗದ ಕಲಾವಿದರ ಜೊತೆಗೆ 10 ಸಾವಿರಕ್ಕೂ ಹೆಚ್ಚು ಅಭಿಮಾನಗಳು ಭಾಗಿಯಾಗಲಿದ್ದಾರೆ. ವಿಷ್ಣುವರ್ಧನ್ ಅವರ ಕುರಿತ 3 ಕೃತಿಗಳೂ ಬಿಡುಗಡೆಯಾಗಲಿವೆ.

    ಈ ಬಾರಿ ವೀರಪ್ಪನಾಯ್ಕ ಗೆಟಪ್‍ನ ಪುತ್ಥಳಿ ಅನಾವರಣಗೊಳ್ಳಲಿದೆ. ವಿಷ್ಣು ಬದುಕು, ಸಾಧನೆ ಕುರಿತು ಚಿತ್ರಕಲಾ ಸ್ಪರ್ಧೆಯನ್ನೂ ಆಯೋಜಿಸಲಾಗಿದೆ. ವಿಷ್ಣು ಅವರೊಂದಿಗೆ ನಟಿಸಿದ್ದ ಕಲಾವಿದರು ಹಾಗೂ ಯುವನಟರು ವಿಚಾರ ಸಂಕಿರಣ ನಡೆಸಲಿದ್ದಾರೆ. ಮೂರೂ ದಿನ ಸಂಜೆ ವಿಷ್ಣುಗೀತೆಗಳ ರಸಸಂಜೆ ನಡೆಯಲಿದೆ. ಒಟ್ಟಿನಲ್ಲಿ ಸೆಪ್ಟೆಂಬರ್‍ನಲ್ಲಿ ವಿಷ್ಣು ಹಬ್ಬ.

  • ಹಳೆ ನಾಗರಹಾವುಗೆ ಡಿಜಿಟಲ್ ಸ್ಪರ್ಶ

    old nagarahaavu gets digital touch

    ನಾಗರಹಾವು, ಕನ್ನಡಕ್ಕೆ ಇಬ್ಬರು ಸ್ಟಾರ್‍ಗಳನ್ನು ಪರಿಚಯಿಸಿದ ಸಿನಿಮಾ. ವಿಷ್ಣುವರ್ಧನ್ ಮತ್ತು ಅಂಬರೀಷ್ ತೆರೆಗೆ ಪರಿಚಿತರಾಗಿದ್ದು ಇದೇ ಚಿತ್ರದಿಂದ. ಪುಟ್ಟಣ್ಣ ಕಣಗಾಲ್ ನಿರ್ದೇಶನದ ಈ ಸಿನಿಮಾ, ಕನ್ನಡ ಚಿತ್ರರಂಗದ ಕ್ಲಾಸಿಕ್ ಸಿನಿಮಾಗಳಲ್ಲಿ ಒಂದು. ಈಗ ಈ ಚಿತ್ರ ಕಸ್ತೂರಿ ನಿವಾಸ, ಸತ್ಯಹರಿಶ್ಚಂದ್ರ, ಬಭ್ರುವಾಹನ.. ಇತ್ಯಾದಿಗಳ ಮಾದರಿಯಲ್ಲಿ ಡಿಜಿಟಲ್ ಸ್ಪರ್ಶದೊಂದಿಗೆ ಬಿಡುಗಡೆಗೆ ಸಿದ್ಧವಾಗಿದೆ.

    ನಾಗರಹಾವು ಚಿತ್ರ ಇದ್ದಿದ್ದು ಹಳೆ ಟೆಕ್ನಾಲಜಿಯಲ್ಲಿ. ಒಂದೇ ಸ್ಪೀಕರ್‍ನಲ್ಲಿ ವಾಯ್ಸ್ ಕೇಳಬೇಕಿತ್ತು. ಈಗ ಚಿತ್ರಕ್ಕೆ 7.1 ಡಿಟಿಎಸ್ ಸೌಂಡ್ ಎಫೆಕ್ಟ್ ನೀಡಲಾಗಿದೆ. 35 ಎಂಎಂನಲ್ಲಿದ್ದ ಸಿನಿಮಾವನ್ನು ಹೊಸ ತಂತ್ರಜ್ಞಾನಕ್ಕೆ ಒಗ್ಗಿಸಲಾಗಿದೆ. ಹೀಗಾಗಿ ಇಡೀ ಸಿನಿಮಾ ಹೊಸದಾಗಿ ಕಾಣಿಸಿಕೊಳ್ಳಲಿದೆ.

    ಅಂದಹಾಗೆ ಇದು ಎನ್.ವೀರಸ್ವಾಮಿ(ರವಿಚಂದ್ರನ್ ಅವರ ತಂದೆ) ಅವರ ನಿರ್ಮಾಣದ ಸಿನಿಮಾ. ಬಾಲಾಜಿ ಉಸ್ತುವಾರಿ ಹೊತ್ತಿರುವ ಈಶ್ವರಿ ಸಂಸ್ಥೆಯಿಂದ ಈ ಸಿನಿಮಾ ರೀ-ರಿಲೀಸ್ ಆಗುತ್ತಿದೆ. ಹಣದ ಬಗ್ಗೆ ಚಿಂತೆಯಿಲ್ಲ. ಈ ಅದ್ಭುತ ಸಿನಿಮಾವನ್ನು ಈಗಿನ ಯುವಪೀಳಿಗೆ ನೋಡಬೇಕು ಅನ್ನೋದು ನನ್ನ ಕಾಳಜಿ ಎನ್ನುತ್ತಾರೆ ಬಾಲಾಜಿ.

  • ಹಿಂದಿಯಲ್ಲೂ ಬರುತ್ತಿದೆ ನಿಷ್ಕರ್ಷ..

    nishkarsha movie to re release in hindi too

    90ರ ದಶಕದಲ್ಲಿ ಸಂಚಲನ ಸೃಷ್ಟಿಸಿದ್ದ ನಿಷ್ಕರ್ಷ ಚಿತ್ರವನ್ನು ವಿಷ್ಣುವರ್ಧನ್ ಹುಟ್ಟುಹಬ್ಬಕ್ಕೆಂದೇ ರಿ-ರಿಲೀಸ್ ಮಾಡುತ್ತಿದ್ದಾರೆ ಬಿ.ಸಿ.ಪಾಟೀಲ್. ಚಿತ್ರವನ್ನು ಹೊಸ ಟೆಕ್ನಾಲಜಿಯಿಂದ ಇನ್ನಷ್ಟು ಸುಂದರಗೊಳಿಸಲಾಗಿದೆ. ಇದಕ್ಕಿಂತ ಇನ್ನೂ ಒಂದು ವಿಶೇಷವೆಂದರೆ ಚಿತ್ರವನ್ನು ಹಿಂದಿಗೂ ಡಬ್ ಮಾಡಲಾಗಿದೆ. ಸೆ.20ರಂದು ಹಿಂದಿಯಲ್ಲೂ ನಿಷ್ಕರ್ಷ ರಿಲೀಸ್ ಆಗುತ್ತಿದೆ.

    ಆಗಿನ ಕಾಲಕ್ಕೆ ಚಿತ್ರವನ್ನು 60 ಲಕ್ಷದಲ್ಲಿ ನಿರ್ಮಿಸಲಾಗಿತ್ತು. ಈಗ ಚಿತ್ರವನ್ನು ರಿ-ರಿಲೀಸ್ ಮಾಡುವುದಕ್ಕೇ ಒಂದು ಕೋಟಿಗೂ ಹೆಚ್ಚು ಖರ್ಚಾಗಿದೆ.

    ಆಗ ಚಿತ್ರವನ್ನು ನೋಡಿದವರು ಇದು 25 ವರ್ಷಗಳ ನಂತರ ಬರಬೇಕಿದ್ದ ಸಿನಿಮಾ ಎಂದಿದ್ದರು. ಆ ಮಾತೇ ಈಗ ಮತ್ತೊಮ್ಮೆ ಬಿಡುಗಡೆ ಮಾಡಲು ಕಾರಣ ಎಂದಿದ್ದಾರೆ ಬಿ.ಸಿ.ಪಾಟೀಲ್.

    ಸುನಿಲ್ ಕುಮಾರ್ ದೇಸಾಯಿ ನಿರ್ದೇಶನದ ಮಾಸ್ಟರ್ ಪೀಸ್ ಆಗಿರುವ ನಿಷ್ಕರ್ಷ ಚಿತ್ರದಲ್ಲಿ ವಿಷ್ಣುವರ್ಧನ್, ಅನಂತ್‍ನಾಗ್, ಸುಮನ್ ನಗರ್‍ಕರ್, ಬಿ.ಸಿ.ಪಾಟೀಲ್ ನಟಿಸಿದ್ದಾರೆ. 

Geetha Movie Gallery

Damayanthi Teaser Launch Gallery