` puneeth rajkumar, - chitraloka.com | Kannada Movie News, Reviews | Image

puneeth rajkumar,

  • ಅಂಜನಿಪುತ್ರ ನಿಷೇಧ ವಾಪಸ್

    anjaniputra image

    ವಕೀಲರ ಕುರಿತು ಆಕ್ಷೇಪಾರ್ಹ ಸಂಭಾಷಣೆ ಇದ್ದದ್ದನ್ನು ಪ್ರಶ್ನಿಸಿ ಕೆಲವು ವಕೀಲರು ನ್ಯಾಯಾಲಯದ ಮೆಟ್ಟಿಲೇರಿದ್ದ ಪ್ರಕರಣ ಸುಖಾಂತ್ಯ ಕಂಡಿದೆ. ಚಿತ್ರ ಪ್ರದರ್ಶನಕ್ಕೆ ನಿಷೇಧ ಹೇರಿದ್ದ ನ್ಯಾಯಾಲಯ, ನಿಷೇಧ ಜಾರಿಯಾಗದೇ ಇರುವದನ್ನು ಗಂಭೀರವಾಗಿ ಪರಿಗಣಿಸಿತ್ತು. ಖುದ್ದು ಡಿಜಿಪಿಯವರಿಗೇ ಆದೇಶವನ್ನು ಜಾರಿಗೆ ತರಲು ಸೂಚನೆ ನೀಡಿತ್ತು. ಈ ಮಧ್ಯೆ ಆಕ್ಷೇಪಾರ್ಹ ಸಂಭಾಷಣೆಯನ್ನು ಸೆನ್ಸಾರ್ ಮಾಡಿಸಿದ್ದ ಚಿತ್ರತಂಡ ವಕೀಲರ ಕ್ಷಮೆ ಕೇಳಿತ್ತು. ಈಗ ಪ್ರದರ್ಶನವಾಗುತ್ತಿರುವ ಅಂಜನಿಪುತ್ರ ಚಿತ್ರದಲ್ಲಿ ಆ ಡೈಲಾಗ್ ಇಲ್ಲ.

    ಈ ಹಿನ್ನೆಲೆಯಲ್ಲಿ ದೂರುದಾರ ವಕೀಲರು ಕೂಡಾ ಚಿತ್ರತಂಡ ಕ್ಷಮೆ ಕೋರಿದ ಹಿನ್ನೆಲೆಯಲ್ಲಿ ದೂರು ವಾಪಸ್ ತೆಗೆದುಕೊಳ್ಳಲು ಮುಂದಾದರು. ಎರಡೂ ಕಡೆಯ ವಕೀಲರು ಸಲ್ಲಿಸಿದ ಅರ್ಜಿಯನ್ನು ಪರಿಗಣಿಸಿದ ನ್ಯಾಯಾಲಯ, ಅಂಜನಿಪುತ್ರ ಪ್ರದರ್ಶನಕ್ಕೆ ವಿಧಿಸಿದ್ದ ನಿರ್ಬಂಧವನ್ನು ತೆರವುಗೊಳಿಸಿದೆ. ಅದ್ದೂರಿ ಪ್ರದರ್ಶನ ಕಾಣುತ್ತಿರುವ  ಪುನೀತ್ ರಾಜ್​ಕುಮಾರ್ ಅಭಿನಯದ ಚಿತ್ರ ನಿರಾತಂಕವಾಗಿ ಚಿತ್ರಮಂದಿರಗಳಲ್ಲಿ ಮುಂದುವರಿಯಲಿದೆ.

  • ಅಂಜನಿಪುತ್ರಕ್ಕೆ ಪ್ರದರ್ಶನಕ್ಕೆ ನ್ಯಾಯಾಲಯ ತಡೆ - ಕಾನೂನು ಹೇಳೋದೇನು..?

    stay in anjaniputra

    ಪುನೀತ್ ರಾಜ್​ಕುಮಾರ್ ಅಭಿನಯದ ಅಂಜನಿಪುತ್ರ ಚಿತ್ರ ಪ್ರದರ್ಶನಕ್ಕೆ 40ನೇ ಸಿವಿಲ್ ನ್ಯಾಯಾಲಯ ತಡೆ ನೀಡಿದೆ. ಚಿತ್ರದಲ್ಲಿ ವಕೀಲರ ವಿರುದ್ಧ ಅವಹೇಳನಕಾರಿ ಡೈಲಾಗ್ ಇದೆ ಎಂಬ ಹಿನ್ನೆಲೆಯಲ್ಲಿ ನ್ಯಾಯಾಲಯ ಚಿತ್ರಪ್ರದರ್ಶನಕ್ಕೆ ತಡೆ ನೀಡಿದೆ. 

    ಜ.2ರವರೆಗೆ ಚಿತ್ರಮಂದಿರಗಳಲ್ಲಿ ಚಿತ್ರ ಪ್ರದರ್ಶನ ಮಾಡದಂತೆ ನ್ಯಾಯಾಲಯ ಸೂಚಿಸಿದೆ.  ವಿಜಯ್ ಕುಮಾರ್, ನಾರಾಯಣ ಸ್ವಾಮಿ, ನಾಗೇಶ್ ವಿನೋದ್ ಕುಮಾರ್ & ನವೀನ್ ಕುಮಾರ್ ಎಂಬ ವಕೀಲು ಚಿತ್ರದ ಈ ಡೈಲಾಗ್ ಪ್ರಶ್ನಿಸಿ ಅರ್ಜಿ ಸಲ್ಲಿಸಿದ್ದರು.

    ಆದರೆ ಚಿತ್ರ ಪ್ರದರ್ಶನ ನಿಲ್ಲಿಸಲ್ಲ. ಕೋರ್ಟ್ ಆದೇಶದ ಬಗ್ಗೆ ನಮಗೆ ಗೊತ್ತಿಲ್ಲ ಎಂದಿದ್ದಾರೆ ಚಿತ್ರ ವಿತರಕ ಜಾಕ್ ಮಂಜು. 

    ಸೆನ್ಸಾರ್ ಆದ ಚಿತ್ರವೊಂದಕ್ಕೆ ಈ ರೀತಿ ನ್ಯಾಯಾಲಯ ತಡೆ ಕೊಡುವುದು ಸಾಧ್ಯವೇ..? ಒಮ್ಮೆ ನಾವು ಇತ್ತೀಚಿನ ತಮಿಳು ಸಿನಿಮಾ ಮರ್ಸೆಲ್ ಚಿತ್ರದ ಕುರಿತು ಮದ್ರಾಸ್ ಹೈಕೋರ್ಟ್ ಹೇಳಿದ್ದನ್ನೂ ನೆನಪಿಸಿಕೊಳ್ಳಬೇಕು. ಮರ್ಸೆಲ್ ಚಿತ್ರದ ಪ್ರದರ್ಶನಕ್ಕೂ ಇದೇ ರೀತಿ ತಡೆ ಕೋಡಿ ಬಿಜೆಪಿ ಮುಖಂಡರು ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಚಿತ್ರದಲ್ಲಿನ ಜಿಎಸ್​ಟಿ ಹಾಗೂ ಡಿಜಿಟಲ್ ಬ್ಯಾಂಕಿಂಗ್ ಕುರಿತ ಡೈಲಾಗ್​ ಪ್ರಶ್ನಿಸಿ ತಡೆ ಕೊಡಲು ಕೋರಿದ್ದರು. 

    ಆಗ ಅರ್ಜಿಯ ವಿಚಾರಣೆ ನಡೆಸಿದ್ದ ಮದ್ರಾಸ್ ಹೈಕೋರ್ಟ್, ಮರ್ಸೆಲ್ ಸಿನಿಮಾನೇ ಹೊರತು, ನಿಜ ಜೀವನ ಅಲ್ಲ. ಇದು ಪ್ರಜಾಪ್ರಭುತ್ವ. ಅಭಿವ್ಯಕ್ತಿ ಸ್ವಾತಂತ್ರ್ಯ ಎನ್ನುವುದು ಎಲ್ಲರಿಗೂ ಅನ್ವಯಿಸುವಂತೆ ಸಿನಿಮಾಗೂ ಅನ್ವಯವಾಗುತ್ತೆ ಎಂದು ಹೇಳಿತ್ತು. ಅರ್ಜಿಯನ್ನು ತಿರಸ್ಕರಿಸಿತ್ತು.

    ಈಗ ಅಂಜನಿಪುತ್ರ ಚಿತ್ರದಲ್ಲೂ ಇದೇ ವಾದ ಅನ್ವಯವಾಗುತ್ತಾ..? ನೋಡಬೇಕು.

  • ಅಂಜನಿಪುತ್ರದ ಲಾಯರ್ ಡೈಲಾಗ್‍ಗೆ ಸೆನ್ಸಾರ್

    cbfc certificate of deleted scenes from anjaniputra

    ಪುನೀತ್ ರಾಜ್‍ಕುಮಾರ್ ಅಭಿನಯದ ಅಂಜನಿಪುತ್ರ ಚಿತ್ರದಲ್ಲಿ ವಕೀಲರ ಕುರಿತ ಒಂದು ಅವಹೇಳನಕಾರಿ ಡೈಲಾಗ್ ಬಗ್ಗೆ ಕೆಲವು ವಕೀಲರು ಅಸಮಾಧಾನ ವ್ಯಕ್ತಪಡಿಸಿದ್ದರು. ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಈ ಕುರಿತು ತಕ್ಸಣ ಸ್ಪಂದಿಸಿರುವ ಅಂಜನಿಪುತ್ರ ಚಿತ್ರತಂಡ, ಚಿತ್ರದಲ್ಲಿನ ಆ ಡೈಲಾಗ್‍ನ್ನು ಕಟ್ ಮಾಡಿದೆ. ಚಿತ್ರವನ್ನು ಮತ್ತೆ ಸೆನ್ಸಾರ್ ಮಾಡಿಸಿ, ಪ್ರಮಾಣಪತ್ರವನ್ನೂ ಪಡೆದುಕೊಂಡಿದೆ.

    ರವಿಶಂಕರ್ ಹೇಳುವ ಆ ಡೈಲಾಗ್‍ನ್ನು ಸೆನ್ಸಾರ್ ಮಾಡಿಸಿ ಪ್ರದರ್ಶನ ಮಾಡಲಾಗುತ್ತಿದೆ. ಈಗ ಪ್ರದರ್ಶನವಾಗುತ್ತಿರುವ ಚಿತ್ರದಲ್ಲಿ ಆ ವಿವಾದಾತ್ಮಕ ಸಂಭಾಷಣೆ ಇಲ್ಲ. ಆ ಸಂಭಾಷಣೆಯಿಂದ ವಕೀಲ ಸಮುದಾಯಕ್ಕೆ ನೋವಾಗಿದ್ದರೆ ಕ್ಷಮಿಸಿ ಎಂದು ಚಿತ್ರತಂಡ ಕ್ಷಮೆಯಾಚಿಸಿದೆ.

    Related Articles :-

    Anjaniputra Advocate Scene Deleted

    Anjaniputra Screening Will Not Stop

    Shocking Order in Anjaniputra Case; Why Is Censor Board Required? 

    ಅಂಜನಿಪುತ್ರಕ್ಕೆ ಪ್ರದರ್ಶನಕ್ಕೆ ನ್ಯಾಯಾಲಯ ತಡೆ - ಕಾನೂನು ಹೇಳೋದೇನು..?

  • ಅಂಜನೀಪುತ್ರನ ಅಭಿಮಾನದ ಮೆರವಣಿಗೆ

    anjaniputra movie image

    ಜನ ಮೆಚ್ಚಿದರೆ ಬೆಳವಣಿಗೆ, ಮೆರೆಸಿದರೆ ಮೆರವಣಿಗೆ ಅಂಜನೀಪುತ್ರದಲ್ಲಿ ಪುನೀತ್‍ಗೆ ಇಂಥಾದ್ದೊಂದು ಡೈಲಾಗ್ ಇದೆ. ರಾಜಕುಮಾರನ ನಂತರ ಬರುತ್ತಿರುವ ಅಂಜನೀಪುತ್ರ ಸೃಷ್ಟಿಸಿರುವ ಕುತೂಹಲ ಅಷ್ಟಿಷ್ಟಲ್ಲ. ಆ ಕುತೂಹಲವೇ ಚಿತ್ರದ ಬಗ್ಗೆ ನಿರೀಕ್ಷೆ ಹೆಚ್ಚಿಸಿದೆ.

    ಚಿತ್ರದ ಹಾಡುಗಳ ಜೊತೆ ಟ್ರೇಲರ್‍ನ್ನೂ ಬಿಡುಗಡೆ ಮಾಡಲಾಗಿದ್ದು, ಆನ್‍ಲೈನ್‍ನಲ್ಲಿ ಟ್ರೇಲರ್‍ನ್ನು ಅಭಿಮಾನಿಗಳು ಮೆರೆಸುತ್ತಿದ್ದಾರೆ. ಯೂಟ್ಯೂಬ್ ಒಂದರಲ್ಲೇ  ಒಂದೇ ದಿನದಲ್ಲಿ 8 ಲಕ್ಷಕ್ಕೂ ಹೆಚ್ಚು ಜನ ನೋಡಿರುವುದು ಚಿತ್ರದ ಹೆಗ್ಗಳಿಕೆ. ಫೇಸ್‍ಬುಕ್, ಟ್ವಿಟರ್, ಇನ್‍ಸ್ಟಾಗ್ರಾಮ್‍ಗಳಲ್ಲೂ ಅಂಜನೀಪುತ್ರ ಅಬ್ಬರಿಸುತ್ತಿದ್ದಾನೆ.

    ಟ್ರೇಲರ್‍ನಲ್ಲಿ ರಮ್ಯಕೃಷ್ಣ ಅವರ ಡೈಲಾಗ್ ಡೆಲಿವರಿ, ಶಿವಗಾಮಿಯ ಖದರ್‍ನ್ನೇ ನೆನಪಿಸುವಂತಿದೆ.

    ಪುನೀತ್ ಮಾಲೀಕತ್ವದ ಪಿಆರ್‍ಕೆ ಬ್ಯಾನರ್‍ನಲ್ಲಿ ಚಿತ್ರದ ಆಡಿಯೋ ಬಿಡುಗಡೆಯಾಗಿದೆ. ಆಡಿಯೋ ಸಿಡಿಯನ್ನು ಆಂಜನೇಯನ ಪುಟ್ಟ ಮೂರ್ತಿಯೇ ಹೊತ್ತು ತಂದಿದ್ದು ವಿಶೇಷ. ಎಂ.ಎನ್. ಕುಮಾರ್ ನಿರ್ಮಾಣದ ಚಿತ್ರಕ್ಕೆ ಹರ್ಷ ನಿರ್ದೇಶಕ.

    ಚಿತ್ರದ ಆಡಿಯೋ ಬಿಡುಗಡೆ ಸಮಾರಂಭಕ್ಕೆ ಪುನೀತ್ ಕುಟುಂಬದವರೆಲ್ಲ ಹಾಜರಿದ್ದು ಶುಭ ಹಾರೈಸಿದ್ದು ವಿಶೇಷವಾಗಿತ್ತು. ಹಿರಿಯ ನಿರ್ದೇಶಕ ಭಗವಾನ್ ಹಾಗೂ ಹಿರಿಯ ಸಂಗೀತ ನಿರ್ದೇಶಕ ರಾಜನ್ ಕೂಡಾ ಅಪ್ಪು ಹೊಸ ಸಾಹಸಕ್ಕೆ ಶುಭ ಕೋರಿದರು.

  • ಅಂಜನೀಪುತ್ರನ ಹಾಡು ನೋಡಿ, ರಕ್ಷಿತ್ ಶೆಟ್ಟಿ ಕಾಲೆಳೀತಾವ್ರೆ..!

    anjaniputra song rakshith rashmika

    ಅಂಜನೀಪುತ್ರ ಚಿತ್ರದ ಆಡಿಯೋ ರಿಲೀಸ್ ಆದಾಗ ಈ ಹಾಡು ಏನೋ ಸ್ಪೆಷಲ್ಲಾಗಿದೆಯಲ್ಲ ಎನ್ನಿಸಿತ್ತು. ಈಗ ಚಿತ್ರ ಬಿಡುಗಡೆಯಾಗಿದ್ದೇ ತಡ, ಹಾಡು ವೈರಲ್ ಆಗಿದೆ. ಎಷ್ಟೇ ಅಂದ್ರೂ ಇದು ಹೆಂಡ್ತಿಯನ್ನು ಹೊಗಳುವ ಹಾಡು. ಮುದ್ದಿಸುವ ಹಾಡು. ಮುದ್ದು ಮಾಡುತ್ತಲೇ ಹೆಂಡ್ತಿಯನ್ನು ಖೆಡ್ಡಾಗಿ ಬೀಳಿಸಿಕೊಳ್ಳುವ ತರಲೆ ಗಂಡಂದಿರ ಪಾಡು ಹೇಳುವ ಹಾಡು.

    ಕುಂದಾಪುರ ಕನ್ನಡದಲ್ಲಿರುವ ಈ ಹಾಡು ಶುರುವಾಗುವುದೇ ಹೀಗೆ..ಭಾರಿ ಖುಷಿ ಮಾರೆ ನಂಗೆ, ನನ್ನ ಹೆಂಡ್ತಿ ಕಂಡ್ರೆ.. ಒಂದು ಚೂರು ಬಯ್ಯೋದಿಲ್ಲ ರಾತ್ರಿ ಕುಡ್ಕಂಡ್ ಬಂದ್ರೆ ಅಂಥಾ ಶುರುವಾಗುವ ಈ ಹಾಡು ಗಂಡು ಮಕ್ಕಳಿಗೆ ಸಿಕ್ಕಾಪಟ್ಟೆ ಇಷ್ಟವಾಗಿಬಿಟ್ಟಿದೆ.

    ಚಿತ್ರದ ಹಾಡು ಅದ್ಭುತವಾಗಿ ಮೂಡಿ ಬಂದಿದೆ. ಅದ್ಭುತ ಕ್ಯಾಮೆರಾ, ಡ್ಯಾನ್ಸು, ಹಳ್ಳಿಯ ಗೆಟಪ್ಪು.. ಎಲ್ಲವೋ ಸೂಪರ್. ಆದರೆ, ಹಾಡಿನ ಸಾಹಿತ್ಯ ಇಟ್ಟುಕೊಂಡಿರೋ ಅಭಿಮಾನಿಗಳು ರಕ್ಷಿತ್ ಶೆಟ್ಟಿ ಕಾಲೆಳಿತಿರೋದು ವಿಶೇಷ. ಅಫ್‍ಕೋರ್ಸ್.. ಸೀರಿಯಸ್ಸಾಗೇನೂ ತಗೋಬೇಕಿಲ್ಲ. ಅಭಿಮಾನಿಗಳು ಮಾಡ್ತಿರೋದು ತಮಾಷೆಗಾಗಿನೇ.. ರಶ್ಮಿಕಾ-ರಕ್ಷಿತ್ ಪ್ರೀತಿ ಪ್ರೇಮ ಗುಟ್ಟೇನೂ ಅಲ್ವಲ್ಲ.

  • ಅಂಜನೀಪುತ್ರನಿಗೆ ಮತ್ತಷ್ಟು ಪವರ್..!

    anjaniputra image

    ಅಂಜನೀಪುತ್ರ. ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಅಭಿನಯದ ಈ ಸಿನಿಮಾ 25 ದಿನ ಪೂರೈಸಿ ಯಶಸ್ವಿಯಾಗಿ ಮುನ್ನುಗ್ಗುತ್ತಿದೆ. ಬಿಡುಗಡೆಯಾದ ಎಲ್ಲ ಚಿತ್ರಮಂದಿರಗಳಲ್ಲೂ ಅದ್ಧೂರಿ ಪ್ರದರ್ಶನ ಕಾಣುತ್ತಿರುವ ಅಂಜನೀಪುತ್ರನಿಗೆ ನಿರ್ದೇಶಕ ಮತ್ತು ನಿರ್ಮಾಪಕರು ಇನ್ನಷ್ಟು ಪವರ್ ಕೊಟ್ಟಿದ್ದಾರೆ.

    ಇಂದಿನಿಂದ ಚಿತ್ರಮಂದಿರಗಳಲ್ಲಿ ಒಂದು ಎಕ್ಸ್‍ಟ್ರಾ ಫೈಟ್ ಹಾಗೂ ಒಂದಿಷ್ಟು ದೃಶ್ಯಗಳನ್ನು ಸೇರಿಸಿದ್ದಾರೆ. ಇದು 25 ದಿನ ಪೂರೈಸಿರುವ ಸಂಭ್ರಮಕ್ಕೆ ಅಭಿಮಾನಿಗಳಿಗೆ ನೀಡುತ್ತಿರುವ ಉಡುಗೊರೆ ಎನ್ನುತ್ತಿದೆ ಚಿತ್ರತಂಡ. ಸಿನಿಮಾ.. ಇನ್ನಷ್ಟು..ಮತ್ತಷ್ಟು.. ಯಶಸ್ವಿಯಾಗಲಿ. 

  • ಅಕ್ಟೋಬರ್ 5ಕ್ಕೆ ನಟಸಾರ್ವಭೌಮ

    natasarvabhouma on oct 5th

    ಪುನೀತ್ ರಾಜ್‍ಕುಮಾರ್ ಅಭಿನಯದ ನಟಸಾರ್ವಭೌಮ ಸಿನಿಮಾದ ರಿಲೀಸ್‍ಗೆ ಮುಹೂರ್ತ ಫಿಕ್ಸ್ ಆಗಿದೆ. ಅಕ್ಟೋಬರ್ 5ಕ್ಕೆ ಚಿತ್ರದ ಬಿಡುಗಡೆ. ರಾಕ್‍ಲೈನ್ ವೆಂಕಟೇಶ್ ನಿರ್ಮಾಣದ ಚಿತ್ರವಾಗಿರುವ ಕಾರಣ, ಬಿಡುಗಡೆ ದಿನಾಂಕ ಮುಂದಕ್ಕೆ ಹೋಗುವ ಸಾಧ್ಯತೆ ಇಲ್ಲ. ಪವನ್ ಒಡೆಯರ್ ನಿರ್ದೇಶನದ ಚಿತ್ರದ ಚಿತ್ರೀಕರಣ ಕಡೆಯ ಹಂತದಲ್ಲಿದ್ದು, ಪೋಸ್ಟ್ ಪ್ರೊಡಕ್ಷನ್ ಕೆಲಸವೂ ಏಕಕಾಲದಲ್ಲಿ ನಡೆಯುತ್ತಿದೆ. 

    ಬಾಗಲಕೋಟೆಯಲ್ಲಿ ಪುಷ್ಕರಣಿ ಬಳಿಯ ಶೂಟಿಂಗ್ ವಿವಾದವೂ ಶಾಂತಿಯುತವಾಗಿ ಬಗೆಹರಿದಿದ್ದು, ಚಿತ್ರದ ಚಿತ್ರೀಕರಣ ಮುಗಿದಿದೆ. ರಚಿತಾರಾಮ್ ನಾಯಕಿಯಾಗಿರುವ ಸಿನಿಮಾದಲ್ಲಿ ಹಿರಿಯ ನಟಿ ಬಿ.ಸರೋಜಾದೇವಿ ನಟಿಸುತ್ತಿರುವುದು ವಿಶೇಷ. ಡಿ.ಇಮಾನ್ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ. 

  • ಅಕ್ಷಯ್ ಕುಮಾರ್ ಬಿಟ್ಟರೆ ಅಪ್ಪುನೇ..!

    anjaniputra

    ಇಂಡಿಯನ್ ಸಿನಿಮಾಗಳಲ್ಲಿ ಆ್ಯಕ್ಷನ್ ವಿಚಾರಕ್ಕೆ ಬಂದರೆ, ತೆರೆ ಮೇಲೆ ಎನರ್ಜೆಟಿಕ್ ಆಗಿ ಕಾಣಿಸಿಕೊಳ್ಳೋದ್ರಲ್ಲಿ ಅಕ್ಷಯ್ ಕುಮಾರ್ ನಂಬರ್ ಒನ್ ಎಂದರೆ ತಪ್ಪಾಗಲಿಕ್ಕಿಲ್ಲ. ಅಕ್ಷಯ್ ಕುಮಾರ್, ಕರಾಟೆ, ಮಾರ್ಷಲ್ ಆಟ್ರ್ಸ್ ಕಲಿತಿರುವುದು ಕೂಡಾ ಅದಕ್ಕೆ ಕಾರಣ. ಹೀಗಾಗಿಯೇ ಅಕ್ಷಯ್ ಕುಮಾರ್ ಆಕ್ಷನ್ ದೃಶ್ಯಗಳಲ್ಲಿ ಸಹಜವಾಗಿಯೇ ಒಂದು ಫೋರ್ಸ್ ಇರುತ್ತೆ. 

    ಕನ್ನಡದಲ್ಲಿ ಅಂಥಾದ್ದೊಂದು ಫೋರ್ಸ್ ಇರೋದು ಪುನೀತ್ ರಾಜ್‍ಕುಮಾರ್ ಅವರಲ್ಲಿ. ಈ ಮಾತು ಹೇಳಿರೋದು ಶಿವರಾಜ್ ಕುಮಾರ್. ನನ್ನ ತಮ್ಮ ಎಂದು ಹೇಳಿಕೊಳ್ಳೋದಿಲ್ಲ. ಅಪ್ಪುಗೆ ಅಂಥಾ ಟ್ಯಾಲೆಂಟ್ ಇದೆ. ಅದ್ಭುತವಾಗಿ ಆಕ್ಷನ್ ಮಾಡ್ತಾರೆ ಎಂದು ಹೊಗಳಿದ್ದಾರೆ ಶಿವರಾಜ್ ಕುಮಾರ್.

    ಇತ್ತ ಅಪ್ಪುಗೆ ಶಿವಣ್ಣ, ಶ್ರೀಮುರಳಿ ಜೋಡಿಯ ಮಫ್ತಿ ಚಿತ್ರ ಇಷ್ಟವಾಗಿದೆ. ಶಿವರಾಜ್ ಕುಮಾರ್, ಮುರಳಿ ಅಭಿನಯ, ನರ್ತನ್ ನಿರ್ದೇಶನ, ಸಂಗೀತ ಎಲ್ಲವೂ ಚೆನ್ನಾಗಿದೆ ಎಂದು ಹೇಳಿದ್ದಾರೆ ಪುನೀತ್. ಇದೆಲ್ಲವನ್ನೂ ಅವರು ಹೇಳಿಕೊಂಡಿರೋದು ಒಟ್ಟಿಗೇ ಫೇಸ್‍ಬುಕ್ ಲೈವ್‍ಗೆ ಬಂದಿದ್ದ ವೇಳೆ.

  • ಅಣ್ಣನ ಜೊತೆ ಒಟ್ಟಿಗೇ ಬರ್ತಾರೆ ಅಪ್ಪು, ಸಿದ್ಧರಾಗಿ

    shivanna appu together for live chat

    ಶಿವರಾಜ್ ಕುಮಾರ್ ಮತ್ತು ಪುನೀತ್ ರಾಜ್‍ಕುಮಾರ್ ಎಷ್ಟೇ ದೊಡ್ಡ ಸ್ಟಾರ್ ಆದರೂ ಸೋಷಿಯಲ್ ಮೀಡಿಯಾದಿಂದ ಸ್ವಲ್ಪ ದೂರಾನೇ. ಶಿವರಾಜ್ ಕುಮಾರ್ ಇನ್ನೂ ಒಂದು ಹೆಜ್ಜೆ ಮುಂದೆ. ಅವರು ಟ್ವಿಟರ್‍ನಲ್ಲಾಗಲೀ, ಫೇಸ್‍ಬುಕ್‍ನಲ್ಲಾಗಲೀ, ಇನ್‍ಸ್ಟಾಗ್ರಾಮ್‍ನಲ್ಲಾಗಲೀ ಇಲ್ಲ. ಪುನೀತ್ ಇದ್ದರೂ ಆಕ್ಟಿವ್ ಅಲ್ಲ. ಆದರೆ ಇದೇ ಮೊದಲ ಬಾರಿಗೆ ಅಣ್ಣನ ಜೊತೆ ಒಟ್ಟಿಗೇ ಫೇಸ್‍ಬುಕ್ ಲೈವ್‍ಗೆ ಬರುತ್ತಿದ್ದಾರೆ ಶಿವರಾಜ್ ಕುಮಾರ್ & ಪುನೀತ್ ರಾಜ್‍ಕುಮಾರ್.

    ಪಿಆರ್‍ಕೆ ಆಡಿಯೋ ಕಂಪೆನಿ ಆರಂಭಿಸಿರುವ ಪುನೀತ್, ಅಂಜನೀಪುತ್ರದ ಹಾಡುಗಳನ್ನು ರಿಲೀಸ್ ಮಾಡಿದ್ದಾರೆ. ಈಗ, ಟಗರು ಚಿತ್ರದ ಆಡಿಯೋ ರೈಟ್ಸ್‍ನ್ನೂ ಪುನೀತ್ ಪಡೆದುಕೊಂಡಿದ್ದಾರೆ. ಟಗರು ಚಿತ್ರದ ಆಡಿಯೋ ಡಿ.23ಕ್ಕೆ ರಿಲೀಸ್ ಆಗುತ್ತಿದೆ. ಈ ಹಿನ್ನೆಲೆಯಲ್ಲಿ ಅಣ್ಣ-ತಮ್ಮ ಇಬ್ಬರೂ ಒಟ್ಟಿಗೇ ಫೇಸ್‍ಬುಕ್ ಲೈವ್‍ಗೆ ಬರುತ್ತಿದ್ದಾರೆ.

    ಇಂದು ರಾತ್ರಿ (ಡಿ.16) 8 ಗಂಟೆಗೆ ಪಿಆರ್‍ಕೆ ಆಡಿಯೋ ಅಫಿಷಿಯಲ್ ಫೇಸ್‍ಬುಕ್ ಪೇಜ್‍ನಲ್ಲಿ ಅಣ್ಣ-ತಮ್ಮ ಇಬ್ಬರೂ ಒಟ್ಟಿಗೇ ಸಿಗಲಿದ್ದಾರೆ. ಅಭಿಮಾನಿಗಳು ವೇಯ್ಟಿಂಗ್.

  • ಅಣ್ಣನ ಸಿನಿಮಾಗೆ ಅಭಿಮಾನಿಯಾಗಿ ಬಂದ ತಮ್ಮ..!

    puneeth watched tagaru first day first show

    ಟಗರಿಗೆ ಪೊಗರಿಗೆ ಪವರ್‍ಸ್ಟಾರ್ ಫಿದಾ ಆಗಿಬಿಟ್ಟಿದ್ದಾರೆ. ಶಿವರಾಜ್ ಕುಮಾರ್ ಅಭಿನಯದ ಟಗರು ಸಿನಿಮಾವನ್ನನು ಅಭಿಮಾನಿಗಳ ಜೊತೆ ಅಭಿಮಾನಿಯಾಗಿ ನೋಡಿದ್ದು ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್. ಊರ್ವಶಿ ಚಿತ್ರಮಂದಿರದಲ್ಲಿ ಗೆಳೆಯರು, ಅಭಿಮಾನಿಗಳ ಮಧ್ಯೆ ಚಿತ್ರ ವೀಕ್ಷಿಸಿದ ಪುನೀತ್, ಟಗರು ಚಿತ್ರಕ್ಕೆ ಫಿದಾ ಆಗಿಬಿಟ್ಟಿದ್ದಾರೆ.

    ನಿರ್ದೇಶಕ ಸೂರಿಯವರ ಕೆಲಸವನ್ನು ಹೊಗಳಿರುವ ಪುನೀತ್, ಸಿನಿಮಾದ ಮೇಕಿಂಗ್ ಅದ್ಭುತವಾಗಿದೆ ಎಂದು ಹೇಳಿದ್ದಾರೆ. ತುರ್ತು ಕೆಲಸದ ಹಿನ್ನೆಲೆಯಲ್ಲಿ ಕ್ಲೈಮಾಕ್ಸ್‍ಗೆ ಮೊದಲೇ ಹೊರನಡೆದ ಪುನೀತ್, ಮತ್ತೊಮ್ಮೆ ಸಿನಿಮಾ ನೋಡುತ್ತೇನೆ ಎಂದಿದ್ದಾರೆ. ಟಗರು ಚಿತ್ರದ ಖದರು ಪ್ರೇಕ್ಷಕರಿಗೂ ಇಷ್ಟವಾಗಿದೆ.

  • ಅಣ್ಣನಿಗೆ ಅಪ್ಪು ಕೊಟ್ಟ ಹುಟ್ಟುಹಬ್ಬದ ಕಾಣಿಕೆ

    puneeth, shivarajkumar

    55ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುವುದಿಲ್ಲ ಎಂದಿದ್ದ ಶಿವರಾಜ್ ಕುಮಾರ್ ಆಸೆ ಈಡೇರಲಿಲ್ಲ. ಪ್ರತಿವರ್ಷದಂತೆ ಈ ವರ್ಷವೂ ಅಭಿಮಾನಿಗಳ ದಂಡು ಶಿವಣ್ಣನ ಮನೆಗೆ ದಾಳಿಯಿಟ್ಟು, ಹುಟ್ಟುಹಬ್ಬ ಸಂಭ್ರಮಿಸಿತು.

    ಹುಟ್ಟುಹಬ್ಬದ ದಿನ ತಂದೆ ಮತ್ತು ತಾಯಿಯ ಸಮಾಧಿಗೆ ತೆರಳಿದ ಶಿವರಾಜ್ ಕುಮಾರ್, ನಮನ ಸಲ್ಲಿಸಿದರು. ಇದೆಲ್ಲದರ ಮಧ್ಯೆ ಅಣ್ಣನಿಗೆ ಪುನೀತ್ ರಾಜ್‍ಕುಮಾರ್ ವಿಶೇಷ ಉಡುಗೊರೆಯೊಂದನ್ನು ಕೊಟ್ಟರು. ಅದು ಬಿಎಂಡಬ್ಲ್ಯು ಸೈಕಲ್. ಆ ಸೈಕಲ್‍ನ ಬೆಲೆಯೇ 2 ಲಕ್ಷ ರೂ.

    ನೀಲಿ ಬಣ್ಣದ ಆ ಸೈಕಲ್ ನೋಡೋಕೆ ಸಖತ್ ಆಗಿದೆ. ಸೈಕಲ್‍ನ್ನೇ ಗಿಫ್ಟಾಗಿ ಕೊಡೋಕೆ ಕಾರಣವೂ ಇದೆ. ಶಿವರಾಜ್ ಕುಮಾರ್ ಪ್ರತಿದಿನ ಬೆಳಗ್ಗೆ ಸೈಕ್ಲಿಂಗ್ ಮಾಡ್ತಾರೆ. ಆರೋಗ್ಯ ಮತ್ತು ಫಿಟ್‍ನೆಸ್‍ಗೆ ಕಾಳಜಿ ವಹಿಸುವ ಅಣ್ಣನಿಗೆ ಸೈಕಲ್‍ನ್ನೇ ಉಡುಗೊರೆ ನೀಡಿ ಶುಭ ಹಾರೈಸಿದ್ದಾರೆ ತಮ್ಮ ಪುನೀತ್.

  • ಅದೇ ಜೋಡಿ.. ಅದೇ ಮೋಡಿ.. ಮತ್ತೆ ರಾಜಕುಮಾರ..

    rajkumara jodi to create craze again

    ರಾಜಕುಮಾರ ಜೋಡಿ ಮತ್ತೆ ಒಂದಾಗಿದೆ. ಪವರ್‍ಸ್ಟಾರ್ ಪುನೀತ್ ರಾಜ್‍ಕುಮಾರ್, ನಿರ್ದೇಶಕ ಸಂತೋಷ್ ಆನಂದ್ ರಾಮ್, ಹೊಂಬಾಳೆ ಫಿಲ್ಮ್ಸ್ ಮತ್ತೆ ಒಂದಾಗುತ್ತಿದ್ದಾರೆ. ಚಿತ್ರದ ಟೈಟಲ್ ಹೆಚ್ಚೂ ಕಡಿಮೆ ಫೈನಲ್ ಆಗಿದೆಯಂತೆ. ಅನೌನ್ಸ್ ಮಾಡೋದಷ್ಟೇ ಬಾಕಿ.

    ಇದು ಪುನೀತ್‍ಗೆ 29ನೇ ಸಿನಿಮಾ ಆದರೆ, ಸಂತೋಷ್ ಆನಂದ್‍ರಾಮ್‍ಗೆ 3ನೇ ಸಿನಿಮಾ. ಹೊಂಬಾಳೆ ಫಿಲ್ಸ್ಮ್‍ಗೆ 6ನೇ ಸಿನಿಮಾ. ನಟಸಾರ್ವಭೌಮ ಮುಗಿದ ನಂತರ ಹೊಂಬಾಳೆ ಸಿನಿಮಾ ಶುರುವಾಗಲಿದೆ. 

  • ಅಪ್ಪನ ಬಿರುದೇ ಅಪ್ಪು ಸಿನಿಮಾ ಟೈಟಲ್ಲು..!

    puneeth;s new movie titles natasarvabowma

    ಪುನೀತ್ ರಾಜ್‍ಕುಮಾರ್ ಅಭಿನಯದ ಹೊಸ ಚಿತ್ರದ ಟೈಟಲ್ ಏನು..? ಪಂಜುನಾ..? ಅಧಿಪತಿನಾ..? ಎಂದು ತಲೆಗೆ ಹುಳ ಬಿಟ್ಟುಕೊಂಡಿದ್ದವರಿಗೆ ಉತ್ತರ ಸಿಕ್ಕಿದೆ. ಪುನೀತ್ ಹೊಸ ಚಿತ್ರದ ಟೈಟಲ್ ನಟಸಾರ್ವಭೌಮ.

    ನಟಸಾರ್ವಭೌಮ ಎನ್ನುವುದು ಡಾ.ರಾಜ್‍ಕುಮಾರ್ ಅವರ ಬಿರುದುಗಳಲ್ಲಿ ಒಂದು ಹಾಗೂ ಅದು ಡಾ.ರಾಜ್ ಅವರ ಸಾಕ್ಷ್ಯಚಿತ್ರದ ಹೆಸರು ಕೂಡಾ ಹೌದು. 

    ಈ ಆ ಟೈಟಲ್‍ನ್ನು ಪುನೀತ್ ಅವರ ಹೊಸ ಚಿತ್ರಕ್ಕೆ ಫೈನಲ್ ಮಾಡಲಾಗಿದೆ. ಚಿತ್ರದ ಫಸ್ಟ್ ಲುಕ್ ಇಂದು ರಾತ್ರಿ (ಮಾರ್ಚ್ 16ರ ಮಧ್ಯರಾತ್ರಿ) ಪ್ರೇಕ್ಷಕರ ಎದುರು ಬರಲಿದೆ. ಕ್ಯಾಮೆರಾ ಹಿಡಿದುಕೊಂಡಿರುವ ಪುನೀತ್ ಅವರ ಫೋಟೋದಲ್ಲಿ ಚಿತ್ರದ ಕಥೆಯ ಗುಟ್ಟು ಮಾತ್ರ ಬಹಿರಂಗವಾಗುತ್ತಿಲ್ಲ.

    Related Articles :-

    Puneeth's New Film Titled 'Natasarvabhowma'

  • ಅಪ್ಪನಂತೆ ಮಗ.. ಪುನೀತ್‍ಗೆ ಶೋಭಾ ಕರಂದ್ಲಾಜೆ ಹೇಳಿದ್ದೇಕೆ..?

    shobha karandanjle meets puneeth rajkumar

    ಪ್ರಧಾನಿ ನರೇಂದ್ರ ಮೋದಿ ಸರ್ಕಾರಕ್ಕೆ 4 ವರ್ಷ ಪೂರೈಸಿ, 5ನೇ ವರ್ಷ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಬಿಜೆಪಿ ಸಂಪರ್ಕ್ ಫಾರ್ ಸಮರ್ಥನ್ ಅಭಿಯಾನ ಆರಂಭಿಸಿದೆ. ಬಿಜೆಪಿ ಸರ್ಕಾರದ ಸಾಧನೆಗಳನ್ನು ಸೆಲಬ್ರಿಟಿಗಳು ಹಾಗೂ ಜನರಿಗೆ ತಲುಪಿಸುವ ಕೆಲಸ ಮಾಡುತ್ತಿದೆ. ಈ ಕುರಿತು ಒಂದು ವಿಶೇಷ ಪುಸ್ತಕವನ್ನೇ ಮಾಡಿದೆ ಬಿಜೆಪಿ ಸರ್ಕಾರ. ಈ ಅಭಿಯಾನದ ಅಂಗವಾಗಿ ಸಂಸದೆ ಶೋಭಾ ಕರಂದ್ಲಾಜೆ, ಇತ್ತೀಚೆಗೆ ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್‍ರನ್ನು ಭೇಟಿ ಮಾಡಿದ್ದಾರೆ. ಸರ್ಕಾರದ ಸಾಧನೆಯ ಪುಸ್ತಕವನ್ನೂ ನೀಡಿದ್ದಾರೆ. 

    ಅಪರೂಪದ ಸರಳ ವ್ಯಕ್ತಿತ್ವ ಹೊಂದಿರುವ ಸ್ಯಾಂಡಲ್‍ವುಡ್ ಕಿಂಗ್ ಪುನೀತ್ ರಾಜ್‍ಕುಮಾರ್‍ರನ್ನು ಭೇಟಿ ಮಾಡಿದೆ. ನರೇಂದ್ರ ಮೋದಿ ಸರ್ಕಾರದ ಸಾಧನೆ, ಕೆಲಸಗಳ ಬಗ್ಗೆ ಪುಸ್ತಕ ನೀಡಿ ವಿವರಣೆ ನೀಡಿದೆ. ಅಪ್ಪನಂತೆ ಮಗ ಎಂದಿದ್ದಾರೆ ಶೋಭಾ.

    ಶೋಭಾ ಅವರಿಗೆ ಪುನೀತ್ ಅವರಲ್ಲಿ ಇಷ್ಟವಾಗಿರೋದು ಅವರ ಸರಳತೆ. ವಿನಯಪೂರ್ವ ವರ್ತನೆ. ಇತ್ತೀಚೆಗೆ ಶಾಸಕ ಶ್ರೀರಾಮುಲು ಕಿಚ್ಚ ಸುದೀಪ್ ಅವರನ್ನು ಭೇಟಿ ಮಾಡಿ ಬಿಜೆಪಿ ಸಾಧನೆಯ ಪುಸ್ತಕ ಕೊಟ್ಟಿದ್ದರು. ಈಗ ಶೋಭಾ ಕರಂದ್ಲಾಜೆ, ಪುನೀತ್ ಅವರನ್ನು ಭೇಟಿ ಮಾಡಿದ್ದಾರೆ.

  • ಅಪ್ಪು ಅಂಜನೀಪುತ್ರ ಒಪ್ಪಿಕೊಳ್ಳೋಕೆ `ಅಮ್ಮ' ಕಾರಣ

    anjaniputra

    ಪುನೀತ್ ರಾಜ್‍ಕುಮಾರ್ ಅಭಿನಯದ ಅಂಜನೀಪುತ್ರ ನಾಳೆಯಿಂದ ಆವರಿಸಿಕೊಳ್ಳಲಿದ್ದಾನೆ. ಹರ್ಷ-ಪುನೀತ್-ರಶ್ಮಿಕಾ-ರಮ್ಯಕೃಷ್ಣ ಕಾಂಬಿನೇಷನ್‍ನ ಚಿತ್ರವನ್ನು ಪುನೀತ್ ಒಪ್ಪಿಕೊಳ್ಳೋಕೆ ಕಾರಣ ಏನ್ ಗೊತ್ತಾ..? ಅದು ಅಮ್ಮ. ರಾಜಕುಮಾರ ಚಿತ್ರದ ನಂತರ ಪುನೀತ್ ನಟಿಸಿದ ಚಿತ್ರ ಅಂಜನೀಪುತ್ರ. ಅಷ್ಟು ದೊಡ್ಡ ಸ್ವಮೇಕ್ ಹಿಟ್ ಕೊಟ್ಟಿದ್ದ ಪುನೀತ್, ರೀಮೇಕ್ ಚಿತ್ರ ಒಪ್ಪಿಕೊಳ್ಳೋಕೆ ಕಾರಣ, ಅಮ್ಮ.

    ತಮಿಳಿನ ಪೂಜೈ ಚಿತ್ರದ ರೀಮೇಕ್ ಅಂಜನೀಪುತ್ರ. ಆ ಚಿತ್ರದಲ್ಲಿನ ತಾಯಿ-ಮಗನ ಸೆಂಟಿಮೆಂಟ್ ಪುನೀತ್‍ಗೆ ತುಂಬಾ ಇಷ್ಟವಾಯ್ತಂತೆ. ಇನ್ನು ಸ್ವತಃ ಪುನೀತ್, ತಮ್ಮ ತಾಯಿಯಿಂದ ಬಹಳವಾಗಿ ಪ್ರೇರಿತರಾದವರು. ಆದರೆ, ನನ್ನ ತಾಯಿಯ ಪ್ರೀತಿಯನ್ನು ನಾನು ಯಾವುದರೊಂದಿಗೆ ಕನೆಕ್ಟ್ ಮಾಡಿಕೊಳ್ಳಲು ಇಷ್ಟಪಡುವುದಿಲ್ಲ ಎನ್ನುತ್ತಾರೆ ಪುನೀತ್.

    ಅಂಜನೀಪುತ್ರದಲ್ಲಿ ಪುನೀತ್ ತಾಯಿಯಾಗಿ ನಟಿಸಿರುವುದು ರಮ್ಯಕೃಷ್ಣ. ನಾಯಕನಷ್ಟೇ ತೂಕದ ಪಾತ್ರವದು. ಕಣ್ಣು ಮತ್ತು ಧ್ವನಿಯಲ್ಲೇ ಪ್ರೇಕ್ಷಕರ ಎದೆಗಿಳಿಯುವ ರಮ್ಯಕೃಷ್ಣ ಅಂಜನೀಪುತ್ರದಲ್ಲೂ ಆವರಿಸಿಕೊಳ್ಳುತ್ತಾರೆ ಅನ್ನೋದ್ರಲ್ಲಿ ಅನುಮಾನವಿಲ್ಲ.

  • ಅಪ್ಪು ಅಷ್ಟೇ ಅಲ್ಲ, ಅಪ್ಪು ಅಭಿಮಾನಿಗಳೂ ಕುರುಕ್ಷೇತ್ರಕ್ಕೆ ವೇಯ್ಟಿಂಗ್

    puneeth waiting for kurukshetra

    ಕುರುಕ್ಷೇತ್ರ ಚಿತ್ರ ರಿಲೀಸ್‍ಗೂ ಮುನ್ನವೇ ಭರ್ಜರಿ ನಿರೀಕ್ಷೆ ಹುಟ್ಟಿಸಿರುವ ಸಿನಿಮಾ. ಅದು ಕೇವಲ ಚಾಲೆಂಜಿಂಗ್ ಸ್ಟಾರ್ ದರ್ಶನ್‍ರ 50ನೇ ಸಿನಿಮಾ ಎಂಬ ಕಾರಣಕ್ಕೆ ಅಲ್ಲ. ಅದು ಇಡೀ ಕನ್ನಡ ಚಿತ್ರರಂಗದ ಕಲಾವಿದರ ದಂಡನ್ನೇ ಒಟ್ಟುಗೂಡಿಸಿರುವ ಸಿನಿಮಾ. ಅದರಲ್ಲೂ ದುರ್ಯೋಧನನಾಗಿ ಕಾಣಿಸಿಕೊಂಡಿರುವ ದರ್ಶನ್ ನಿರೀಕ್ಷೆಯ ಶಿಖರವನ್ನೇ ಅಭಿಮಾನಿಗಳ ಎದುರು ಇಟ್ಟುಬಿಟ್ಟಿದ್ದಾರೆ.

    ಸಹಜವಾಗಿಯೇ ಚಿತ್ರದ ಬಗ್ಗೆ ಕನ್ನಡ ಚಿತ್ರರಂಗದ ಎಲ್ಲ ತಾರೆಯರೂ ನಿರೀಕ್ಷೆಯಿಂದ ಕಾಯುತ್ತಿರುವುದಾಗಿ ಹೇಳಿದ್ದಾರೆ. ಇತ್ತೀಚೆಗೆ ಅಂಜನಿಪುತ್ರ ಚಿತ್ರದ ಬಿಡುಗಡೆ ವೇಳೆ ಪವರ್‍ಸ್ಟಾರ್ ಪುನೀತ್ ರಾಜ್‍ಕುಮಾರ್‍ಗೆ ಕುರುಕ್ಷೇತ್ರ ಚಿತ್ರದ ಬಗ್ಗೆ ಪ್ರಶ್ನೆಗಳು ಎದುರಾದವು. ದರ್ಶನ್ ಅವರ ಲುಕ್‍ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದ ಪುನೀತ್, ಚಿತ್ರವನ್ನು ನೋಡಲು ಕಾಯುತ್ತಿದ್ದೇನೆ ಎಂದು ಹೇಳಿದ್ದರು.

    ಈಗ ಡಿ ಬಾಸ್ ಫ್ಯಾನ್ಸ್ ಅಷ್ಟೇ ಅಲ್ಲ, ಅಪ್ಪು ಫ್ಯಾನ್ಸ್ ಕೂಡಾ ದರ್ಶನ್ ಲುಕ್ಕು, ಗೆಟಪ್‍ಗೆ ಮಾರು ಹೋಗಿದ್ದಾರೆ. ದರ್ಶನ್, ದುರ್ಯೋಧನನ ಪಾತ್ರಕ್ಕೆ ಹೇಳಿ ಮಾಡಿಸಿದ ಹಾಗಿದ್ದಾರೆ ಎಂದು ಹೊಗಳುತ್ತಿದ್ದಾರೆ. ಅಷ್ಟೇ ಅಲ್ಲ, ಯಾವುದೇ ಐತಿಹಾಸಿಕ ಅಥವಾ ಪೌರಾಣಿಕ ಪಾತ್ರಗಳಿದ್ದರೆ, ಅದಕ್ಕೆ ದರ್ಶನ್ ಮೊದಲ ಆಯ್ಕೆ ಎಂದಿದ್ದಾರೆ.

    ಇತ್ತೀಚೆಗೆ ಕನ್ನಡದ ಸ್ಟಾರ್‍ಗಳ ಅಭಿಮಾನಿಗಳ ನಡುವೆ ವಾರ್‍ಗಷ್ಟೇ ಸಾಕ್ಷಿಯಾಗುತ್ತಿದ್ದ ಸಾಮಾಜಿಕ ಜಾಲತಾಣಗಳಲ್ಲಿ ಇದು ಸಂಚಲನ ಸೃಷ್ಟಿಸಿರುವುದು ನಿಜ. ಎಲ್ಲ ನಟರು, ಕಲಾವಿದರನ್ನೂ ಅಭಿಮಾನಿಸುವ ಅಭಿಮಾನಿಗಳ ಸಂಖ್ಯೆ ಕೋಟಿಯಾಗಲಿ.

  • ಅಪ್ಪು ಮೆಚ್ಚಿದ ಹಂಬಲ್ ಪೊಲಿಟಿಷಿಯನ್ ನೊಗ್‍ರಾಜ್

    puneeth appreciates humble politician

    ರಾಜ್ಯಾದ್ಯಂತ.. ದೇಶಾದ್ಯಂತ.. ಜಗತ್ತಿನಾದ್ಯಂತ.. ಭರ್ಜರಿ ಸುದ್ದಿ ಮಾಡುತ್ತಿರುವ ಹಂಬಲ್ ಪೊಲಿಟಿಷಿಯನ್ ಚಿತ್ರಕ್ಕೆ ಸ್ವತಃ ಪುನೀತ್ ರಾಜ್‍ಕುಮಾರ್ ಅವರಿಂದಲೂ ಮೆಚ್ಚುಗೆ ಸಿಕ್ಕಿದೆ. ಎಲ್ಲರಿಗಿಂತ ಮೊದಲು ತಮ್ಮ ಮನೆಯಲ್ಲೇ ಸಿನಿಮಾ ನೋಡಿದ ಪುನೀತ್ ರಾಜ್‍ಕುಮಾರ್ ಸಿನಿಮಾ ಸಖತ್ತಾಗಿದೆ ಎಂದಿದ್ದಾರೆ. ಡ್ಯಾನಿಶ್ ಸೇಟ್ ಅಭಿನಯಕ್ಕೆ ಹೊಟ್ಟೆ ತುಂಬಾ ನಕ್ಕಿದ್ದಾರೆ.

    ನಟ ಡ್ಯಾನಿಶ್ ಸೇಟ್, ರಕ್ಷಿತ್ ಶೆಟ್ಟಿ, ನಿರ್ಮಾಪಕ ಪುಷ್ಕರ್ ಮಲ್ಲಿಕಾರ್ಜುನಯ್ಯ, ನಿರ್ದೇಶಕ ಹೇಮಂತ್ ರಾವ್ ಮತ್ತು ಪುನೀತ್ ರಾಜ್‍ಕುಮಾರ್ ಒಟ್ಟಿಗೇ ತೆಗೆಸಿಕೊಂಡ ಫೋಟೋವನ್ನು ಪುಷ್ಕರ್ ಮಲ್ಲಿಕಾರ್ಜುನಯ್ಯ ತಮ್ಮ ಎಫ್‍ಬಿ ಖಾತೆಯಲ್ಲಿ ಹಾಕುವವರೆಗೆ ಇದು ಗುಟ್ಟಾಗಿಯೇ ಇತ್ತು. 

    ಯಾಕೆ ಅಂದ್ರೆ, ಹಂಬಲ್ ಪೊಲಿಟಿಷಿಯನ್ ನೊಗ್‍ರಾಜ್ ತರಲೆ, ತಮಾಷೆ ಗುಟ್ಟಾಗಿ ನಡೆಯೋದೇ ಇಲ್ಲ. ಚಿತ್ರತಂಡದ ಸದಸ್ಯ ವಿಜಯ್ ಚೆಂಡೂರ್ ಜೊತೆ ಥೇಟು ರಶ್ಮಿಕಾ-ರಕ್ಷಿತ್ ಸ್ಟೈಲಲ್ಲಿ ಬೆಳಗೆದ್ದು ಹಾಡಿನ ಗೆಟಪ್‍ನಲ್ಲಿ ಟೂರ್‍ನ್ನೇ ಹೊಡೆದಿರುವವರು. ಇಷ್ಟಕ್ಕೂ ರಾಜಕಾರಣಿಗಳು ತೀರಾ ತೀರಾ ಪರ್ಸನಲ್ ಕೆಲಸಗಳನ್ನಷ್ಟೇ ಗುಟ್ಟಾಗಿ ಮಾಡ್ತಾರೆ.

    ಎಷ್ಟೆಂದರೂ ಹಂಬಲ್ ಪೊಲಿಟಿಷಿಯನ್ ಅಲ್ವಾ..? ನೋಡೋಣ. ನಾಯಕ ಗುಟ್ಟು ಮಾಡ್ತಾನಾ..? ಎಲ್ಲವನ್ನೂ ಓಪನ್ ಆಗಿಯೇ ಹೇಳ್ತಾನಾ..? ಒಳ್ಳೆಯವನಾ..? ಅಥವಾ ತುಂಬಾ ಒಳ್ಳೆಯವನಾ ಅನ್ನೋದು ಜನವರಿ 12ರಂದು ಗೊತ್ತಾಗುತ್ತೆ. ಎಳ್ಳುಬೆಲ್ಲ ತಿಂದ್ಕೊಂಡ್ ತಿಳ್ಕೊಂಡ್ರಾಯ್ತು.

  • ಅಪ್ಪು ಸೀಟ್ ಅಲಂಕರಿಸುತ್ತಾರಾ ಯಶ್..?

    yash to host kannadadha kotiyadhipathi?

    ಸುವರ್ಣದಲ್ಲಿ ಪ್ರಸಾರವಾಗುತ್ತಿದ್ದ ಕನ್ನಡದ ಕೋಟ್ಯಧಿಪತಿ ರಿಯಾಲಿಟಿ ಶೋ ಮತ್ತೆ ಶುರುವಾಗಲಿದೆ ಎಂಬ ಸುದ್ದಿಗೆ ಈಗ ರೆಕ್ಕೆಪುಕ್ಕ ಬಂದುಬಿಟ್ಟಿದೆ. ಕಾರ್ಯಕ್ರಮವನ್ನು ಮತ್ತೆ ಶುರು ಮಾಡುವ ಬಗ್ಗೆ ಸ್ಟಾರ್ ಸುವರ್ಣದವರು ಒಂದೆರಡು ಹೆಜ್ಜೆ ಮುಂದಿಟ್ಟಿದ್ದಾರೆ. ಆದರೆ, ಸದ್ಯಕ್ಕೆ ಅವರಿಗೆ ಪುನೀತ್ ಸಿಗಲ್ಲ. ಏಕೆಂದರೆ, ಕಲರ್ಸ್ ಕನ್ನಡ ವಾಹಿನಿಯ `ಫ್ಯಾಮಿಲಿ ಪವರ್' ರಿಯಾಲಿಟಿ ಶೋ ನಡೆಸಿಕೊಡಲು ಪುನೀತ್ ಒಪ್ಪಿಕೊಂಡಿದ್ದಾರೆ. 

    ಹೀಗಾಗಿಯೇ ಜನಮೆಚ್ಚುವ ಸ್ಟಾರ್ ಹುಡುಕಾಟದಲ್ಲಿದ್ದ ಸುವರ್ಣ ವಾಹಿನಿಯವರಿಗೆ ಯಶ್ ಈ ಕಾರ್ಯಕ್ರಮ ನಿರೂಪಿಸಿದರೆ ಹೇಗೆ ಎಂಬ ಆಲೋಚನೆ ಬಂದಿದೆ. ಯಶ್ ಅವರನ್ನು ಸಂಪರ್ಕಿಸಿಯೂ ಆಗಿದೆ.

    ಆ ಕಾರ್ಯಕ್ರಮ ನಿರ್ವಹಿಸಲು ಆಫರ್ ಬಂದಿರುವುದು ನಿಜ. ಆದರೆ, ನಾನಿನ್ನೂ ಒಪ್ಪಿಕೊಂಡಿಲ್ಲ. ಮುಂದೇನಾಗುತ್ತೋ ಗೊತ್ತಿಲ್ಲ ಎಂದಿದ್ದಾರೆ ಯಶ್. ಸದ್ಯಕ್ಕೆ ಯಶ್ ಭಾಗವಹಿಸಬೇಕೋ ಬೇಡವೋ ಎಂಬ ಬಗ್ಗೆ ಅಂತಿಮ ನಿರ್ಣಯ ತೆಗೆದುಕೊಂಡಿಲ್ಲ. 

    ಹಾಗೆ ನೋಡಿದರೆ ಯಶ್ ಕಿರುತೆರೆಯಿಂದಲೇ ಬಣ್ಣದ ಜಗತ್ತಿಗೆ ಕಾಲಿಟ್ಟವರು. ಒಪ್ಪಿಕೊಂಡರೆ ಮತ್ತೊಮ್ಮೆ ಕಿರುತೆರೆಯಲ್ಲಿ ಮಿಂಚಲಿದ್ದಾರೆ ಯಶ್. ಅದೂ ಕನ್ನಡದ ಕೋಟ್ಯಧಿಪತಿ ಸೀಟ್‍ನಲ್ಲಿ.

  • ಅಪ್ಪು ಹೊಸ ಚಿತ್ರ ರೀಮೇಕ್ ಅಲ್ಲ, ಸ್ವಮೇಕ್

    puneeth rajkumar's new movie is swamake

    ಪುನೀತ್ ರಾಜ್ಕುಮಾರ್ ಚೆನ್ನೈನಲ್ಲಿ ವೆಟ್ರಿಮಾರನ್ ಅವರನ್ನು ಭೇಟಿ ಮಾಡಿದ್ದು ಸಂಚಲನ ಸೃಷ್ಟಿಸಿತ್ತು.

    ವೆಟ್ರಿಮಾರನ್ ನಿರ್ದೇಶನದ ರಾಷ್ಟ್ರಪ್ರಶಸ್ತಿ ವಿಜೇತ ಚಿತ್ರ ವಿಸಾರಣೈ ರೀಮೇಕ್ನಲ್ಲಿ ಪುನೀತ್ ನಟಿಸಲಿದ್ದಾರೆ ಎಂಬ ಸುದ್ದಿ ಹರಿದಾಡಿತ್ತು. ಈಗ ಖಚಿತ ವರ್ತಮಾನ ಬಂದಿದೆ. ರಾಕ್ಲೈನ್ ವೆಂಕಟೇಶ್ ನಿರ್ಮಾಣದ ಚಿತ್ರದಲ್ಲಿ ಅಪ್ಪು ನಟಿಸ್ತಾ ಇರೋದು ನಿಜ. ಆ ಚಿತ್ರಕ್ಕೆ ವೆಟ್ರಿಮಾರನ್ ನಿರ್ದೇಶಕ ಅನ್ನೋದೂ ನಿಜ.

    ಆದರೆ, ಅದು ವಿಸಾರಣೈ ರೀಮೇಕ್ ಅಲ್ಲ ಎಂಬ ಸ್ಪಷ್ಟನೆ ಹೊರಬಿದ್ದಿದೆ. ಚಿತ್ರದ ಕಥೆ ಚಿತ್ರಕಥೆ ಸಿದ್ಧವಾಗುತ್ತಿದ್ದು, ಅಂಜನಿಪುತ್ರದ ನಂತರ ಚಿತ್ರದ ಶೂಟಿಂಗ್ ಶುರುವಾಗಲಿದೆ. ಈ ಹಿಂದೆ ಮೌರ್ಯ, ಅಜಯ್ ಚಿತ್ರ ನಿರ್ಮಿಸಿದ್ದ ರಾಕ್ಲೈನ್ ವೆಂಕಟೇಶ್, 11 ವರ್ಷಗಳ ನಂತರ ಪುನೀತ್ ಜೊತೆ ಚಿತ್ರ ನಿರ್ಮಿಸಲಿದ್ದಾರೆ.

     

  • ಅಪ್ಪು ಹೊಸ ಚಿತ್ರ ವಿಸಾರಣೈ ರೀಮೇಕ್..?

    appu's new film is visaranai remake ?

    ವಿಸಾರಣೈ. ತಮಿಳಿನ ಸೂಪರ್ ಹಿಟ್ ಚಿತ್ರ. ಭಾರತದಿಂದ ಆಸ್ಕರ್ಗೂ ಹೋಗಿದ್ದ ಈ ಚಿತ್ರವನ್ನು ಪುನೀತ್ ರಾಜ್ಕುಮಾರ್ ಮಾಡ್ತಾರಾ..? ಸದ್ಯಕ್ಕೆ ಅಂಥಾದ್ದೊಂದು ಕುತೂಹಲ ಉದ್ಭವವಾಗಿದೆ. ಪಕ್ಕಾ ಆಗಿಲ್ಲ. ತಮಿಳು ನಿರ್ದೇಶಕ ವೇಟ್ರಿಮಾರನ್ ಅವರನ್ನು ಭೇಟಿ ಮಾಡಿರುವ ಪುನೀತ್, ಚಿತ್ರಕ್ಕೆ ಹೆಚ್ಚೂ ಕಡಿಮೆ ಓಕೆ ಎಂದಿದ್ದಾರಂತೆ.

    ವಿಸಾರಣೈ ಹೀರೋ ವೈಭವೀಕರಣದ ಚಿತ್ರವಲ್ಲ. ರಿಯಲೆಸ್ಟಿಕ್ ಚಿತ್ರ. ಅಮಾಯಕ ಯುವಕರು ಅಪರಾಧವೊಂದರಲ್ಲಿ ತಮಗೇ ಗೊತ್ತಿಲ್ಲದೆ ಸಿಕ್ಕಿ ಒದ್ದಾಡುವ ಕಥೆ. ಇನ್ನು ವೇಟ್ರಿಮಾರನ್ ಚಿತ್ರಗಳ ಇತಿಹಾಸ ನೋಡೋದಾದ್ರೆ, 'ಪೊಲ್ಲಾದವನ್', 'ಆಡುಕುಲಂ', 'ವಿಸಾರಣೈ', ಹಾಗೂ 'ವಡಾ ಚೆನ್ನೈ' ನಂತರ ಹಿಟ್ ಚಿತ್ರಗಳಿವೆ. 'ಆಡುಕುಲಂ' ಹಾಗೂ 'ವಿಸಾರಣೈ'  ರಾಷ್ಟ್ರಪ್ರಶಸ್ತಿ ವಿಜೇತ ಚಿತ್ರಗಳು ಎನ್ನವುದು ವಿಶೇಷ.

    ಹೊಸತನದ ಪ್ರಯೋಗಗಳಿಗೆ ಒಡ್ಡಿಕೊಳ್ಳುತ್ತಲೇ ಇರುವ ಪುನೀತ್, ಈ ಬಾರಿ ವಿಸಾರಣೈನಲ್ಲಿ ನಟಿಸುವ ಸಾಧ್ಯತೆ ಹೆಚ್ಚು. ಚಿತ್ರವನ್ನು ರಾಕ್ಲೈನ್ ವೆಂಕಟೇಶ್ ನಿರ್ಮಿಸುವ ಸಾಧ್ಯತೆಗಳಿವೆ. ಅದು ಸಾಧ್ಯವಾದರೆ ದಶಕದ ನಂತರ ಪುನೀತ್ ಮತ್ತು ರಾಕ್ಲೈನ್ ಜೋಡಿ ಒಂದಾಗಲಿದೆ. ಸದ್ಯಕ್ಕೆ ಪುನೀತ್ ಹರ್ಷ ನಿರ್ದೇಶನದ ಅಂಜನಿಪುತ್ರದಲ್ಲಿ ಬ್ಯುಸಿಯಾಗಿದ್ದಾರೆ.

     

The Terrorist Movie Gallery

Thayige Thakka Maga Movie Gallery